សិក្ខាសាលាសុខដុមរមនីយកម្មសាសនា៖ សាសនិករួមគ្នារក្សា និងពង្រឹងសាមគ្គីជាតិ

សិក្ខាសាលាកិច្ចសន្ទនាអន្តរជំនឿសាសនា ដើម្បីសុខដុមរមនីយកម្មសាសនានៅកម្ពុជា ក្រោម​ប្រធានបទ​ “សាសនិករួមគ្នារក្សា និងពង្រឹងសាមគ្គីជាតិ” បានប្រមូលផ្តុំអ្នកដឹកនាំសាសនា និងសាសនិកគ្រប់ជំនឿនិកាយ​ ដើម្បីពិភាក្សាអំពីតួនាទីសាសនាក្នុងការកសាងសុខដុមរមនីយកម្មនៅកម្ពុជា នាថ្ងៃទី​៤ ខែ​ធ្នូនេះ នៅទីស្តីការក្រសួងធម្មការនិងសាសនា​ នារាជធានីភ្នំពេញ។

ព្រះសហគមន៍កាតូលិកកម្ពុជា តំណាងដោយ លោកបូជាចារ្យ យ៉ូហាន អ៊ុន សុន បានធ្វើបទបង្ហាញ​ឆ្លុះបញ្ចាំង​​ពីតម្លៃសាមគ្គីភាព ដោយផ្អែកលើគោលលទ្ធិជំនឿ​របស់ព្រះសហគមន៍កាតូលិក និងតួនាទីសាសនិកក្នុងការអភិវឌ្ឍសេរីភាពសាសនា និងការរស់នៅរួមគ្នាដោយសន្តិភាព។

លោក​បូជាចារ្យ សុន មាន​ប្រសាសន៍ទៅកាន់​អ្នកចូលរួម​ថា «សាមគ្គីភាពមិនមែនជាអារម្មណ៍សេចក្តីមេត្តាករុណាឬអាណិតអាសូរប៉ុណ្ណោះទេ ប៉ុន្តែវាជាគុណធម៌ និងការប្តេជ្ញាចិត្តក្នុងការស្វែងរកផលប្រយោជន៍រួម»។

ដោយ​លោក​បានលើកឡើងទៀតថា មនុស្សគ្រប់រូបមានថ្លៃថ្នូរ និងជាបងប្អូនក្នុងគ្រួសារមនុស្សតែមួយ។ លោកបញ្ជាក់ថា សាមគ្គីភាពតាមលទ្ធិព្រះសហគមន៍កាតូលិក មានគ្រឹះលើសេចក្តីថ្លៃថ្នូររបស់មនុស្សគ្រប់រូប មិនថាសាសនាអ្វី ឬជាតិសាសន៍អ្វីនោះឡើយ រីឯការរស់នៅជាបងប្អូនក្នុងគ្រួសារមនុស្សតែមួយ គឺជា​ការទទួលខុសត្រូវស្វែងរកផលប្រយោជន៍រួម។

បូជាចារ្យអង្គនេះ បានលើកឡើងថា ការគោរពភាពខុសគ្នា ការបើកចិត្តចូលរួមសន្ទនាអន្តរជំនឿ និងការរួមដំណើរដោះស្រាយបញ្ហាសង្គម ជាជំហានសំខាន់ក្នុងការកសាងសាមគ្គីជាតិ។

ក្នុងសុន្ទរកថា លោក​បានលើកឧទាហរណ៍អំពី​សកម្មភាពសហការដែលកំពុងអនុវត្តរួមគ្នា​ដូចជា​៖ ការងារមនុស្សធម៌ សុខាភិបាល ការអប់រំ និងអភិវឌ្ឍសង្គម រវាងសហគមន៍កាតូលិក ព្រះពុទ្ធសាសនា និងសាសនាផ្សេងៗ។

ម្យ៉ាងវិញទៀត សាសនាទាំងអស់ ក៏បានចូលរួមការពារបរិស្ថាន បេតិកភណ្ឌនិងវប្បធម៌ខ្មែរ ការបណ្តុះបណ្តាលយុវជនឲ្យរក្សាអត្តសញ្ញាណជាតិ និងគុណតម្លៃខ្មែរផងដែរ។  លោក​បានលើកដំបូន្មានជាក់ស្តែងអំពីការបដិសេធការប្រើសាសនាដើម្បីបង្កជម្លោះ ឬបែងចែកសង្គម ដោយសាសនាមានតួនាទីធ្វើជា “ស្ពានសន្តិភាព” មិនមែនជាជញ្ជាំងខ័ណ្ឌ​ចែកនោះ​ទេ។

លោកបូជាចារ្យបានថ្លែងអំណរគុណដល់ ឯកឧត្តម បណ្ឌិត ចាយ បូរិន រដ្ឋមន្ត្រីក្រសួងធម្មការ សាសនា សម្រាប់ការណែនាំ និងគាំទ្រអំឡុងពេលរៀបចំសិក្ខាសាលានេះ។ ជាមួយគ្នានេះ លោកក៏បានលើកឡើងពីការរួមសុខទុក្ខរបស់សាសនាផ្សេងៗ ពេលសម្តេចប៉ាប ហ្វ្រង់ស៊ីស្កូ សោយទិវង្គត ជាសញ្ញាពិតប្រាកដនៃសុខដុមរមនីកម្ម​សាសនានៅកម្ពុជា។

លោកបូជាចារ្យ យ៉ូហាន អ៊ុន សុន បានសូមឲ្យ “បេសកកម្មនៃការរួបរួម” ក្លាយជាកម្លាំងជម្រុញ និង​ដឹកនាំកម្ពុជា ទៅកាន់អនាគតដ៏ភ្លឺស្វាងជាមួយសន្តិភាព និងសាមគ្គីភាពជាតិ «អរគុណសន្តិភាព»៕