កម្ពុជា-អាមេរិក ឯកភាពបន្តប្ដេជ្ញាពង្រឹងពង្រីកទំនាក់ទំនង និងកិច្ចសហប្រតិបត្តិការ ដើម្បីប្រយោ​ជន៍រួមសម្រាប់ជាតិ និងប្រជាជន នៃប្រទេសទាំងពីរ

​លោក Patrick Murphy ឯកអគ្គរដ្ឋទូតសហរដ្ឋអាមេរិកប្រចាំនៅព្រះរាជាណាចក្រកម្ពុជា បានចូលជួបសម្ដែងការគួរសម និងជម្រាបលា លោក ស សុខា ឧបនាយករដ្ឋមន្រ្តី រដ្ឋមន្រ្តីក្រសួង​មហាផ្ទៃ នា​ថ្ងៃទី១៥ ខែឧសភា ឆ្នាំ២០២៤។

ក្នុង​ជំនួបនោះ លោក ស សុខា បានថ្លែង​កោតសរសើរចំពោះអាណត្តិបេសកកម្ម និងកត់ស​ម្គាល់អំពីបុគ្គលិកលក្ខណៈជាអ្នកកាទូតរបស់ ឯកឧត្តមPatrick Murphy។ ​

លោកបានថ្លែងថា ៖ «ឯកឧត្តមPatrick Murphy បានដើរតួនាទីយ៉ាងសកម្ម ក្នុងការបន្តពង្រឹងនូ​វចំណងទំនាក់ទំនងការទូត​ដ៏យូរលង់ជាង៧ទសវត្សរ៍ រវាងកម្ពុជា និងអាមេរិក។ ឯកឧត្តមបាន​ខិតខំប្រឹងប្រែង​​ក្នុងនាមជាអ្នកការទូតដ៏​គួរជាទីគោរពប្រ​កបដោយចំណេះដឹង និងបទពិ​សោធន៍ជ្រៅជ្រះអំពីតំបន់អាស៊ី​ប៉ាស៊ីហ្វិក»។​​

ក្នុងនាមរាជរដ្ឋាភិបាលកម្ពុជា និងក្រសួងមហាផ្ទៃ ក៏ដូចជាប្រជាជនកម្ពុជា លោករដ្ឋមន្រ្តីមហាផ្ទៃ ក៏បានថ្លែងអំណរគុណ​ចំពោះការជួយឧបត្ថម្ភគាំទ្ររបស់សហរដ្ឋអាមេរិកក្នុងដំណើរការស្តា​រកសាង និងអភិវឌ្ឍរបស់កម្ពុជាក្នុងរយៈពេល៤០ឆ្នាំចុងក្រោយនេះ តាមរយៈទីភ្នាក់ងារអភិវឌ្ឍន៍អាមេរិក (USAID)។​

ជាមួយគ្នានោះដែរ លោក Patrick Murphy ក៏​បានថ្លែងអំណរគុណចំពោះការវាយតម្លៃរបស់លោក ស សុខា ក៏ដូចជាការគាំទ្រ និងការឆ្លើយតបយ៉ាងល្អរបស់រាជរដ្ឋាភិបាលកម្ពុជា ក្នុងការផ្តល់​កិច្ចការពា​រសន្តិសុខ និងសុវត្ថិភាព ដល់និវេសនដ្ឋានទូត និងពលរដ្ឋអាមេរិក ព្រមទាំងកិច្ចសហការយ៉ាងហ្មត់ចត់ជាមួយភ្នាក់ងារអនុវត្តច្បាប់អាមេរិក។ ​

លោក Patrick Murphy ក៏បានវាយតម្លៃខ្ពស់ចំពោះវឌ្ឍនភាពនៃកំណែទម្រង់វិមជ្ឈការ និងវិសហ​មជ្ឈការនៅក្នុងនីតិកាល ទី៧ នៃរដ្ឋសា ដែលបានប្រព្រឹត្តទៅប្រកបដោ​យតម្លាភាព។

ឯកអគ្គរដ្ឋទូតអាមេរិក ក៏បាន​បង្ហាញក្ដីសង្ឃឹមផងដែរថា​​កិច្ចសហប្រតិបត្តិការ​​អនុវត្តច្បាប់រវាងព្រះ​រាជាណាចក្រកម្ពុជា និងសហរដ្ឋអាមេរិក នឹងបន្តផ្ដល់លទ្ធផលប្រសើរជាបន្តបន្ទាប់ នាពេលខាងមុខ​ទៀត។​

​

ក្នុងជំនួបនេះផងដែរ ភាគីទាំងពីរបានអបអរសាទរចំពោះវឌ្ឍនភាព និងវាយតម្លៃខ្ពស់ចំពោះលទ្ធ​ផលប្រកបដោយផ្លែផ្កា នៅក្នុងអាណត្តិបេសកកម្មរបស់​ឯកអគ្គរដ្ឋទូត ហើយ​ភាគីទាំងពីរបានឯកភាពបន្តប្ដេជ្ញាពង្រឹងពង្រីកទំនាក់ទំនង និងកិច្ចសហប្រតិបត្តិការ ដើម្បីឧត្តមប្រយោជន៍រួមសម្រាប់ជាតិ និងប្រជាជន នៃប្រទេសទាំងពីរ៕