ក្រសួងការបរទេស និងសហប្រតិបត្តិការអន្តរជាតិនៃព្រះរាជាណាចក្រកម្ពុជា បានសម្តែងការស្វាគមន៍ចំពោះការតែងតាំងលោកស្រី Katrina Cooper ជាប្រធានគណៈកម្មការសម្រុះសម្រួល ដែលត្រូវបានបង្កើតឡើងក្រោមអនុសញ្ញាសហប្រជាជាតិស្តីពីច្បាប់សមុទ្រ (UNCLOS)។
ក្រសួងបានចេញសេចក្តីថ្លែងការណ៍នេះ បន្ទាប់ពីមានការប្រកាសដោយតុលាការអាជ្ញាកណ្តាលអចិន្ត្រៃយ៍ (PCA) ថា អ្នកសម្រុះសម្រួលទាំងបួនរូបបានតែងតាំងលោកស្រី Cooper ជាប្រធានគណៈកម្មការ ដែលត្រូវបានបង្កើតឡើងស្របតាមអនុសញ្ញា UNCLOS។
កម្ពុជាបានសម្តែងនូវកតញ្ញូតាធម៌ចំពោះលោកស្រី Cooper ដែលបានទទួលយកទំនួលខុសត្រូវដ៏សំខាន់នេះ និងបានចូលរួមជាមួយអ្នកជំនាញអន្តរជាតិឆ្នើមដទៃទៀតនៅក្នុងគណៈកម្មការ។ ព្រះរាជាណាចក្រកម្ពុជាក៏បានថ្លែងអំណរគុណផងដែរដល់អ្នកសម្រុះសម្រួលទាំងអស់ ចំពោះដំណើរការយ៉ាងម៉ត់ចត់ក្នុងការជ្រើសរើសប្រធានគណៈកម្មការ។
ក្រសួងបានពិពណ៌នាការតែងតាំងនេះថាជាជំហានដ៏សំខាន់មួយនៅក្នុងដំណើរការសម្រុះសម្រួលដែលផ្តួចផ្តើមដោយកម្ពុជា ដោយបានសម្តែងនូវទំនុកចិត្តថា ដំណើរការនេះនឹងផ្តល់ឱកាសក្នុងការដោះស្រាយការខ្វែងគំនិតគ្នាស្តីពីព្រំដែនសមុទ្រ និងសម្រួលដល់ការអភិវឌ្ឍធនធានប្រេង និងឧស្ម័នដ៏សំខាន់នៅក្នុងតំបន់ទាមទារត្រួតស៊ីគ្នា។
បើយោងតាមក្រសួង វឌ្ឍនភាពលើបញ្ហាទាំងពីរនេះកើតឡើងចំពេលវេលាដ៏សំខាន់សម្រាប់សន្តិសុខថាមពលក្នុងតំបន់។
រាជរដ្ឋាភិបាលកម្ពុជានៅតែបន្តប្តេជ្ញាចិត្តយ៉ាងពេញទំហឹងក្នុងការដោះស្រាយបញ្ហាសមុទ្រដោយសន្តិវិធី ស្របតាមច្បាប់អន្តរជាតិ ហើយនឹងបន្តដាក់ទំនុកចិត្តលើដំណើរការសម្រុះសម្រួលជាកាតព្វកិច្ចក្រោមអនុសញ្ញា UNCLOS។
គណៈកម្មការសម្រុះសម្រួលនេះ រួមមានអ្នកសម្រុះសម្រួលឯករាជ្យដែលត្រូវបានតែងតាំងដោយភាគីពាក់ព័ន្ធ។ កម្ពុជាបានតែងតាំងលោកអគ្គរាជទូត Peter Taksøe-Jensen និងលោកសាស្ត្រាចារ្យ Jean-Marc Thouvenin ខណៈដែលប្រទេសថៃបានតែងតាំងចៅក្រម Rüdiger Wolfrum និងចៅក្រម Albert Hoffmann។ បន្ទាប់មក អ្នកសម្រុះសម្រួលទាំងបួនរូបបានតែងតាំងលោកស្រី Cooper ជាប្រធាន ដោយមានការពិគ្រោះយោបល់ជាមួយភាគីទាំងពីរ។
ជាមួយនឹងការបង្កើតគណៈកម្មការសម្រុះសម្រួលនាពេលនេះ ដំណើរការនេះត្រូវបានរំពឹងថានឹងឈានទៅរកកិច្ចប្រជុំនីតិវិធីលើកដំបូងរបស់ខ្លួននៅក្នុងសប្តាហ៍ខាងមុខ។
Daily Program
