បងប្អូនជាទីគោរព! នៅក្នុងអត្ថបទថ្ងៃនេះតាមលោកលូកា (៦,២០- ២៦) ព្រះយេស៊ូមានព្រះបន្ទូលអំពីសុភមង្គល និងអមង្គល។ ការយល់ដឹងរបស់យើង និងព្រះយេស៊ូអំពីសុភមង្គល និងអមង្គលខុសប្លែកពីគ្នាឆ្ងាយណាស់។ ជាធម្មតាមយើងគិតថាអ្នកមានសុភមង្គលជាអ្នកមានឬអ្នកដែលហូបឆ្អែតឬអ្នកដែលមានគេកោតសរសើរ។ ប៉ុន្តែ! សម្រាប់ព្រះយេស៊ូ អ្នកដែលជាអ្នកមាន ឬអ្នកដែលបានហូបឆ្អែត នឹងអ្នកដែលត្រូវបានគេកោតសរសើរ អ្នកនោះនឹងត្រូវវេទនាហើយ។ តាមព្រះអង្គ អ្នកដែលមានសុភមង្គលគឺអ្នកដែលជាជនក្រីក្រខ្សត់ ឬអ្នកដែលកំពុងស្រែកឃ្លាន ឬអ្នកដែលកំពុងយំសោក ឬអ្នកដែលគេស្អប់ និងត្មេះតិដៀល បង្ខូចឈ្មោះព្រោះតែព្រះអង្គ។ អ្នកនោះនឹងទទួលរង្វាន់ធំនៅស្ថានបរមសុខជាមិនខាន។
