លោកអភិបាល ម៉ាសេលីណូ អេនតូនីញ៉ូ ជូនី ម៉ារ៉ាលីត (Marcelino Antonio “Junie” Maralit Jr.) ប្រធានការិយាល័យផ្សព្វផ្សាយនៃសភាលោកអភិបាលព្រះសហគមន៍កាតូលិកអាស៊ី (FABC-OSC) បានមានប្រសាសន៍ថា «ផ្លូវហាយវេឌីជីថលកំពុងរង់ចាំ» អស់អ្នកផ្សព្វផ្សាយនៃព្រះសហគមន៍។
លោកអភិបាលបានថ្លែងបែបនេះទៅកាន់បេសកជនកាតូលិកឌីជីថល ជាង ១០០នាក់ ដែលបានជួបជុំគ្នានៅប្រទេសហ្វីលីពីន ក្នុងឱកាសសន្និបាតបេសកជនកាតូលិកឌីជីថលអាស៊ីលើកទីមួយ។
លោកអភិបាល បានថ្លែងនៅថ្ងៃទី ១១ ខែកញ្ញា នៅឯសាលសន្និសីទសម្តេចប៉ាបយូហានប៉ូលទី២ នៅស្ថានីយវិទ្យុវើរីតាសអាស៊ី (RVA) ក្នុងតំបន់គេហ្ស៊ុន ( Quezon)ថា សន្និបាតនេះត្រូវបានរៀបចំឡើងដោយ RVA ដោយសហការជាមួយការិយាល័យផ្សព្វផ្សាយរបស់សភាលោកអភិបាលកាតូលិកអាស៊ី (FABC-OSC) ដើម្បីប្រមូលផ្តុំបេសកជនកាតូលិកឌីជីថល អ្នកផ្សព្វផ្សាយ និងអ្នកមានឥទ្ធិពលលើបណ្តាញសង្គមមកពីជុំវិញទ្វីបអាស៊ី។
លោកអភិបាលបាន ចង្អុលបង្ហាញពីការពិតដែលព្រះសហគមន៍កាតូលិកនៅទូទាំងតំបន់កំពុងប្រឈមមុខ និងចលនារបស់ មនុស្សម្នាកំពុងស្វែងរកនៅក្នុងសង្គមជីវភាពរស់នៅ ការស្វែងរកព័ត៌មាន បង្កើតទំនាក់ទំនង និងស្វែងរកអត្ថន័យនៃជីវិតនៅក្នុងពិភពឌីជីថល។
លោកបានមានប្រសាសន៍ថា «ការជជែកវែកញែកបានបញ្ចប់ហើយ។ ព្រះសហគមន៍កាតូលិកមានវត្តមាននៅទីនោះរួចហើយ»។
លោកបានសង្កត់ធ្ងន់ថា សំណួរមិនមែនថាតើព្រះសហគមន៍កាតូលិកគួរតែចូលទៅក្នុងពិភពឌីជីថលឬអត់នោះទេ ប៉ុន្តែគឺថាតើព្រះសហគមន៍កាតូលិកនឹងបង្ហាញខ្លួនក្នុងទម្រង់បែបណា នៅពេលដែលមនុស្សត្រូវការព្រះសហគមន៍។
លោកបានជំរុញឱ្យអ្នកចូលរួមផ្លាស់ប្តូរពីវិធីសាស្ត្រដែលផ្តោតតែលើការផលិតខ្លឹមសារនិងការវាស់វែងភាពជោគជ័យតាមរយៈចំនួនអ្នកមើល ការចុចចូលចិត្ត និងអ្នកតាមដាន។
សម្រាប់លោកអភិបាល ខ្លឹមសារឌីជីថលមិនគួរប្រើសម្រាប់តែបង្ហាញពីបុគ្គលិកលក្ខណៈរបស់អ្នកផ្សព្វផ្សាយ ឬបង្កើតម៉ាកយីហោនោះទេ វាគួរតែប្រើប្រាស់សម្រាប់ផ្សព្វផ្សាយដំណឹងល្អ៕
Daily Program
