អ្នកជំនាញផ្សព្វផ្សាយកូរ៉េខាងត្បូងអំពាវនាវឱ្យមានការផ្សព្វផ្សាយសាសនាដែលប្រើប្រាស់បច្ចេកវិទ្យាខ្ពស់ និងការប៉ះពាល់ផ្ទាល់ខ្ពស់

សង្គមឌីជីថលដែលមានការតភ្ជាប់ខ្ពស់របស់ប្រទេសកូរ៉េខាងត្បូងបង្ហាញពីឱកាសថ្មីៗ និងបញ្ហាប្រឈមថ្មីៗសម្រាប់កិច្ចផ្សព្វផ្សាយដំណឹងល្អ​ រួមទាំងតម្រូវការក្នុងការសម្របសម្រួលរវាងបច្ចេកវិទ្យាកម្រិតខ្ពស់ និងការទាក់ទងផ្ទាល់ជាមួយមនុស្ស នេះ​បើ​យោងតាមអ្នកសារព័ត៌មានជើងចាស់ និងជាបណ្ឌិត​ផ្នែកទំនាក់ទំនង។

បណ្ឌិតអាណា​ ជីនយ៉ុន យូ (Anna Jihyun You) ដែលជាអ្នកសារព័ត៌មានប្រព័ន្ធផ្សព្វផ្សាយ និងជាបណ្ឌិតផ្នែកទំនាក់ទំនងជនជាតិកូរ៉េខាងត្បូង បានគូសបញ្ជាក់ពីតម្រូវការនៃតុល្យភាពនេះក្នុងអំឡុងពេលកិច្ចពិភាក្សា «ការឈ្វេងយល់ពីការពិតនៅអាស៊ី» នៅថ្ងៃទី១១ ខែកញ្ញា ក្នុងការប្រជុំបេសកជនឌីជីថលកាតូលិកអាស៊ីលើកទី១ ក្នុងទីក្រុង Quezon City។

ការប្រជុំថ្ងៃទី១១-១៣ ខែកញ្ញា ដែលប្រារព្ធធ្វើឡើងនៅសាលប្រជុំ Pope John Paul II ក្នុងទីក្រុង Quezon City បានប្រមូលផ្តុំបេសកជនឌីជីថលកាតូលិក អ្នកទំនាក់ទំនង និងអ្នកបង្កើតមាតិកាពីគ្រប់តំបន់​នៅទូទាំងទ្វីបអាស៊ី ដើម្បីពិនិត្យមើលពីរបៀបដែលព្រះសហគមន៍​​អាចទំនាក់ទំនងជំនឿនៅក្នុងបរិយាកាសឌីជីថលដែលកំពុងកើនឡើង។

បណ្ឌិតអាណា បានចង្អុលបង្ហាញប្រទេសកូរ៉េខាងត្បូងថាជាករណីដ៏សំខាន់មួយ ដោយសារតែហេដ្ឋារចនាសម្ព័ន្ធបច្ចេកវិទ្យាកម្រិតខ្ពស់របស់ប្រទេស និងការប្រើប្រាស់ប្រព័ន្ធផ្សព្វផ្សាយឌីជីថលយ៉ាងទូលំទូលាយ។

លោកស្រីបានកត់សម្គាល់ថា ប្រហែល ៩៤ ភាគរយនៃជនជាតិកូរ៉េត្រូវបានប៉ះពាល់នឹងអ៊ីនធឺណិត ខណៈដែលប្រហែលពាក់កណ្តាលនៃចំនួនប្រជាជនប្រើប្រាស់បញ្ញាសិប្បនិម្មិត (AI)។ ប៉ុន្តែការតភ្ជាប់ឌីជីថលកម្រិតខ្ពស់មិនមានន័យ​ថា ជាការចូលរួមដ៏ជ្រាលជ្រៅរបស់មនុស្ស ឬសាសនានោះទេ។

លោកស្រី​អាណា បានសង្កេតឃើញថា មានតែសមាមាត្រតូចមួយគត់នៃគ្រីស្តបរិស័ទ​កាតូលិក​កូរ៉េដែលចូលរួមពិធីអភិបូជាថ្ងៃអាទិត្យជាប្រចាំ ដែលបង្កើតបានជាគម្លាតដ៏សំខាន់រវាងសមាជិកភាពរបស់ព្រះសហគមន៍ និងការចូលរួមក្នុងអគ្គសញ្ញា​នៃ​ជីវិត​ជំនឿ​របស់ខ្លួន។

សម្រាប់លោកស្រី តួលេខទាំងនេះបង្ហាញពីតម្រូវការនៃតុល្យភាព មិនត្រឹមតែរវាងប្រព័ន្ធផ្សព្វផ្សាយឌីជីថល និងប្រពៃណីប៉ុណ្ណោះទេ ប៉ុន្តែរវាងការតភ្ជាប់បច្ចេកវិទ្យា និងទំនាក់ទំនងមនុស្ស។

បទពិសោធន៍របស់កូរ៉េខាងត្បូងក៏បង្ហាញផងដែរពីភាពខុសគ្នារវាងការប្រើប្រាស់បច្ចេកវិទ្យាឌីជីថល និងការរស់នៅក្នុងបរិយាកាសឌីជីថល។ មនុស្សកាន់តែច្រើនប្រើប្រាស់ស្មាតហ្វូនមិនត្រឹមតែសម្រាប់ការទំនាក់ទំនងប៉ុណ្ណោះទេ ប៉ុន្តែថែមទាំងសម្រាប់ការទិញទំនិញ ការពិភាក្សា និងទិដ្ឋភាពផ្សេងៗជាច្រើនទៀតនៃជីវិតប្រចាំថ្ងៃ។

ជាមួយគ្នានេះ បណ្ឌិតអាណា បានព្រមានថា បរិយាកាសឌីជីថលអាចរួមចំណែកដល់ភាពឯកោ ជាពិសេសក្នុងចំណោមមនុស្សវ័យក្មេង។ ដូច្នេះ លោកស្រីបានសង្កត់ធ្ងន់លើសារៈសំខាន់នៃការរក្សាទំនាក់ទំនងមនុស្ស ទោះបីជាខិតខំទទួលយកបច្ចេកវិទ្យាថ្មីៗក៏ដោយ។ លោកស្រី​ផ្ទាល់បាននាំយកកំណត់ចំណាំសរសេរដោយដៃមកកាន់កិច្ចពិភាក្សា ដោយពិពណ៌នាការអនុវត្តនេះថាជាការរំលឹកពីទម្រង់ទំនាក់ទំនងចាស់ជាងនិងបែបអាណាឡូកជាង និងសារៈសំខាន់នៃការប៉ះពាល់ផ្ទាល់របស់មនុស្ស។

បញ្ហាប្រឈមសម្រាប់អ្នកផ្សព្វផ្សាយ​កាតូលិក លោកស្រីបានមានប្រសាសន៍ថា គឺការស្វែងរកតុល្យភាពដ៏ត្រឹមត្រូវ ដោយព្រះសហគមន៍​ត្រូវ​ទាក់ទងជាមួយមនុស្សដែលរស់ក្នុង​ពិភពឌីជីថល​ប្រចាំថ្ងៃ។ បច្ចេកវិទ្យាឌីជីថលផ្តល់នូវឱកាសដ៏សំខាន់សម្រាប់ការផ្សព្វផ្សាយអំពី​សាសនា ដែលអនុញ្ញាតឱ្យមនុស្សទទួលបានព័ត៌មាន និងផលិតមាតិកាក្នុងវិធីដែលពីមុនធ្លាប់ត្រូវបានកំណត់ចំពោះតែអង្គការប្រព័ន្ធផ្សព្វផ្សាយអាជីពប៉ុណ្ណោះ។ ប៉ុន្តែការទទួលបានឌីជីថលកាន់តែច្រើនមិនលុបបំបាត់តម្រូវការសម្រាប់ការជួបផ្ទាល់ជាមួយមនុស្សនោះទេ។

លោកស្រី បាន​គូសបញ្ជាក់ថា រឿងនេះ​នាំឱ្យមានការបែងចែករវាង «បច្ចេកវិទ្យាខ្ពស់» (high tech) និង «ការប៉ះពាល់ផ្ទាល់ខ្ពស់» (high touch) ដោយគូសបញ្ជាក់ពីតម្រូវការសម្រាប់ការទំនាក់ទំនងកាតូលិកក្នុងការប្រើប្រាស់ឧបករណ៍កម្រិតខ្ពស់ដោយមិនបាត់បង់វិមាត្រផ្ទាល់ខ្លួននៃការផ្សព្វផ្សាយសាសនា។

សម្រាប់បេសកជនឌីជីថលអាស៊ី បទពិសោធន៍របស់កូរ៉េខាងត្បូងផ្តល់នូវការព្រមានប្រឆាំងនឹងការស្មើគ្នារវាងភាពទំនើបនៃបច្ចេកវិទ្យា និងការផ្សព្វផ្សាយសាសនាប្រកបដោយប្រសិទ្ធភាព។ ព្រះសហគមន៍​អាចប្រើប្រាស់បញ្ញាសិប្បនិម្មិត ប្រព័ន្ធផ្សព្វផ្សាយសង្គម និងឧបករណ៍ឌីជីថលផ្សេងទៀតដើម្បីទៅដល់មនុស្ស ប៉ុន្តែគោលដៅចុងក្រោយនៅតែជាការជួបគ្នា និងការរួមដំណើររបស់មនុស្ស។

សាររបស់បណ្ឌិតអាណា បាន​ឆ្លុះបញ្ចាំង​ស្តីពីបញ្ហាប្រឈមដ៏សំខាន់មួយដែលកំពុងប្រឈមមុខនឹងបេសកកម្មឌីជីថលកាតូលិកទូទាំងទ្វីបអាស៊ីនោះ​គឺ នៅពេលដែលសង្គមកាន់តែមានការតភ្ជាប់បច្ចេកវិទ្យា ព្រះសហគមន៍​ត្រូវតែធានាថាវត្តមានឌីជីថលរបស់ខ្លួនត្រូវ​ពង្រឹង និង​ត្រូវ​ពង្រឹងផងដែរ​នូវ​​ទំនាក់ទំនងផ្ទាល់​​ដែលជាស្នូលភាព​ជា​សហគមន៍​គ្រីស្តបរិស័ទ​។

នៅក្នុងទ្វីបអាស៊ីដែលមានលក្ខណៈឌីជីថលកាន់តែខ្លាំងឡើង លោកស្រីបានស្នើថា ការផ្សព្វផ្សាយអំពី​សាសនាប្រកបដោយប្រសិទ្ធភាព ទាមទារមិនមែនត្រឹមតែ​ជ្រើសរើសរវាងបច្ចេកវិទ្យា និងការទាក់ទងផ្ទាល់ជាមួយមនុស្សនោះទេ ប៉ុន្តែជាការរៀនពីរបៀបរក្សាវាទាំងពីរចូលគ្នា៕