កាឌីណាល់ Kikuchi៖ «Synodality» គឺជាវិថីជីវិតដែលចាក់ឫសក្នុងសហគមន៍ មិនមែនត្រឹមតែជាទ្រឹស្តីនោះឡើយ

ការធ្វើ​ដំណើរ​រួមជាមួយគ្នា​ គឺហួសពីកម្មវិធីអរូបីមួយ វាគឺជាបទពិសោធន៍រស់រវើកនៃកិច្ចយកចិត្តទុកដាក់ និងការជួយជ្រោមជ្រែងគ្នាទៅវិញទៅមកនៅក្នុងសហគមន៍មូលដ្ឋាន។ នេះជាប្រសាសន៍របស់កាឌីណាល់ Tarcisio Isao Kikuchi អភិបាលព្រះសហគមន៍ក្រុងតូក្យូ និងជាអគ្គលេខាធិការនៃសភាលោក​អភិបាលព្រះសហគមន៍កាតូលិកអាស៊ី (FABC) ថ្លែងទៅកាន់អ្នកចូលរួម​​ក្នុងមហាសន្និបាតពេញអង្គលើកទី ១២ របស់​FABC។

កាឌីណាល់ Kikuchi បានដឹកនាំអភិបូជាបញ្ចប់ថ្ងៃបើកមហាសន្និបាត នាវេលាម៉ោង ៦:០០ ល្ងាច (ម៉ោងនៅឥណ្ឌូនេស៊ី) ដោយ​មាន​ការចូលរួមពី​​លោកអគ្គអភិបាល Francis Xavier Vira នៃក្រុងបាងកក ប្រទេសថៃ និងលោកអភិបាល Leandro Maria Alves នៃភូមិភាគ Baucau ប្រទេសទីម័រខាងកើត បានចូលរួមជាអ្នកសហការរៀបចំពិធីអភិបូជានេះផងដែរ។

អ្នកចូលរួមប្រមាណ ២០០ នាក់បានជួបជុំគ្នាក្នុងពិធីបុណ្យនេះ  ដែលប្រារព្ធឡើងក្រោមប្រធានបទ «ការត្រាស់ហៅ​ឱ្យមានការប្រែចិត្តគំនិតបែបស៊ីណូដាល និងបេសកកម្ម​ធ្វើជាស្ពាន និងជាអ្នកកសាងស្ពាននៅក្នុងទ្វីបអាស៊ី» ដែលមានអ្នកចូលរួម​ដូចជា កាឌីណាល់ អភិបាលព្រះសហគមន៍ លោកបូជាចារ្យ បព្វជិត បព្វជិតា តំណាងគ្រហស្ថ អ្នករៀបចំកម្មវិធី និងភ្ញៀវកិត្តិយសមកពីទូទាំងទ្វីប។ ក្នុងចំណោមអ្នកចូលរួមទាំងនោះ ក៏មានវត្តមានកាឌីណាល់ Ignatius Suharyo អភិបាលព្រះសហគមន៍ក្រុងហ្សាការតា និងលោកអភិបាល Antonius Subianto Bunjamin, OSC ប្រធានក្រុមប្រឹក្សាអភិបាលព្រះសហគមន៍កាតូលិកនៃប្រទេសឥណ្ឌូនេស៊ីផងដែរ។

កាឌីណាល់ Kikuchi បានកំណត់ទិសដៅយ៉ាងច្បាស់លាស់សម្រាប់ជំនួបនេះថា អត្តសញ្ញាណពិតប្រាកដរបស់ព្រះសហគមន៍ស្ថិតនៅលើរបៀបដែលសាសនិកជនរួមដំណើរជាមួយគ្នាក្នុងជីវិតប្រចាំថ្ងៃ។

«ការធ្វើ​ដំណើររួមជាមួយគ្នា​ មិនមែនជាទ្រឹស្តី ឬជាកម្មវិធីរបស់ព្រះសហគមន៍នោះទេ ប៉ុន្តែវាជាវិថីជីវិតដែលចាក់ឫសយ៉ាងជ្រៅនៅក្នុងសហគមន៍ដែលចេះយកចិត្តទុកដាក់ និងមើលថែទាំគ្នាទៅវិញទៅមក» នេះជា​ប្រសាសន៍​របស់កាឌីណាល់ Kikuchi។

គំរូជាក់ស្តែងពីកោះ Flores

ដោយផ្អែកលើការចុះទៅទស្សនកិច្ចនាពេលថ្មីៗនេះ នៅភូមិតូចមួយក្នុងតំបន់ Ende លើកោះ Flores នៃប្រទេសឥណ្ឌូនេស៊ី កាឌីណាល់បានចែករំលែកថា គម្រោងកសិកម្មសរីរាង្គមួយបានជះឥទ្ធិពលយ៉ាងជ្រាលជ្រៅដល់ការយល់ដឹងរបស់លោកអំពីស៊ីណូដាល។ ទោះបីជាមានធនធានមានកម្រិតក៏ដោយ លោកបានឃើញអ្នកភូមិរស់នៅដោយក្តីរីករាយ មានកិត្តិយស និងមានការជួយជ្រោមជ្រែងគ្នាយ៉ាងជ្រាលជ្រៅ។

ក្នុងនាមជាប្រធានអង្គការការីតាសអន្តរជាតិ កាឌីណាល់ Kikuchi បានចុះសង្កេតមើលគម្រោងមនុស្សធម៌ និងការអភិវឌ្ឍន៍ជាច្រើននៅជុំវិញពិភពលោក ប៉ុន្តែលោកបានកត់សម្គាល់ថា សហគមន៍ដ៏សាមញ្ញមួយនេះបានបន្សល់ទុកនូវការចងចាំយ៉ាងជ្រាលជ្រៅ ជាគំរូជាក់ស្តែងរបស់អត្ថន័យ «ការដើររួមគ្នា»។

លោកបានឆ្លុះបញ្ចាំងថា «សម្រាប់ខ្ញុំ នេះគឺជាស៊ីណូដាល ក្នុងទម្រង់ជាក់ស្តែង។ វាប្រាកដជានិមិត្តរូបនៃជីវិតសហគមន៍ដែលដើរទៅមុខជាមួយគ្នា ជួយជ្រោមជ្រែងគ្នាទៅវិញទៅមក និងបណ្តុះនូវក្តីសង្ឃឹម»។

ក្តីសង្ឃឹមដែលកើតចេញពីសកម្មភាពថ្នាក់មូលដ្ឋាន

នៅក្នុងទេសនា របស់លោក កាឌីណាល់ Kikuchi បានគូសបញ្ជាក់ថា ក្តីសង្ឃឹមពិតប្រាកដនៅក្នុងសង្គមមិនអាចបង្កើតឡើង ឬទិញយកបានឡើយ ប៉ុន្តែវាកើតឡើងដោយធម្មជាតិនៅពេលដែលមនុស្សទូទៅយកចិត្តទុកដាក់ចំពោះសុខទុក្ខរបស់គ្នាទៅវិញទៅមកយ៉ាងសកម្ម។

លោកបានកត់សម្គាល់ថា «ក្តីសង្ឃឹមមិនមែនជាអ្វីដែលយើងអាចទិញ ឬប្រគល់ឱ្យអ្នកដទៃបានដោយងាយនោះទេ។ ក្តីសង្ឃឹមចាប់កំណើតឡើងនៅពេលដែលយើងបានជួបមនុស្សដែលយកចិត្តទុកដាក់ចំពោះគ្នាទៅវិញទៅមកដោយស្មោះ» ។

ដោយឆ្លុះបញ្ចាំងពីចក្ខុវិស័យរួមនៃមហាសន្និបាត កាឌីណាល់ Kikuchi បានលើកទឹកចិត្តដល់អ្នកចូលរួមទាំងអស់ឱ្យប្រាកដថា ថ្ងៃនៃការអធិដ្ឋាន ការពិចារណា និងការសន្ទនានេះ នឹងនាំទៅរកការផ្លាស់ប្តូរថ្មីប្រកបដោយចីរភាពនៅតាមព្រះសហគមន៍ក្នុងស្រុកទូទាំងទ្វីបអាស៊ី។ លោកថា «យើងមិនអាចផ្លាស់ប្តូរពិភពលោកទាំងមូលក្នុងពេលតែមួយបានទេ។ យើងចាប់ផ្តើមចេញពីសហគមន៍ថ្នាក់មូលដ្ឋាន ជាមួយនឹងមនុស្សដែលចេះជួយគ្នាតាមលទ្ធភាព។ នោះហើយជាកន្លែងដែលក្តីសង្ឃឹមរីកចម្រើន ហើយក៏ជាកន្លែងដែលព្រះសហគមន៍ធ្វើជាសាក្សីនៃការដើររួមជាមួយគ្នា»។

សាររបស់លោកបានពង្រឹងយ៉ាងមុតមាំនូវការអំពាវនាវរបស់មហាសន្និបាត ឱ្យព្រះសហគមន៍នៅអាស៊ីទទួលយកការប្រែចិត្តគំនិតបែបស៊ីណូដាល ដោយពង្រឹងភាពរួមរស់ជាធ្លុងមួយ ការចូលរួម និងបេសកកម្ម  ខណៈពេលដែលដើរតួជាអ្នកកសាងស្ពានដ៏សំខាន់នៅក្នុងសង្គមដែលពោរពេញដោយភាពចម្រុះនៃវប្បធម៌ សាសនា និងសង្គម៕