លោកអភិបាល៖ គ្រីស្តបរិស័ទ គឺត្រូវអធិដ្ឋាន ស្រឡាញ់ និង បម្រើ

លោកអភិបាលព្រះសហគមន៍កាតូលិកភូមិភាគភ្នំពេញបានត្រាស់ហៅបេក្ខជនចំនួន១៨៥នាក់ក្នុងភូមិភាគរបស់លោក ក្នុងសប្តាហ៍ទី១នៃរដូវអប់រំពិសេស ដើម្បីឲ្យពួកគាត់ទទួលពិធីជ្រមុជទឹកក្នុងឱកាសបុណ្យព្រះយេស៊ូមានព្រះជន្មរស់ឡើងវិញដ៏រុងរឿងខាងមុខនេះ។

បេក្ខជនទាំងនោះមកពីមណ្ឌលសកម្មភាពចំនួន១០ ក្នុងនោះរួមមាន ភ្នំពេញខាងជើង ភ្នំពេញខាងត្បូង ភ្នំពេញថ្មី តាខ្មៅ កំពត តាកែវ ព្រះសីហនុ ផ្លូវដ៏វិសុទ្ធ មេគង្គ និងបាសាក់។

កម្មវិធីនេះបានធ្វើពេញមួយថ្ងៃ កាលពីថ្ងៃទី១៧ ខែកុម្ភៈ នៅមជ្ឈមណ្ឌលភ្នំពេញថ្មី នារាជធានីភ្នំពេញ ចាប់ផ្តើមដោយមានសំណាក់ធម៌ណែនាំពេញមួយព្រឹកពីលោកអភិបាលអូលីវីយ៉េ ជ្មីតហស្លេ អំពីតួនាទីជាគ្រីស្តបរិស័ទ និងកិច្ចការងារដែលត្រូវអនុវត្តប្រចាំថ្ងៃ ហើយពេលរសៀលមានហាត់សម និងពិធីត្រាស់ហៅយ៉ាងឱឡារិកពីលោកអភិបាល។

ក្នុងសំណាក់ធម៌នេះ លោកអភិបាល ពន្យល់អំពីអគ្គសញ្ញាជ្រមុជទឹក គឺអ្នកទទួលពិធីនេះ ទទួលដង្ហើមថ្មីនៅក្នុង ព្រះវិញ្ញាណ។ លោកថា៖ «បងប្អូនមានសំណាង ដោយសារបានទទួលបទពិសោធធ្វើជាមនុស្សថ្មី ដែលមានលក្ខណៈដូចព្រះជាម្ចាស់ដែលពោរពេញដោយក្ដីស្រឡាញ់។»

លោកអភិបាលអូលីវីយ៉េ បានបង្ហាញចំណុច៣សំខាន់ៗ ដើម្បីអាចក្លាយជាគ្រីស្តបរិស័ទសកម្មក្នុងជីវិតរស់នៅប្រចាំថ្ងៃ ហើយត្រូវចារិកពាក្យទាំងនេះក្នុងជីវិត គឺអធិដ្ឋាន ស្រឡាញ់ និងបម្រើ។

លោកថា គឺត្រូវអធិដ្ឋានដូចព្រះយេស៊ូ ទោះបីស្ថិតនៅក្នុងការលំបាក សប្បាយ ឬទុក្ខព្រួយ ហើយត្រូវអធិដ្ឋានដោយមានពេលកំណត់ទាក់់ទងជាមួយព្រះជាម្ចាស់ជានិច្ច។ អធិដ្ឋានដូចព្រះនាងម៉ារី ដោយអធិដ្ឋានក្នុងចិត្ត និង អរគុណព្រះជាម្ចាស់ជានិច្ច។ អធិដ្ឋានដោយថ្វាយបង្គំដូចពួកហោរាចារ្យ ទោះមានឋានៈខ្ពស់ តែទៅរកព្រះយេស៊ូ និង ថ្វាយបង្គំព្រះឱរសដែលទន់ខ្សោយ។

ជាមួយគ្នានេះ លោកអភិបាលបានជំរុញឲ្យបេក្ខជនដែលត្រៀមខ្លួនទទួលអគ្គសញ្ញាជ្រមុជទឹកទាំងអស់ ត្រូវមានទំនាក់ទំនងជាមួយព្រះជាម្ចាស់ គឺត្រូវមកព្រះវិហារ។ លោកថា «យើងជាពន្លកថ្មី ត្រូវសម្រេចចិត្តមកព្រះវិហាររាល់អាទិត្យ។ យើងត្រូវមានទំនាក់ទំនងជាមួយព្រះសហគមន៍ គឺជួយគ្នាទៅវិញទៅមក។»

លោកអភិបាលបញ្ជាក់ថា យើងត្រូវធ្វើជាគ្រីស្តបរិស័ទសកម្ម មិនត្រឹមតែទៅវិហារអធិដ្ឋាន តែត្រូវបម្រើដោយបញ្ចេញសកម្មភាព។ លោកបានរំលឹកថា ក្នុងព្រះសហគមន៍មានក្រុមបម្រើជាច្រើន ដូចជា ពិធីបុណ្យ សង្គហៈ អប់រំជំនឿ កាយឫទ្ធិ រៀបផ្កា ធ្វើម្ហូប សម្អាតវិហារ។ល។ «សំខាន់យើងត្រូវយល់ថា យើងជាអ្នកបម្រើដោយចិត្តស្រឡាញ់។»

ក្នុងនោះដែរ លោកអភិបាល ជំរុញឱ្យលោកបូជាចារ្យក្នុងមណ្ឌលសកម្មភាពទាំងអស់ ធ្វើពិធីនានាឱ្យបេក្ខជន និង ស្នើសុំឱ្យពួកគេតមអាហារមួយថ្ងៃនៅរាល់ថ្ងៃសុក្រក្នុងរដូវអប់រំពិសេសនេះ។

ការតមអាហារប្រៀបដូចជាយើងបានចូលក្នុងវាលរហោស្ថានជាមួយព្រះយេស៊ូ កន្លែងដែលគ្មានទឹកគ្មានមនុស្ស មានតែដីខ្សាច់ ធាតុអាកាសក្ដៅ និងសត្វតិរច្ឆាន ជាកន្លែងពិបាក តែព្រះយេស៊ូនៅដើម្បីភ្ជាប់ទំនាក់ទំនងរវាងព្រះអង្គនិងព្រះបិតានៅក្នុងភាពស្ងៀមគ្មានអ្វីរំខាន តែត្រូវតស៊ូដោយអត់អាហារ ជម្រះចិត្តគំនិតជាមួយព្រះជាម្ចាស់។

ព្រះសហគមន៍កាតូលិកភូមិភាគភ្នំពេញ តែងប្រារព្ធពិធីត្រាស់ហៅបេក្ខជនឲ្យត្រៀមខ្លួនទទួលអគ្គសញ្ញាជ្រមុជទឹកឬហៅថា ជំហានទី២នេះ នៅសប្ដាហ៍ទីមួយនៃរដូវអប់រំពិសេស។

ម្យ៉ាងទៀត លោកអភិបាលរំលឹកថា ការចូលរួមរបស់មណ្ឌលសកម្មភាពទាំងដប់ ដោយមានគ្រូអប់រំជំនឿ បងធម៌ និងលោកបូជាចារ្យមួយចំនួន ជាសញ្ញាសម្គាល់ថា ព្រះសហគមន៍កំពុងមានជីវិតនិងរីកចម្រើន។ លោកថា «យើងគឺជាក្រុមពិសេស គឺជាថ្មដែលមានជីវិត ដោយសារព្រះសហគមន៍របស់យើងពីមួយថ្ងៃទៅមួយថ្ងៃសម្ដែងធម៌មេត្តាករុណាផង ការអធិដ្ឋានផង និងបម្រើផង។»

យុវ័ន មីកាអែល លាក់ លឿន អាយុ២០ឆ្នាំ ជានិស្សិតឆ្នាំទី៣ មកពីមណ្ឌលសកម្មភាពតាកែវ ឲ្យដឹងថា គាត់បានស្គាល់ព្រះសហគមន៍តាមរយៈក្រុមកុមារកាយឫទ្ធិ ក្នុងភូមិរបស់គាត់នៅគិរីវង់ខេត្តតាកែវ។ លឿននិយាយថា ក្នុងរយៈពេលនេះ គាត់នឹងខិតខំតមអាហារក្នុងរយៈពេល៤០ថ្ងៃនេះ និងរៀបចំខ្លួនដើម្បីក្លាយជាគ្រីស្តបរិស័ទ និងបម្រើព្រះសហគមន៍តាមអំណោយទានរបស់ខ្លួនមាន។ សព្វថ្ងៃនេះ លឿនកំពុងចូលរួមក្នុងក្រុមចម្រៀងរបស់ព្រះវិហារព្រះកុមារយេស៊ូបឹងទំពុននារាជធានីភ្នំពេញ។

យុវតីលឿង លីណា អាយុ២៣ឆ្នាំ មកពីខេត្តបន្ទាយមានជ័យ បានឲ្យដឹងថានាងស្គាល់ព្រះសហគមន៍តាំងពីឆ្នាំ២០១៩ តាមរយៈសាលាបណ្តុះបណ្តាលវិជ្ជាជីវៈដុនបូស្កូនាទីក្រុងភ្នំពេញ។ លីណាមកពីក្រុមគ្រួសារពុទ្ធបរិស័ទបានឲ្យដឹងទៀតថា ឪពុកម្តាយរបស់គាត់ មិនចង់ឲ្យមកទទួលពិធីនេះទេ ប៉ុន្តែនាងព្យាយាមពន្យល់អំពីបំណងរបស់ខ្លួន និងការសិក្សាអំពីជំនឿក្នុងរវាង៣-៤ឆ្នាំកន្លងទៅ ដែលធ្វើឲ្យនាងពេញចិត្តនឹងជីវិតជាគ្រីស្តបរិស័ទ។

យុវតីរូបនេះបានឲ្យដឹងថា ជីវិតរបស់នាងក្រោយពេលស្គាល់ព្រះជាម្ចាស់គឺមិនឯកោទៀតឡើយ។ លីណា៖ «ពីមុនពេលយើងអត់សប្បាយចិត្ត អត់មានអ្នកណាគេនៅជាមួយយើងទេ ប៉ុន្តែឥឡូវ ទោះបីយើងអត់សប្បាយចិត្តតែងតែមានព្រះជាម្ចាស់នៅជាមួយយើងនិងលើកទឹកចិត្ត។»

លីណាប្រាប់ទៀតថា នាងនឹងព្យាយាមធ្វើសកម្មភាពបង្ហាញជំនឿថ្មីទៅអ្នកនៅជុំវិញខ្លួន ជាពិសេសអំពីរបៀបរស់នៅជាគ្រីស្តបរិស័ទ។

ក្នុងពិធីត្រាស់ហៅ លោកអភិបាលបានហៅឈ្មោះរបស់បេក្ខជនម្នាក់ម្តងៗ ឲ្យមកខាងមុខអាសនៈ អមដោយបងធម៌របស់ពួកគេផង ហើយលោកបានលាបប្រេងលើដៃរបស់ពួកគេម្នាក់ៗ និងផ្តល់នូវកន្សែងពណ៌ស្វាយដែលពួកគេត្រូវបំពាក់នៅរៀងរាល់ពេលមកព្រះវិហាររហូតដល់ថ្ងៃបុណ្យជ្រមុជទឹក។

ក្នុងឆ្នាំ២០២៣កន្លងទៅ ព្រះសហគមន៍បានធ្វើអគ្គសញ្ញាជ្រមុជទឹកដល់មនុស្សពេញវ័យ និងកុមារសរុបប្រហែល៣៩៧ ដោយក្នុងនោះភូមិភាគបាត់ដំបងមានចំនួន ១៦៧នាក់ (មនុស្សពេញវ័យចំនួន៦០នាក់ និងកុមារចំនួន១០៧នាក់) ភូមិភាគកំពង់ចាម មានចំនួន១២៦នាក់ (ពេញវ័យចំនួន១០៤នាក់ កុមារចំនួន២២នាក់) និងភូមិភាគភ្នំពេញ ទិន្នន័យកំពុងដំណើរការ ដោយដឹងថាកាលពីពិធីត្រាស់ហៅបេក្ខជនក្នុងភូមិភាគភ្នំពេញ ដោយលោកអភិបាលអូលីវីយ៉េ ជ្មីតហស្លេនាពីថ្ងៃទី២០ កុម្ភៈ មានបេក្ខជនពេញវ័យចំនួន១០៤នាក់។

ព្រះសហគមន៍កាតូលិកនៅទូទាំងប្រទេសកម្ពុជា មានគ្រីស្តបរិស័ទសរុបប្រមាណ២ម៉ឺននាក់ក្នុងចំណោមប្រជាជនសរុប១៦លាននាក់៕

អត្ថបទដោយ៖ កែវ កញ្ញា