តើនរណាជា ស្ហ៊ីហ្គឺរូ អ៊ីស្ហ៊ីបា ប្រមុខថ្មីនៃគណបក្សកាន់អំណាច និងជានាយក រដ្ឋមន្រ្តី ជប៉ុន?
លោកស្ហ៊ីហ្គឺរូ អ៊ីស្ហ៊ីបា ត្រូវបានបោះឆ្នោតជាប់ជាប្រមុខនៃគណបក្សសេរីភាពប្រជាធិបតេយ្យ (PLD) ដែលជាគណបក្សកាន់អំណាចនៅជប៉ុន នៅថ្ងៃទី២៧ ខែកញ្ញា ឆ្នាំ២០២៤។ បន្ទាប់ពីការប៉ុងប៉ងបរាជ័យបួនដង អ្នកយុទ្ធសាស្រ្តដ៏អាថ៌កំបាំង បានក្លាយជានាយករដ្ឋមន្រ្តីជប៉ុននៅថ្ងៃទី១ ខែតុលា ឆ្នាំ២០២៤។
ការតស៊ូរបស់លោកស្ហ៊ីហ្គឺរូ អ៊ីស្ហ៊ីបា ចុងក្រោយ នៅថ្ងៃទី២៧ ខែកញ្ញា ឆ្នាំ២០២៤ អាចឲ្យបុគ្គលអាថ៌កំបាំង ប៉ុន្តែមានឥទ្ធិពលលើឆាកនយោបាយជប៉ុនអាចកាន់តំណែងជាប្រមុខបក្សសេរីភាពប្រជាធិបតេយ្យ (PLD) ដើម្បីបន្តពីលោកនាយករដ្ឋមន្រ្តី ហ្វ៊ូមីញ៉ូ គីស្ហ៊ីដា។
អាយុ ៦៧ឆ្នាំ លោកអ៊ីស្ហ៊ីបា ដែលត្រូវបានគេស្គាល់សម្រាប់ភាពថ្នឹកនៅលើនយោបាយនៃសន្តិសុខ និងការពារជាតិ លោកមានវត្តមានលើកទី៥ សម្រាប់ការប្រឡងប្រជែងដើម្បីក្លាយជាប្រមុខនៃគណបក្សកាន់អំណាច។
នៅកម្រិតអន្តរជាតិ លោកស្ហ៊ីហ្គឺរូ អ៊ីស្ហ៊ីបា អំពាវនាវឲ្យមានការបង្កើតរបៀបដូចអង្គការណាតូនៅអាស៊ី។ នេះនឹងអាចធ្វើឲ្យចិនខឹងសម្បារ ប៉ុន្តែលោកនៅតែប្រុងប្រយ័ត្នសម្រាប់សំដីនេះចំពោះទីក្រុងប៉េកាំង។ លោកអ៊ីស្ហ៊ីបា ដែលនឹងដឹកនាំប្រទេសសេដ្ឋកិច្ចទី៤ នៅលើពិភពលោក គ្រាន់តែគាំទ្រថា ទាហានជប៉ុនគួរតែស្ថិតនៅក្នុងវិធានការដើម្បីប្រតិកម្មឲ្យកាន់តែខ្លាំងក្លា នៅក្នុងករណីមានការរំលោភលើដែនអាកាស ឬដែនទឹករបស់ខ្លួន។ លោកបានថ្លែងថា ៖ “សព្វថ្ងៃ វិធានការប្រកាន់យកដើម្បីព្រមានគឺជាជម្រើសតែមួយ ហើយប្រទេសចិនដឹងច្បាស់ណាស់អំពីរឿងនេះ”។
សម្រាប់នយោបាយក្នុងប្រទេស អ្នកដែលត្រូវបានគេចាត់ទុកជាយូរថាជាបុគ្គលទី២ និយាយថា លោកប្រាថ្នាប្រឈមមុខដោះស្រាយបញ្ហាលំបាករបស់សង្គម មានដូចជា កំណែទម្រង់សេដ្ឋកិច្ច កសិកម្ម និងបញ្ហាសន្តិសុខជាតិ។
លោកយូ អ៊ូជីយ៉ាម៉ា សាស្រ្តាចារ្យនយោបាយនៅសកលវិទ្យាល័យតូក្យូ បានបញ្ជាក់ថា ជាយូរមកហើយ លោកស្ហ៊ីហ្គឺរូ អ៊ីស្ហ៊ីបា បែរខ្នងដាក់ទំងន់ដ៏ធ្ងន់របស់គណបក្ស ជាឧទាហរណ៍ ដោយរិះគន់បើកចំហទៅលើនយោបាយនៃគណបក្ស PLD នៅក្រោមការដឹកនាំរបស់លោកស្ហ៊ីនហ្ស៉ អាបេ”។ លោកអ៊ូជីយ៉ាម៉ា បន្ថែមថា ប៉ុន្តែថ្មីៗនេះ លោកអ៊ីស្ហ៊ីបា បញ្ជេញមតិនៅលើសារសំខាន់ចាំបាច់សម្រាប់គណបក្សកាន់អំណាចក្នុងការបើកទំព័រថ្មីពាក់ព័ន្ធនឹងរឿងអាស្រូវនៅក្នុងកិច្ចការនយោបាយ និងហិរញ្ញវត្ថុ។ នេះធ្វើឲ្យលោកទទួលបានការពេញចិត្តច្រើន។
នៅអំឡុងយុទ្ធនាការដើម្បីក្លាយជាប្រមុខ PLD លោកស្ហ៊ីហ្គឺរូ អ៊ីស្ហ៊ីបា បានថ្លែងថា ៖ “ការងារប្រចាំជីវិតរបស់លោក គឺសន្តិសុខ ការបង្ការមហន្តរាយ និងការធ្វើឲ្យតំបន់ជនបទរស់ឡើងវិញ”។ ដូច្នេះ លោកអ៊ីស្ហ៊ីបា ផ្តល់យោបល់ឲ្យមានការបង្កើតទីភ្នាក់ងាររដ្ឋាភិបាលទទួលបន្ទុកការបង្ការគ្រោះមហន្តរាយធម្មជាតិនៅក្នុងប្រទេសនេះ មានពាក់ព័ន្ធនឹងគ្រោះរញ្ជួយដី ហើយជាញឹកញាប់ គ្រោះពីការវាយប្រហារដោយខ្យល់ព្យុះទីហ្វុង និងភ្លៀងលាយខ្យល់កួច។
មានប្រភពពីតំបន់ជនបទ តូតតូរី ដែលជាខេត្តដែលមានប្រជាជនតិចបំផុតនៅជប៉ុន លោកស្ហ៊ីហ្គឺរូ អ៊ីស្ហ៊ីបា យល់ថា វាជាកន្លែងដែលមានសារសំខាន់ក្នុងការធ្វើឲ្យជនបទជប៉ុនមានថាមភាពឡើងវិញ។ លោកស្ហ៊ីហ្គឺរូ អ៊ីស្ហ៊ីបា ចង់បង្កើនអត្រាកំណើតដ៏ទន់ខ្សោយរបស់ជប៉ុន ដោយប្រកាន់យកនូវវិធានការដូចជាបន្ថយម៉ោងធ្វើការដ៏វែងរបស់ជប៉ុន និងការពង្រឹងជំនួយសម្រាប់ឪពុកម្តាយជាដើម។
ក្នុងអំឡុងកិច្ចសន្ទនាតាមទូរទស្សន៍ លោកអ៊ីស្ហ៊ីបា បានថ្លែងថា ៖ “ប្រជាជនជប៉ុននឹងថយចុះយ៉ាងខ្លាំងក្លា។ ប្រសិនបើយើងមិនប្រកាន់យកនូវវិធានការដាច់ខាត សេដ្ឋកិច្ចនឹងមិនអភិវឌ្ឍទេ។ លោកមិនចង់ឲ្យ ជំនាន់អនាគតប្រឈមមុខសាជាថ្មីនៃបទពិសោធន៍នៃការបរាជ័យ និងឧបសគ្គដូចសព្វថ្ងៃទេ។
Daily Program
