ថ្ងៃទី០៨ ខែមិថុនា ឆ្នាំ២០២៥ អត្ថបទគម្ពីរ (យ៉ូហាន ២០,១៩-២៣)អត្ថាធិប្បាយគម្ពីរដោយ៖ លោកបូជាចារ្យ គង់ វៀល

បងប្អូនជាទីស្រឡាញ់រាប់អាន! ថ្ងៃនេះជាថ្ងៃដ៏សែនពិសេសព្រោះជា​ថ្ងៃបុណ្យឱឡារិតគឺព្រះវិញ្ញាណ​ដ៏​វិ​សុទ្ធ​​យាងមកសន្ថិតលើក្រុមគ្រីស្តទូត ហើយសង្ឃឹមថាព្រះវិញ្ញាណដ៏វិសុទ្ធយាងមកសន្ថិតលើយើង។ ថ្ងៃ​នេះ​ជា​ថ្ងៃពិសេសមែនទែន នៅក្នុងព្រះវិហារព្រះសហគមន៍កាតូលិកកំពង់សោម ព្រះវិហារសន្តមីកាអែល​ដែល​ទទួលការស្ថាបនាឡើងវិញក្លាយទៅជាព្រះវិហារថ្មី នឹងមានលោកបូជាចារ្យច្រើន មានលោកអភិបាល និងគ្រីស្តបរិស័ទរាប់រយនាក់ដែលចូលរួមដើម្បីគោរពពិធីបុណ្យនេះនៅក្នុងព្រះវិហារថ្មី។​

សម្រាប់ថ្ងៃនេះផងដែលយើងអរព្រះគុណព្រះអង្គដោយសារមានគ្រីស្តបរិស័ទប៉ុន្មាននាក់ដែលនឹងទទួលពិធីលាបថ្ងាស ហើយក្នុង​អត្ថបទព្រះគម្ពីរថ្ងៃនេះយើង​លឺព្រះវិញ្ញាណដ័វិសុទ្ធ​យាងមកដើម្បីធ្វើ​ឱ្យយើង​កើត​ជា​ថ្មី។ ព្រះវិញ្ញាណដ៏វិសុទ្ធយាងមកយ៉ាងម៉េច? នៅពេលដែលព្រះយេស៊ូទ្រង់ឡើងទៅស្ថានបរមសុខវិញ​ព្រះអង្គ​មិនបោះបង់យើងចោលទេ! ទ្រង់បានប្រទានព្រះវិញ្ញាណដ៏សុទ្ធមកគង់សណ្ខិតលើបុត្រធីតាទ្រង់ ត្បិតកាលដែលទ្រង់ធ្វើដូច្នេះដើម្បី ណែនាំយើងឲ្យក្លាយទៅជាកូនព្រះ ក្មេងដែលមានទីពឹង ទ្រង់​នៅ​តែ​ណែ​នាំយើង មិនឲ្យយើងវង្វេងគោលដៅឡើយ។​

ដូច្នេះហើយសូមឲ្យជម្រៅចិត្តរបស់យើងព្រមទទួលព្រះវិញ្ញាណដ៏វិសុទ្ធដែលជំរុញឱ្យយើងស្រេកឡើងថា៖”អាបាសមានន័យថាឪពុកអស្ចារ្យមែន!”។ ថ្ងៃនេះយើងកើតជាថ្មីម្តងទៀត​ឱ្យយើងរួមគ្នាអបអរសាទរ លើក​តម្កើង គោរសើរព្រះអង្គដែលរាប់យើងជាបុត្រធីតា។ សូមអរព្រះគុណព្រះអង្គសម្រាប់បេក្ខជនទាំងប៉ុន្មា​ន​ដែលទទួលអគ្គសញ្ញាលាបថ្ងាសនៅថ្ងៃនេះ ហើយបងប្អូនដែលអត់ទាន់ទទួលអគ្គសញ្ញាលាប​ថ្ងាសសូ​ម​ឆ្លៀត​ឱកាសដើម្បីចុះឈ្មោះ ដើម្បីទទួលអគ្គសញ្ញានេះសារជាថ្មី។

ប្រសិនបើបងប្អូនទទួលអគ្គសញ្ញាស្រាយបាបហើយ ប៉ុន្តែអត់ទទួលលាបថ្ងាសមានន័យថាបងប្អូន​ដូច​ជា​អត់​ទាន់ពេញលក្ខណៈ។ នៅពេលដែលយើងទទួលអគ្គសញ្ញាលាបថ្ងាស ដូចជាយើង​ទទួលជីវិត​ថ្មី​យ៉ាង​ពេញលក្ខណៈនៅក្នុងជីវិតរបស់យើង។ បងប្អូនជាទីស្រឡាញ់ថ្ងៃនេះជាថ្ងៃដ៏សែនពិសេស ហើយខ្ញុំសុំឱ្យ​ព្រះជាម្ចាស់​ប្រទានព្រះពរ សុំឱ្យព្រះវិញ្ញាណធ្វើឱ្យបេះដូងរបស់បងប្អូនទាំងអស់គ្នាដូចជា​មានចិត្តឆេះ​ឆួល​ចំពោះដំណឹងល្អ ឱ្យបងប្អូនចេះស្រឡាញ់គ្នាទៅវិញទៅមក​ស្រមតាមរបៀបដែល​ព្រះអង្គទ្រង់​បាន​ស្រឡា​ញ់​យើង។ សូមអធិដ្ឋានសម្រាប់ព្រះសហគមន៍របស់យើងនៅប្រទេសកម្ពុជាឱ្យយើងទទួលព្រះវិញ្ញាណដ៏វិសុទ្ធឱ្យព្រះសហគមន៍កាតូលិកក្លាយទៅជាពន្លឺដែលបំភ្លឺប្រទេសខ្មែរដើម្បីផ្សព្វផ្សាយដំណឹងល្អឱ្យអស់បងប្អូនខ្មែរ និង​បរទេសឱ្យយើងទាំងអស់គ្នារាប់គ្នាជាបងប្អូន ស្រឡាញ់គ្នាជាបងប្អូន ហើយកសាងព្រះសហគមន៍​ប្រកប​ដោយ​ក្តី​សង្ឃឹម ក្តីស្រឡាញ់  និងជំនឿលើព្រះជាម្ចាស់។ សូមព្រះអង្គប្រទានព្រះពរឱ្យយើងទាំងអស់គ្នា។ ក្នុង​ព្រះនាមព្រះបិតា ព្រះបុត្រា និងព្រះវិញ្ញាណដ៏វិសុទ្ធ។ អាម៉ែន៕