លោកអគ្គអភិបាលហ្វីលីពីនស្នើឲ្យបេសកជនកាតូលិកឌីជីថលអាស៊ី ចេះខ្សឹបប្រាប់សាធារណជនអំពីវត្តមានព្រះយេស៊ូនៅអាស៊ី

លោកអគ្គអភិបាល ជីលបឺត ហ្គាចេរ៉ា (Gilbert Garcera) ប្រធានសភាលោកអភិបាលកាតូលិក​ហ្វីលីពីនបានស្នើឲ្យក្រុមអ្នកបេសកជន​កាតូលិក​​ឌីជីថល និយាយនិងខ្សឹប​អំពីវត្តមាន​របស់​ព្រះគ្រីស្តដល់​អ្នកគាំទ្ររបស់ខ្លួន​​ក្នុងទ្វីបអាស៊ី ដោយ​ស្តាប់​ គោរពវប្បធម៌ និង​នាំសេចក្តីពិតនិង​សេចក្តីសង្ឃឹមដល់ពិភពឌីជីថល។

លោកអគ្គអភិបាលបានថ្លែងនៅក្នុងពិធីថ្វាយអភិបូជានៅក្នុងកិច្ចប្រជុំលើកដំបូងនៃក្រុមបេសកជន​​កាតូលិក​ឌីជីថលនៅអាស៊ី កាលពីថ្ងៃទី១១ ខែកញ្ញា​នៅស្ថានីយវិទ្យុវើរីតាសអាស៊ី​ នៅទីតំបន់​គេហ្សុន (Quezon) ប្រទេសហ្វីលីពីន​ថា រាល់ចំណងជើងអត្ថបទ រូបថត វីដេអូ ការបង្ហោះ និងរឿងរ៉ាវ សុទ្ធតែឆ្លុះបញ្ចាំងពីការជ្រើសរើស។

លោកបានជំរុញឱ្យអ្នកផ្សព្វផ្សាយ សួរខ្លួនឯងថា តើសំឡេងរបស់នរណាដែលត្រូវបានដាក់បញ្ចូល ហើយសំឡេងរបស់នរណាដែលនៅតែមិនត្រូវបានគេឮ។

លោកបានព្រមានកុំឱ្យចំនួននៃការចុចចូលមើល (clicks) ការចុចចូលចិត្ត (likes) និងអ្នកតាមដាន (followers) មកជំនួសការពិត ជាពិសេសនៅក្នុងបរិបទនៃការផ្សព្វផ្សាយព័ត៌មានមិនពិត និងព័ត៌មាន​ដែលបង្កើតឡើងដោយបញ្ញាសិប្បនិម្មិត។

លោកបានមានប្រសាសន៍ថា អ្នកផ្សព្វផ្សាយត្រូវផ្ទៀងផ្ទាត់មុននឹងផ្សព្វផ្សាយ ត្រូវស្តាប់មុននឹងវិនិច្ឆ័យ ត្រូវយល់ដឹងមុននឹងបកស្រាយ និងត្រូវផ្តល់បរិបទមុននឹងថ្កោលទោស។

លោកអគ្គភិបាលក៏​បានជំរុញឱ្យបេសកជន​​ឌីជីថលស្តាប់ជាពិសេស ជនក្រីក្រ ជនចំណាកស្រុក ជនជាតិដើមភាគតិច យុវជន និងសហគមន៍ផ្សេងទៀតដែលត្រូវបានគេមើលរំលង ឬមិនសូវទទួលបានការយកចិត្តទុកដាក់ ហើយចែករំលែកទស្សនៈរបស់ពួកគេបន្ត។

លោកបានមានប្រសាសន៍ថា មុននឹងយើងនិយាយអំពីមនុស្សម្នាក់ ចូររៀនស្តាប់ពួកគេសិន។

លោកក៏បានអំពាវនាវឱ្យអ្នកផ្សព្វផ្សាយក្លាយជាអ្នកផ្សារភ្ជាប់ទំនាក់ទំនងនៅក្នុងទ្វីបអាស៊ីដែលមានភាពចម្រុះ ដោយនិយាយការពិតដោយគ្មានការស្អប់ខ្ពើម ប្រឆាំងនឹងអយុត្តិធម៌ដោយមិនមើលងាយតម្លៃនៃភាពជាមនុស្សរបស់អ្នកដទៃ និងរិះគន់ដោយមិនបំផ្លាញសេចក្តីថ្លៃថ្នូររបស់មនុស្ស។

លោកបានមានប្រសាសន៍ថា រាល់វេទិកាឌីជីថលអាចក្លាយជាឧបករណ៍ទំនើបសម្រាប់ផ្សព្វផ្សាយដំណឹងល្អ។

លោកបានមានប្រសាសន៍ថា សូមឱ្យអ្នករាល់គ្នាបន្តក្លាយជាសំឡេងដែលនិយាយទៅកាន់អាស៊ី ជាសំឡេងដែលស្តាប់អាស៊ី និងជាសំឡេងដែលផ្តល់ក្តីសង្ឃឹមដល់អាស៊ី៕