ប្រមុខក្រុមហាម៉ាស លោកអ៊ីស្មាអ៊ីល ហានីយ៉េ ត្រូវបានសម្លាប់កាលពីថ្ងៃពុធនៅទីក្រុងតេអេរ៉ង់ ប្រទេសអ៊ីរ៉ង់ នៅក្នុងការវាយប្រហារដែលនិយាយថាជាប់ពាក់ព័ន្ធនឹងអ៊ីស្រាអែលដោយចលនាអ៊ីស្លាមប៉ាឡេស្ទីន និងអ៊ីរ៉ង។ ប្រទេសទាំងពីរបានស្បថថា នឹងសងសឹកសម្រាប់ការស្លាប់របស់លោកហានីយ៉េ។ នៅខណៈដែលសង្រ្គាមនៅហ្គាហ្សាមិនមានថមថយ ការស្លាប់របស់មេដឹកនាំនយោបាយហាម៉ាស ធ្វើឲ្យមានការភ័យខ្លាចអំពីការរីកធំនៃជម្លោះ។
នៅខណៈដែលសង្រ្គាមរវាងក្រុមហាម៉ាស និងអ៊ីស្រាអែល នៅហ្គាហ្សា មានរយៈពេលជិត ១០ខែមកហើយ ភាពតានតឹងបានកើនឡើងទៀតនៅមជ្ឈិមបូព៌ា។ មេដឹកនាំនយោបាយក្រុមហាម៉ាស លោកអ៊ីស្មាអ៊ីល ហានីយ៉េ ត្រូវបានសម្លាប់នៅថ្ងៃពុធទី៣១ កក្កដា នៅទីក្រុងតេអេរ៉ង់ នៅក្នុងការវាយប្រហារដែលគេចោទប្រកាន់ថាជាស្នាដៃអ៊ីស្រាអែល។ នេះអាចនឹងពង្រឹងធាតុដែលធ្វើឲ្យចលនាអ៊ីស្លាមប៉ាឡេស្ទីនកាន់តែដាច់ខាត និងបង្កឲ្យមានការសងសឹងប្រឆាំងនឹងអ៊ីស្រាអែល។
កាលពីថ្ងៃពុធ ក្រសួងការបរទេសកាតា ដែលមេដឹកនាំហាម៉ាសមកស្នាក់នៅម្តងម្កាល បានថ្លែងថា ព្រឹត្តិការណ៍នេះអាចនឹងជ្រមុជតំបន់ទៅក្នុងចលាចល និងធ្វើឲ្យគ្រោះថ្នាក់ដល់ទស្សនវិស័យនៃសន្តិភាព។ នៅខណៈច្រើនខែមកហើយ ដែលអ៊ីស្រាអែល និងក្រុមហេបូឡា បានធ្វើសង្រ្គាមខ្លះៗ នៅភាគខាងជើងប្រទេសអ៊ីស្រាអែល និងភាគខាងត្បូងប្រទេសលីបង់ ព្រឹត្តិការណ៍ឃាតកម្មនេះ ធ្វើឲ្យភ័យខ្លាចការឆាបឆេះជាថ្មីថែមទៀតនូវសង្រ្គាមនៅក្នុងតំបន់។
នៅក្នុងសេចក្តីប្រកាសមួយរបស់កងកម្លាំង អាល់ កាសាម សាខាយោធាក្រុមហាម៉ាសដែលចោទលើអ៊ីស្រាអែល បានឲ្យដឹងថា ឃាតកម្មលើលោកអ៊ីស្មាអ៊ីល ហានីយ៉េ នឹងធ្វើឲ្យសង្រ្គាមឆ្លងទៅកម្រិតថ្មី និងមានវិបាកជាច្រើនសម្រាប់តំបន់ទាំងមូល។
លោកដាវីដ រីហ្គូឡេ រ៉ូហ្សេ អ្នកសិក្សាស្រាវជ្រាវសម្រាប់វិទ្យាស្ថានទំនាក់ទំនងអន្តរជាតិ និងយុទ្ធសាស្រ្ត និងជាអ្នកឯកទេសមជ្ឈិមបូព៌ា រំឭកថា ហានិភ័យនៃការឆាបឆេះសង្រ្គាមនៅមជ្ឈិមបូព៌ា លេចឡើងជាការពិតជាច្រើនខែមកហើយ។ អ្នកឯកទេសនិយាយសំដៅលើការបាញ់គ្រាប់រ៉ូកែតចេញពីប្រទេសលីបង់ទៅលើខ្ពង់រាបហ្គោឡង់ ដែលបានបង្កជាការសងសឹករបស់អ៊ីស្រាអែល។
នៅអ៊ីរ៉ង ប្រធានាធិបតីម៉ាសូដ ប៉េហ្សេសស្គៀន បានចោទប្រកាន់អ៊ីស្រាអែលថាបានសម្លាប់ លោកអ៊ីស្មាអ៊ីល ហានីយ៉េ។ នៅពេលចូលរួមពិធីបុណ្យសពនៅទីក្រុងតេអេរ៉ង លោកស្បថថានឹងធ្វើឲ្យអ៊ីស្រាអែលសោកស្តាយនឹងទង្វើនេះ។ នៅពេលគោរពវិញ្ញាណក្ខន្ធមេដឹកនាំដ៏ក្លាហាន ប្រធានាធិបតីអ៊ីរ៉ង បានថ្លែងថា សាធារណរដ្ឋឥស្លាមនឹងការពារបូរណភាពដែនដី កិត្តិយស មោទនភាព និងភាពថ្លៃថ្នូររបស់ខ្លួន និងធ្វើឲ្យជនឈ្លានពានជាភេរវករសោកស្តាយចំពោះទង្វើគ្មានសីលធម៌របស់ពួកគេ។ ចំណែកមេដឹកនាំកំពូលអ៊ីរ៉ង លោកអាយ៉ាតូឡា អាលី ខាម៉ឺណេ បានស្បថដោយដាក់ទណ្ឌកម្ម និងផ្តន្ទាទោសឲ្យធ្ងន់ធ្ងរសម្រាប់អ៊ីស្រាអែល។
លោកដាវីដ រីហ្គូឡេ រ៉ូហ្សេ វិភាគថា សេចក្តីថ្លែងការណ៍របស់មេដឹកនាំកំពូលរបស់អ៊ីរ៉ង បញ្ជាក់អំពីការនឹងប្រឈមមុខដ៏អាក្រក់របស់អ៊ីរ៉ងចំពោះអ៊ីស្រាអែល ជាពិសេសដោយសារ ការវាយប្រហារកើតឡើងលើទឹកដីអ៊ីរ៉ងផង។ នេះគឺជារឿងគ្រោះថ្នាក់ ដោយសារជនជាតិអ៊ីរ៉ងនឹងមិនអាចមិនឆ្លើយតបក្នុងរបៀបណាមួយណាស់។
ភាពតានតឹងរវាងអ៊ីរ៉ង និងអ៊ីស្រាអែល មានភាពរស់រវើកតាំងពីយូរណាស់មកហើយ ហើយវាក៏កើនឡើងតាំងពីប៉ុន្មានខែចុងក្រោយនេះដែរ។ កាលពីខែមេសា អ៊ីរ៉ង បានធ្វើការវាយបកប្រឆាំងនឹងកុងស៊ុលអ៊ីស្រាអែលនៅទីក្រុងដាម៉ាស និងបាញ់មីស៊ីលជាង ៣០០ គ្រាប់ និងដ្រូនលើអ៊ីស្រាអែល។ នេះគឺជាការវាយប្រហារផ្ទាល់ដែលដឹកនាំដោយសាធារណរដ្ឋឥស្លាមប្រឆាំងនឹងដែនដីអ៊ីស្រាអែល។
À lire au
Daily Program
