ទាហាននៃកងកម្លាំងអាកាសអ៊ុយក្រែនបានបញ្ជាក់កាលពីថ្ងៃចន្ទថាបានវាយប្រហារ យន្តហោះពីរគ្រឿងនៃទីបញ្ជាការព្រលានយន្តហោះរុស្ស៊ីនៅពីលើសមុទ្រ អាស្ស៉ូវ។ នេះជាការ វាយប្រហារដ៏ខ្លាំងលើរុស្ស៊ី នៅក្នុងតំបន់ដែលរុស្ស៊ីគឺជាអ្នកគ្រប់គ្រង។
បន្ទាប់ពីការប្រកាសអំពីការបំផ្លាញយន្តហោះ A-50 យន្តហោះឧបករណ៍ស៊ើបការណ៍ និងទីបញ្ជាការដ្ឋានព្រលានយន្តហោះ II-22 ដែលជាយន្តហោះ និងត្រូវបានប្រើប្រាស់ផងដែរ ជាប៉ុស្តបញ្ជាការរបស់រុស្ស៊ី អគ្គមេបញ្ជាការកងទ័ពអ៊ុយក្រែន លោកវ៉ាឡឺរី ហ្សាលូនី បានមានប្រតិកម្មថា លោកអរគុណកងទ័ពអាកាសសម្រាប់ប្រតិបត្តិការនេះ ដែលបានរៀបចំផែនការយ៉ាងល្អឥតខ្ចោះ និងប្រតិបត្តិការនៅក្នុងតំបន់សមុទ្រ អាហ្ស៉ូវ។
ទីប្រឹក្សាសម្រាប់សន្តិសុខជាតិនៃ ៨៣រដ្ឋ បានចូលរួមកាលពីថ្ងៃអាទិត្យ ទី១៤ ខែមករា នៅទីក្រុងដាវ៉ូស សម្រាប់ជុំទី៤ នៃការពិភាក្សាអំពីមូលដ្ឋាននៃសំណើរ ១០ចំនុច នៃប្រមុខរដ្ឋអ៊ុយក្រែនសម្រាប់សន្តិភាព ប្រកបដោយយុត្តិធម៌ និងចីរភាព នៅអ៊ុយក្រែន បន្ទាប់ពី ២ឆ្នាំ នៃការវាយប្រហារយោធាដោយរុស្ស៊ីក្នុងទ្រង់ទ្រាយធំ។
លោកអ៊ីញ៉ាហ្ស៊ីយ៉ូ កាស៊ី ទីប្រឹក្សាសហព័ន្ធនៅទីក្រុងដាវ៉ូស នៅអំឡុងសន្និសីទកាសែត បានថ្លែងថា ៖ ”គោលដៅគឺយើងរៀបចំដើម្បីយើងត្រៀមខ្លួន និងរឹងមាំដើម្បីបង្កើតដំណើរការចរចារជាមួយរុស្ស៊ី នៅពេលវេលាមកដល់”។ ប៉ុន្តែរដ្ឋមន្ត្រីស្វីសរូបនេះ បាននិយាយថា រហូតមកទល់ពេលនេះ ទាំងទីក្រុងគៀវ និងទីក្រុងមូស្គ មិនបានត្រៀមខ្លួនដើម្បីបោះជំហានទៅមុខទេ។ ប្រមុខរដ្ឋបាលនៃប្រធានាធិបតីអ៊ុយក្រែន លោកអេនឌ្រីអ៊ី ឡឺម៉ាក បានវាយតម្លៃថា កិច្ចពិភាក្សា មានការបើកចំហរ មានការស្ថាបនា និងលំអិត លើគោលការណ៍គន្លឹះដើម្បីឈានទៅដល់សន្តិភាពសកល យុត្តិធម៌ និងចីរភាពសម្រាប់អ៊ុយក្រែន។ ទោះបីជាយ៉ាងណា ការខ្វែងគំនិតគ្នាអំពីរបៀបដើម្បីបានដូច្នេះ នៅមាននៅឡើយ។
លោកអ៊ីញ៉ាហ្ស៊ីយ៉ូ កាស៊ី បានបញ្ជាក់អំពីសារសំខាន់នៃការចូលរួមសម្រាប់ការចរចារបស់ប្រេស៊ីល ឥណ្ឌា និងអាហ្វ្រិកខាងត្បូង ដែលស្ថិតនៅខាងរុស្ស៊ី នៅក្នុងអង្គការ Brics ហើយដែលមានកម្រិតនៃទំនុកចិត្តពិតប្រាកដសម្រាប់រុស្ស៊ី។ មន្រ្តីអ៊ុយក្រែនបាននិយាយថា ប្រទេសរបស់លោកសន្យារៀបចំកិច្ចប្រជុំកំពូលមួយចំនួនជាមួយរដ្ឋនានានៅអាហ្វ្រិក និងអាម៉េរិកខាងត្បូង ដើម្បីពន្យល់អំពីជំហររបស់អ៊ុយក្រែន។
កាលពីថ្ងៃអាទិត្យ មន្រ្តីអ៊ុយក្រែនបានអះអាងថា ប្រធានាធិបតីអ៊ុយក្រែន លោកវ៉ូឡូឌីមៀ ហ្សេឡេស្គី នឹងធ្វើទស្សនកិច្ចនៅស្វីស ចាប់តាំងពីថ្ងៃចន្ទទី១៥ ខែមករា។ ការប្រកាសនេះ កើតមានឡើងនៅខណៈដែលអ៊ុយក្រែនព្យាយាមអះអាងនូវការគាំទ្រដ៏មានទំនុកចិត្តពីសម្ព័ន្ធមិត្ត នៅពេលជិតដល់ខួប ២ឆ្នាំ នៃការឈ្លានពានរបស់រុស្ស៊ី។
ប្រធានាធិបតីអ៊ុយក្រែននឹងត្រូវចូលជួបប្រមុខសភាស្វីសទាំងពីរ មេដឹកនាំគណបក្ស ព្រមទាំងប្រធានាធិបតីស្វីស និងចូលរួមសន្និសីទសេដ្ឋកិច្ចពិភពលោកនៅទីក្រុងដាវ៉ូសផងដែរ។
ប្រមុខការទូតថ្មីរបស់បារាំង លោកស្តេហ្វាន សេហ្ស៊ូណេ និងសមាភាគីរបស់លោក អាឡឺម៉ង លោកស្រី អាណាឡឺណា ប៊ែរបូក ទាំងពីរបានអះអាងកាលពីថ្ងៃអាទិត្យអំពីឆន្ទៈរបស់ប្រទេសបារាំង និងអាឡឺម៉ងគាំទ្រអ៊ុយក្រែន ឲ្យបានយូរ តាមចាំបាច់ប្រឈមនឹងការវាយប្រហាររបស់រុស្ស៊ី។ លោករដ្ឋមន្រ្តីការបរទេសបារាំង បានបន្ថែមថា ៖ “នេះមានន័យថា យើងត្រូវរៀបចំនៅកម្រិតអឺរ៉ុបអំពីធាតុដំបូងៗ ដែលប្រាស្រ័យទាក់ទងគ្នាអំពីការការពារតម្លៃរបស់យើង និងប្រយោជន៍របស់យើង”។
កាលពីថ្ងៃចន្ទ អង្គការសហប្រជាជាតិ បានប្រកាសអំពីតម្រូវការ ៤,២ ពាន់លានដុល្លារ ដើម្បីជាជំនួយមនុស្សធម៌សម្រាប់អ៊ុយក្រែននៅឆ្នាំ២០២៤ និងដើម្បីជួយដល់ជនភៀសខ្លួនរាប់លាននាក់ ដែលបានចាកចេញពីប្រទេសចាប់តាំងពីការឈ្លានពានរបស់រុស្ស៊ី ជិត ២ឆ្នាំ។
Daily Program
