រុស្ស៊ីប្រកាសអំពីការធ្វើសមយុទ្ធនុយក្លេអ៊ែរ​ជិតអ៊ុយក្រែន និងគំរាមដាក់គោលដៅ​វាយប្រហារអង់គ្លេស

ប្រទេសរុស្ស៊ី បានប្រកាសកាលពីថ្ងៃទី៦ ខែឧសភា អំពីការរៀបចំ​សមយុទ្ធនុយក្លេអ៊ែរ​នៅជិត​អ៊ុយក្រែន និងបញ្ជាក់ថា កងកម្លាំងរបស់ខ្លួន​អាចនឹងវាយប្រហារគោលដៅយោធា​អង់គ្លេស នៅអ៊ុយក្រែន និងឆ្ងាយពីនេះ និងនិយាយថា នេះជាប្រតិកម្មតបនឹងសេចក្តីប្រកាសសង្រ្គាម​របស់មេដឹកនាំលោកខាងលិច។

ការគំរាមកំហែងទាំងនេះរបស់ទីក្រុងមូស្គូ កើតមានឡើងមុនមួយថ្ងៃ​នៃកម្ម​វិធីតែងតាំង​លោក​វ្លាឌីមៀ ពូទីន នៅវិមានក្រឹមឡាំង ដែលនឹងចាប់ផ្តើមជាផ្លូវការនូវ​អណត្តិទី៥ របស់លោក និង​ ៣ថ្ងៃ មុន​ការប្រារព្វពិធីបុណ្យ ៩ឧសភា នៅលើជ័យជម្នះ​របស់សហភាពសូវៀត ប្រឆាំងនឹង​អាឡឺម៉ងណាហ្ស៊ី ដែលជាកម្មវិធីរំឭកស្មារតីជាតិនិយមរបស់វិមានក្រឹមឡាំង។

ចាប់តាំងពីការវាយប្រហារក្នុងទ្រង់ទ្រាយធំ​ប្រឆាំងនឹងអ៊ុយក្រែន​នៅខែកុម្ភៈ ឆ្នាំ២០២២ ប្រធានាធិបតីរុស្ស៊ី លោកវ្លាឌីមៀ ពូទីន បានគំរាមក្តៅផងត្រជាក់ផង​អំពីលទ្ធភាពនៃការប្រើ​ប្រាស់អាវុធនុយក្លេអ៊ែរ។

ក្រសួងការពារជាតិរុស្ស៊ី បានអះអាងថា ដំណើរការបានឆ្លើយតបនឹងការគំរាមកំហែង​ដែល ថ្លែងដោយមេដឹកនាំលោកខាងលិចប្រឆាំងនឹងរុស្ស៊ី។ អ្នកនាំពាក្យវិមានក្រឹមឡាំង លោក​ឌីមីទ្រី ប៉េស្កូវ បានបញ្ជាក់ថា នេះគឺជាការឆ្លើយតបនឹងបំណង​បញ្ជូនទាហានចូលមក​ទឹកដីអ៊ុយក្រែន ដែល​​មានន័យថា ដាក់ទាហាន​ណាតូប្រឈមមុខនឹងទាហានរុស្ស៊ី។ លោក​បាន​​ចង្អុល​ទៅ​កាន់​លោក​អេម៉ានូអែល ម៉ាក្រុង ដែលត្រូវបានរិះគន់ថា បានប្រើវោហាសព្ទ​ប្រកប​ដោយ​គ្រោះថ្នាក់ ព្រមជាមួយអ្នកតំណាងរបស់អង់គ្លេស និងអាម៉េរិកផងដែរ។

ប្រធានាធិបតីបារាំងថ្មីៗ នេះ ក៏បានរំឭកអំពីលទ្ធភាព​បញ្ជូនកងកម្លាំងលោកខាងលិច មក​ដែន​ដី​​អ៊ុយក្រែន ប្រសិនបើ​ទីក្រុងមូស្គូវាយបែកខ្សែការ​ពារអ៊ុយក្រែន និងប្រសិនបើទីក្រុងគៀវ​ស្នើ​សុំ។ លោកបានបង្ហាញគំនិតនេះ កាលពីខែកុម្ភៈ ដែលបង្កបានជាការគិតអវិជ្ជមាន​នៅ​ក្នុង​ចំណោម សម្ព័ន្ធមិត្តសំខាន់ៗ របស់ទីក្រុងគៀវ។

ចំណែកមន្ទីរប៉ង់តាហ្គោន បានបរិហារលើអាកប្បកិរិយារបស់ទីក្រុងមូស្គូ។ លោកប៉ាត រីឌើ អ្នកនាំពាក្យ​មន្ទីរប៉ងតាហ្គូន បានថ្លែងថា ៖ “នេះគឺជាឧទាហរណ៍សំនួនវោហាសព្ទបំភ្លៃការពិត គ្មាន​ការទទួលខុសត្រូវ ដែលយើងបានឃើញពីខាងរុស្ស៊ី តាំងពីដើម។ នេះគឺមិន​សមរម្យ​ទាល់​តែ​សោះ​បើគិតទៅដល់ស្ថានភាពសន្តិសុខសព្វថ្ងៃ”។ ប៉ុន្តែ លោកបានបន្ថែមថា ៖ “សហរដ្ឋ​អាម៉េរិក​ពេលនេះ មិនបានពិនិត្យឃើញការផ្លាស់ប្តូរណាមួយនៅក្នុងការតាំងទីនៃ​កងកម្លាំង​យុទ្ធសាស្រ្ត​របស់រុស្ស៊ីទេ ប៉ុន្តែនឹងបន្តតាមដាន”។

យោងតាមក្រសួងការពារជាតិរុស្ស៊ី បានឲ្យដឹងថា សមយុទ្ធយោធារុស្ស៊ី​ដែល​បញ្ជាដោយ​លោក​វ្លាឌីមៀ ពូទីន រួមបញ្ចូលកងទ័ពអាកាស កងទាហានជើងទឹក និងកងកម្លាំងយុទ្ធ​ភូមិភាគ​ខាងត្បូង ដែលមានមូលដ្ឋាននៅជិតអ៊ុយក្រែន និងតំបន់ទឹកដីអ៊ុយក្រែន​ដែលទីក្រុង​មូស្គូ​អះអាងថា ជា​ឧបសម្ព័ន្ធរបស់ខ្លួន។

កាលបរិច្ឆេទ និងទីកន្លែងមិនទាន់ត្រូវបានបញ្ជាក់នោះទេ ក៏ដូចជាចំនួនទាហាន និង​យុទ្ធោបករណ៍ ដែលត្រូវចល័ត។ លទ្ធិនុយក្លេអ៊ែររុស្ស៊ី​គ្រោង​នឹងប្រើប្រាស់អាវុធនុយក្លេអ៊ែរ តែ​ក្នុង​ការការពារខ្លួនដាច់ខាត ក្នុងករណីដែលមានការវាយប្រហារ​លើរុស្ស៊ី​ជាមួយនឹងអាវុធ​បំផ្លិច​បំផ្លា​ញ​ធ្ងន់ធ្ងរ ឬក្នុងការឈ្លានពាន​ដោយការប្រើប្រាស់អាវុធធម្មតា និងដែលគំរាម​កំហែង​ដល់​ការ​រស់រានមានជីវិតរបស់រដ្ឋផង។

ទន្ទឹមពេលគ្នានេះ ដែរ ទីក្រុងមូស្គូ បានគំរាមកំហែងដាក់គោលដៅវាយប្រហារ​លើអង់គ្លេស នៅអ៊ុយក្រែន ឬលើសពីនេះ ប្រសិនបើទីក្រុងគៀវហ៊ានប្រើប្រាស់អាវុធ​ដែលផ្តល់ដោយ​ទីក្រុង​ឡុង​​ដើម្បីវាយប្រហារ​ដែនដីរុស្ស៊ី។