មនុស្សមួយចំនួនបានជ្រើសរើសទទួលទានភេសជ្ជៈប៉ូវកម្លាំងដើម្បីបង្កើនសមត្ថមភាពធ្វើការងារ និងថាមពលប្រចាំថ្ងៃរបស់ខ្លួន។ ភេសជ្ជៈប៉ូវកម្លាំង ងាយស្រួលទិញ តម្លៃសមរម្យ ហើយមនុស្សភាគច្រើនមិនចាប់អារម្មណ៍នឹងផលប៉ះពាល់របស់វាក្នុងរយៈពេលវែងនោះឡើយ។ ជាការពិតពួកវាអាចជួយបានមួយរយៈពេលខ្លី ខណៈដែលរាងកាយត្រូវការថាមពលបន្ថែម។ ប៉ុន្តែ តើអ្នកដឹងទេថា ការទទួលទានច្រើនពេក អាចបណ្ដាលឲ្យមានបញ្ហាសុខភាព?
វាជាការពិត ដែលអ្នកវេជ្ជសាស្ត្របានរកឃើញថា មនុស្សដែលមានជំងឺបេះដូង និងសម្ពាធឈាម ទទួលរងឥទ្ធិពលធ្ងន់ធ្ងរពីភេសជ្ជៈប៉ូវកម្លាំង។
តើវាប៉ះពាលដល់បេះដូងរបស់អ្នកយ៉ាងណាខ្លះ?
គន្លឹះមួយចំនួបង្កឡើងដោយភេសជ្ជៈប៉ូវកម្លាំង មានដូចជា វាបានធ្វើឲ្យបេះដូងរបស់អ្នកលោតញាប់ជាងមុន ឬដំណើរការខុសប្រក្រតី។ ហើយពេលខ្លះអ្នកអាចសម្គាល់បានតាមរយៈបេះដូងលោតខ្លាំង ទោះមិនបានធ្វើចលនាខ្លាំងៗយ៉ាងណាក៏ដោយ។ នេះជារឿងសំខាន់ ព្រោះការប្រែប្រួលបែបនេះ អាចនាំឱ្យកើតជំងឺបេះដូងធ្ងន់ធ្ងរ ជាពិសេសសម្រាប់អ្នកដែលមានបញ្ហាបេះដូង។
ការរួមផ្សំនៃជាតិកាហ្វេអ៊ីនខ្ពស់ និងសារធាតុរំញោចផ្សេងទៀតនៅក្នុងភេសជ្ជៈប៉ូវកម្លាំងអាចនាំឱ្យចង្វាក់បេះដូង និងសម្ពាធឈាមកើនឡើង នេះបើយោងតាមមជ្ឍមណ្ឌលត្រួតពិនិត្យនិងការថែទាំជំងឺ របស់សហរដ្ឋអាមេរិក។ កត្តាទាំងពីរនេះគឺជាកត្តាហានិភ័យនៃជំងឺបេះដូង។ វិទ្យាស្ថានជាតិសុខភាពរបស់អាមេរិក ក៏កត់សម្គាល់ផងដែរថា ការទទួលទានភេសជ្ជៈទាំងនេះច្រើនពេក អាចនាំឱ្យរំខានដល់ចង្វាក់បេះដូង និងបញ្ហាសុខភាពផ្សេងៗទៀតដែរ។
ភេសជ្ជៈប៉ូវកម្លាំងដែលមានសារធាតុខាងក្រោមនេះ ប៉ះពាល់ខ្លាំងដល់សុខភាពមានដូចជា៖
- កាហ្វេអ៊ីន៖ ជាតិកាហ្វេអ៊ីនគឺជាសារធាតុរំញោចចម្បងនៅក្នុងភេសជ្ជៈប៉ូវកម្លាំង។ ជាតិកាហ្វេអ៊ីនច្រើនពេកអាចបណ្តាលឱ្យញ័របេះដូង ចង្វាក់បេះដូងកើនឡើង និងសម្ពាធឈាមឡើងខ្ពស់។
- តូរីន៖ តូរីនសារធាតុមួយដែលរួមផ្សំជាមួយនឹងជាតិកាហ្វេអ៊ីន អាចបង្កើនឥទ្ធិពលរំញោច ដែលអាចបង្កើនអត្រាបេះដូង និងសម្ពាធឈាមផងដែរ។
- ហ្គូរ៉ាណា៖ វាជាសារធាតុម្យ៉ាង ដែលធ្វើឲ្យជាតិកាហ្វេអ៊ីនកើនឡើង។ ជាទូទៅវាមិនត្រូវបានដាក់ក្នុងបញ្ជីរាយនាមធាតុផ្សំដោយឡែកពីគ្នានៅលើសំបកភេសជ្ជៈនោះទេ ដោយសារសារធាតុនេះ ធ្វើឲ្យជាតិកាហ្វេអ៊ីនសរុបកើនឡើង។
- យិនស៊ិន៖ ជាផលិតផលឱសថបុរាណដ៏ពេញនិយមមួយ។ ធាតុផ្សំនេះត្រូវបានចាត់ទុកថាមានសុវត្ថិភាព។ តែទោះជាយ៉ាងណាក៏ដោយ ការស្រាវជ្រាវលើសុវត្ថិភាព និងប្រសិទ្ធភាពនៅមានកម្រិតនៅឡើយ។ សូមពិនិត្យជាមួយអ្នកផ្តល់សេវាថែទាំសុខភាពរបស់អ្នក មុនពេលទទួលទានយិនស៊ិន។
- ស្ករ៖ កម្រិតជាតិស្ករខ្ពស់ អាចបណ្ដាលឲ្យធាត់ ដែលជាកត្តាហានិភ័យនៃជំងឺបេះដូង និងអាចបណ្តាលឱ្យកើនឡើងកម្រិតជាតិស្ករក្នុងឈាម។
- វិតាមីនបេ៖ ទោះបីជាវីតាមីន B ដើរតួគាំទ្រមុខងាររាងកាយយ៉ាងសំខាន់ជាច្រើនក៏ដោយ ភេសជ្ជៈប៉ូវកម្លាំងច្រើនតែមានផ្ទុកលើសពីអ្វីដែលយើងគួរមាន។ វីតាមីន B ច្រើនពេកបង្កឲ្យកើតជាសារធាតុពុល ជាពិសេសចំពោះមុខងារថ្លើម ឬតម្រងនោម។
- ស្ករសិប្បនិម្មិត៖ ភាគច្រើនការយល់ឃើញថា ស្ករសិប្បនិម្មិត ឬសារធាតុផ្អែមសិប្បនិម្មិត ដែលហៅជាភាសាអង់គ្លេសថា Artificial sweeteners អាចជួយដល់សុខភាពបាន ប៉ុន្តែវាអាចជាកត្តារួមផ្សំបង្កហានិភ័យសុខភាពទាក់ទងនឹងបេះដូងផងដែរ។
ប្រសិនបើអ្នកចង់មានថាមពល ឬទទួលទានភេសជ្ជៈប៉ូវកម្លាំង តើគួរធ្វើរបៀបណា?
- ឈ្វេងយល់ពីគ្រឿងផ្សំនៅក្នុងភេសជ្ជៈប៉ូវកម្លាំងមួយនោះ ដើម្បីរកជម្រើសដែលប្រសើរ មិនប៉ះពាល់ដល់បេះដូង និងសុខភាពរបស់អ្នកតាមដែលអាចធ្វើទៅបាន។
- រកមើលវិធីបង្កើនថាមពលផ្សេងទៀត ដែលធ្វើឱ្យសុខភាពល្អជាងមុន ដូចជា គេងឱ្យបានគ្រប់គ្រាន់ ញ៉ាំអាហារដែលមានសុខភាពល្អ និងការរក្សាតុល្យភាពជាតិទឹក២លីត្រក្នុងមួយថ្ងៃ អាចជួយឱ្យអ្នកមានថាមពលកាន់តែច្រើន។
- ប្រសិនបើអ្នកសម្គាល់ឃើញថា ភេសជ្ជៈប៉ូវកម្លាំងធ្វើឱ្យអ្នកមានអារម្មណ៍ញ័រ ថប់បារម្ភ ឬខុសពីធម្មតា ទោះក្នុងកាលៈទេសៈណាក៏ដោយ ត្រូវបញ្ឈប់ផឹកវាភ្លាម ហើយស្វែងរកវិធីផ្សេងទៀតដើម្បីបង្កើនថាមពលរបស់អ្នក។
- ប្រសិនបើអ្នកមិនប្រាកដថា តើភេសជ្ជៈប៉ូវកម្លាំងមានសុវត្ថិភាពសម្រាប់អ្នកឬអត់ ជាពិសេសប្រសិនបើអ្នកមានបញ្ហាបេះដូង ឬសម្ពាធឈាមឡើងខ្ពស់ សូមពិគ្រោះជាមួយអ្នកផ្តល់សេវាថែទាំសុខភាពរបស់អ្នក។
ខណៈពេលដែលភេសជ្ជៈប៉ូវកម្លាំង ប្រៀបដូចជាដំណោះស្រាយម្យ៉ាងនៅពេលអស់កម្លាំង ប៉ុន្តែពួកវាក៏ផ្តល់ផលអវិជ្ជមានខ្ពស់ដែរដល់សុខភាពរាងកាយដែលយើងគួរគិតគូរឡើងវិញ។ ជាការពិតណាស់ យើងគួរតែជ្រើសរើសវិធីសាស្ត្រផ្សេងទៀត ដើម្បីបង្កើនថាមពលរាងកាយ និងថែទាំប្រព័ន្ធបេះដូងឲ្យប្រសើរនិងមានសុខភាពល្អ។
សុខភាពល្អ ប្រៀបដូចរកឃើញកំណប់មហាសាល
បំណងល្អពីRVAKhmer
Daily Program
