គួរជួយគ្នាដើម្បីអភិរក្សរបស់ដែលយើងមានស្រាប់កុំអោយបាត់បង់
ដោយសារតែការខ្វះខាតសហគមន៍អភិវឌ្ឍន៍ទេសចរណ៍ប៊ូស្រា ដែលស្ថិតនៅភូមិពូចា ឃុំប៊ូស្រា ស្រុកពេជ្រាដា ខេត្តមណ្ឌលគិរី បានកំពុងអំពាវនាវរកថវិកាដើម្បីថែរក្សានិងអភិរក្សនូវវប្បធម៌មួយចំនួន នៅក្នុងសហគមន៍ ។
តាមលិខិតអំពាវនាវជាចំហរ សហគមន៍នេះបានលើកឡើងថា សហគមន៍កំពុងតែខ្វះខាត ថវិកាហើយកំពុងតែស្វែងរកដៃគូក៏ដូចជាអ្នកឧបត្ថម្ភ ដើម្បីថែរក្សានូវសិប្បកម្ម និងសិល្បៈបែបប្រពៃណីជនជាតិដើមភាគតិចមួយចំនួន។
ស្នាដៃ និងសំណល់វប្បធម៌ដែលកំពុងតែដង្ហោយរកការគាំទ្រគឺរួមមានដូចជា សិប្បកម្មតម្បាញ សាស់ សៀវ ចង្អេរ ឈ្នៀង និងកន្សែង ហើយដោយឡែកកិច្ចការសិប្បកម្មដែក ដែលជាកេរ្តិ៍ដំណែលរបរនិងផលិតផលពីបុរាណកាលបម្រើជីវភាពរបស់សហគមន៍ដូចជាឧបករណ៍ប្រើប្រាស់ប្រចាំថ្ងៃមាន កាំបិត កាតុហ្ស ដឹង ខ្វែងសម្រាប់ជម្រះស្មៅ រួមទាំងស្នាដៃសិល្បៈ និងវត្ថុបុរាណជនជាតិដើមភាគតិចនានា ក៏កំពុងតែដង្ហោយហៅរកជំនួយផងដែរ ។
ផ្អែកតាមការអំពាវនាវនេះយើងទាំងអស់គ្នាគួរតែនាំគ្នាជួយគាំទ្រ តាមរយៈការជំរុញការប្រើប្រាស់ផលិតផលទាំងនេះ ឫក៏ទិញវត្ថុទាំងនេះសម្រាប់កិច្ចការចិញ្ចឹមជីវិតផ្សេងៗកុំគិតតែប្រើប្រាស់របស់នាំចូល និង វត្ថុទំនើបៗពេក។ នៅក្នុងករណីយើងមិនប្រើប្រាស់ទេនោះ យើងក៏គួរតែអាចជួយទិញយកទៅដាក់ លំអរក៏បាន។
ក្រៅពីការជួយតាមរបៀបនេះ យើងទាំងអស់គ្នាក៏អាចនឹងជួយសហគមន៍តាមរយៈការចូលរួមនិងនាំគ្នាលេងកំសាន្តនៅសហគមន៍ហើយប្រើប្រាស់សេវាកម្មដែលបងប្អូនសហគមន៍នៅទីនោះ កំពុងតែប្រើប្រាស់របស់ទាំងនោះ ហើយអាចចំណាយថវិកាខ្លះចូលរួមជាការស្នាក់នៅ ហូបចុក និង ថ្លៃសេវាកម្មផ្សេងៗដល់សហគមន៍។
ម្យ៉ាងវិញទៀតយើងក៏អាចជួយជាការធ្វើសកម្មភាពស្វែងរកជំនួយឧបត្ថម្ភជាថវិកាដល់ពួកគេ ប៉ុន្តែតាមមធ្យោបាយនេះមិនមាននិរន្តភាពទេ អ្នកដែលពាក់ព័ន្ធ គួរតែណែនាំ ឬក៏ចុះសិក្សាស្វែងរកមធ្យោបាយធ្វើយ៉ាងណាអោយរបរនិងផលិតកម្មផលិតផលិតផលដែលពួកគេប្រកាសទាំងនេះអោយមានទីផ្សា នោះទើបនិរន្តភាព។
សរុបសេចក្តីទៅដើម្បីជួយពួកគេជំហានដំបូងគឺពួកគេពិតជាត្រូវការថវិកាបន្ទាន់មែន ដូច្នេះស្ថាប័នដែលជាម្ចាស់ជំនួយឫអ្នកដែលពាក់ព័ន្ធសប្បរសធម៌ ក៏ដូចជាមហាជនដែលមាន ធនធានគួរតែចូលរួមជួយគាំទ្រពួកគេ ហើយស្ថាប័នដែលពាក់ព័ន្ធគួរតែមានវិធានការរកវិធីជួយពួកគេបន្ថែមធ្វើយ៉ាងណាអោយពួកគេអាចរស់នៅពឹងអាស្រ័យនៅលើផលនៃការអភិរក្សវត្ថុនិងស្នាដៃដែលនៅសេសសល់ទាំងនេះ៕
Daily Program
![Livesteam thumbnail](/sites/default/files/inline-images/live-stream-thumb.jpg)