បេតិកភណ្ឌវប្បធម៌របស់ប្រទេសឥណ្ឌូនេស៊ី ឆ្លុះបញ្ចាំងពីស្មារតីនៃការរួមដំណើរជាមួយគ្នាក្នុងពិធីបើកមហាសន្និបាត FABC

ប្រទេសឥណ្ឌូនេស៊ីបានស្វាគមន៍លោកអភិបាល និងថ្នាក់ដឹកនាំព្រះសហគន៍កាតូលិកមកពីទូទាំងទ្វីបអាស៊ី ជាមួយនឹងការអបអរសាទរនៃភាពចម្រុះខាងវប្បធម៌របស់ខ្លួន ក្នុងអំឡុងពេលបើកមហាសន្និបាតពេញអង្គលើកទី ១២ នៃសហព័ន្ធក្រុមប្រឹក្សាលោកអភិបាលអាស៊ី (FABC) នៅសណ្ឋាគារ Mulia ក្រុងហ្សាការតា កាលពីថ្ងៃទី ២១ ខែកក្កដា ដោយបានប្រើប្រាស់តន្ត្រី របាំប្រពៃណី និងការសម្តែងតាមបែបជនជាតិដើម ដើម្បីឆ្លុះបញ្ចាំងពីការអំពាវនាវរបស់មហាសន្និបាតក្នុងការដើរជាមួយគ្នារបស់ព្រះសហគមន៍កាតូលិក។

សម្រាប់លោកបូជាចារ្យ Hans Jeharut ប្រធានគណៈកម្មាធិការរៀបចំព្រឹត្តិការណ៍ FABC 2026 មានប្រសាសន៍ថា ការសម្តែងវប្បធម៌ទាំងនេះ គឺជាការបង្ហាញចេញប្រកបដោយបំណងច្បាស់លាស់របស់​ព្រះសហគមន៍ឥណ្ឌូនេស៊ី ជាជាងគ្រាន់តែជាការសម្តែង។ លោកបូជាចារ្យ Hans បានមានប្រសាសន៍ថា «នៅក្នុងពិធីបុណ្យធំៗរបស់ព្រះសហគមន៍កាតូលិក យើងតែងតែព្យាយាមបង្ហាញពីភាពសម្បូរបែបនៃព្រះសហគមន៍កាតូលិកនៅក្នុងប្រទេសឥណ្ឌូនេស៊ី តាមរយៈ​ការសម្តែង​របស់​តំបន់ផ្សេងៗគ្នា»។

«សម្រាប់មហាសន្និបាតនេះ តំបន់ស៊ូម៉ាត្រាខាងជើង ត្រូវបានដាក់បញ្ជូលក្នុងអំឡុងពេលពិធីបើក ឯតំបន់ផ្លូរ៉េស  រៀបចំ​ដោយ​ពិធីដង្ហែបិទកម្មវិធីតាមរយៈរបាំ Jai ខណៈដែលក្រុម​​កោះចាវ៉ាជាអ្នក​ដង្ហែ​សក្ការបូជា​ក្នុង​អភិបូជា ហើយក៏នឹងត្រូវរៀបចំ​ក្នុងអភិបូជានៅអាសនៈវិហារហ្សាការតា (Jakarta Cathedral)»។

ក្នុងចំណោមអ្នកចូលរួម ព្រះសហគមន៍នៅតំបន់ស៊ូម៉ាត្រាខាងជើង (IKKSU) ប្រចាំតំបន់ Greater Jakarta បានផ្តល់ជូនលើសពីការសម្តែងវប្បធម៌។ ការសម្តែង​របស់ពួកគេ​បាន​រំលឹកអំពី​កិច្ចការគង្វាល និង​សាមគ្គីភាពជាច្រើនឆ្នាំជាមួយសហគមន៍ដែលត្រូវការជំនួយ។

IKKSU ប្រមូលផ្តុំគ្រីស្តសាសនិកកាតូលិកមកពីស៊ូម៉ាត្រាខាងជើង រួមទាំងសមាជិកនៃសហគមន៍ជនជាតិ Toba Batak, Karo, Simalungun, Nias, Pakpak និងសហគមន៍ជនជាតិផ្សេងទៀត។

យោងតាមលោក Lodewijk Sihite ប្រធាន IKKSU ប្រចាំតំបន់ Greater Jakarta សមាគមបានរួមចំណែក​ក្នុងព្រះសហគមន៍កាតូលិកយ៉ាងស្ងៀមស្ងាត់ ដោយការចូលរួមរំលែកទុក្ខជាមួយគ្រួសារសព ផ្តល់អាហាររូបត្ថម្ភ​សិស្ស​ក្រីក្រ ការគាំទ្រផ្នែក​អប់រំ​ដល់និស្សិតទេវវិទ្យាល័យនិងអ្នកបួស និងផ្តល់​ជំនួយ​សម្រាប់កិច្ច​ការបម្រើ​ព្រះសហគមន៍​ដោយមិនប្រកាន់ពូជសាសន៍ឡើយ។

លោក Sihite បានមានប្រសាសន៍ថា «ប្រហែលជាយើងមិនបានធ្វើអ្វីដែលអស្ចារ្យនោះទេ ប៉ុន្តែយើងបានព្យាយាមមានវត្តមាននៅគ្រប់ទីកន្លែងចំពោះ​កិច្ចការបម្រើ​ក្នុង​ព្រះសហគមន៍កាតូលិកដែលត្រូវការយើង»។ ការប្តេជ្ញាចិត្តនោះបានស្តែងឡើងយ៉ាងច្បាស់ បន្ទាប់ពីគ្រោះមហន្តរាយធម្មជាតិបានវាយប្រហារភូមិភាគ Sibolga ក្នុងខេត្តស៊ូម៉ាត្រាខាងជើង ដែលនៅទីនោះ IKKSU បានធ្វើការរួមជាមួយព្រះសហគមន៍ក្នុងស្រុក ក្នុងកិច្ចខិតខំប្រឹងប្រែងសង្គ្រោះ និងស្តារឡើងវិញ។ ឆ្លងតាម​កិច្ច​ការបម្រើរបស់ពួកគេនេះ ខាង​អ្នករៀបចំរបស់​ FABC អញ្ជើញសមាគមឱ្យធ្វើជាតំណាងឱ្យស៊ូម៉ាត្រាខាងជើង ក្នុងអំឡុងពេលពិធីអបអរសាទរបើកកម្មវិធី។

សម្រាប់លោកបូជាចារ្យ Hans ការសម្តែងនេះ​​មាន​អត្ថន័យកាន់តែជ្រាលជ្រៅសម្រាប់​ពិធីបុណ្យ​អភិបូជា។ លោកបានមានប្រសាសន៍ថា «តំបន់មួយចំនួននៅស៊ូម៉ាត្រាខាងជើងទើបតែបានជួបប្រទះនូវគ្រោះមហន្តរាយធំៗនាពេលថ្មីៗនេះ។ ហើយ​អ្នកចូលរួមសម្តែងជាច្រើននៅថ្ងៃនេះ ក៏ធ្លាប់បានចូលរួមយ៉ាងសកម្មក្នុងកិច្ចខិតខំប្រឹងប្រែងស្តារមហន្តរាយនេះ​ដែរ»។

IKKSU ក៏បានសង្កត់ធ្ងន់លើការចូលរួមរបស់ជំនាន់ក្រោយផងដែរ។ ជាជាងពឹងផ្អែកជាសំខាន់លើសមាជិកចាស់ព្រឹទ្ធាចារ្យ សមាគមបានប្រគល់តួនាទីសំខាន់ៗដល់យុវជន និងកុមារ រួមទាំងកុមារពីរនាក់ដែលបានចូលរួមក្នុងពិធីដង្ហែសក្ការបូជា។

លោក Sihite បានមានប្រសាសន៍ថា «ដល់ពេលដែលយើងត្រូវផ្តល់វេទិកាដល់ពួកគេហើយ»។ សមាជិក IKKSU ចំនួន ៣៤ នាក់បានចូលរួមក្នុងពិធីអបអរសាទរបើក រួមទាំងអ្នករាំរបាំ Tortor ចំនួន ១០ នាក់ជាមួយគ្រូបង្ហាត់ ៣ នាក់ សមាជិក ៦ នាក់ក្នុងពិធីដង្ហែសក្ការបូជា និងអ្នកផ្សេងទៀតដែលបានដឹកនាំការអធិស្ឋាន និងតន្ត្រី។ ពិធីបើកក៏មានការចូលរួមពីក្រុមរាំ Nusantara Dancers ដែលបានសម្តែងរបាំប្រពៃណីតំណាងឱ្យបេតិកភណ្ឌវប្បធម៌ដ៏សម្បូរបែបរបស់ឥណ្ឌូនេស៊ី រួមទាំងប្រពៃណីមកពីកោះស៊ូម៉ាត្រា កោះចាវ៉ា និងកោះនុយសា តេងការ៉ា។ សម្លៀកបំពាក់ស្រស់ស្អាត តន្ត្រីប្រពៃណី និងក្បាច់រាំតាមតំបន់ បានណែនាំប្រតិភូឱ្យស្គាល់ពីភាពសម្បូរបែបនៃវប្បធម៌នៃប្រជុំកោះឥណ្ឌូនេស៊ី។

កម្មវិធីវប្បធម៌បានបន្តជាមួយលោក Tommy Boly Lakawolo ដែលបានច្រៀងបទ «For the Beauty of the Earth» ដែលជាបទចម្រៀងអរព្រះគុណសម្រាប់ការបង្កើតពិភពលោក និងបេតិកភណ្ឌវប្បធម៌ដែលចែករំលែកដោយប្រជាជននៅអាស៊ី។ ខណៈពេលដ៏រំភើបមួយបានកើតឡើងនៅពេលដែលកញ្ញា Christina Santoso ដែលជាអ្នកចម្រៀងពិការម្នាក់ បានច្រៀងបទ «Make Me a Channel of Your Peace» ដែលជាសេចក្តីអធិស្ឋានរបស់សន្តហ្វ្រង់ស៊ីស្កូនៅអាស៊ីស៊ី។

ការសម្តែងរបស់នាងបានគូសបញ្ជាក់ពីការអំពាវនាវរបស់មហាសន្និបាតក្នុងការក្លាយជាអ្នកកសាងស្ពាន និងបានអះអាងថា មនុស្សគ្រប់រូបសុទ្ធតែមានតួនាទីក្នុងបេសកកម្មរបស់ព្រះសហគមន៍។ សរុបមក ការសម្តែងវប្បធម៌ទាំងអស់បានបង្ហាញពីប្រធានបទរបស់មហាសន្និបាត «ការត្រាស់ហៅឱ្យមានការកែប្រែបែបស៊ីណូដាល និងបេសកកម្មធ្វើជាស្ពាន និងអ្នកកសាងស្ពាននៅអាស៊ី» ដោយបង្ហាញថា ការរួមដំណើរជាមួយគ្នា​​មិនត្រឹមតែត្រូវបានស្តែងចេញនៅក្នុងកិច្ចសន្ទនានិងការពិចារណាប៉ុណ្ណោះទេ ប៉ុន្តែតាមរយៈជំនឿរស់រវើក កិច្ចបម្រើ និងប្រពៃណីវប្បធម៌របស់ព្រះសហគមន៍មូលដ្ឋាននៅទូទាំងអាស៊ីផងដែរ៕