តើអ្វីជាការរីករាលដាលនៃវាលលំហ? អ្នកជំនាញសង្ឃឹមថា និន្នាការមហន្តរាយ នេះអាចនឹងបកក្រោយវិញ
កាលពីថ្ងៃទី២ ខែធ្នូ ប្រទេសនានានៅលើពិភពលោកទាំងមូល បានជួបប្រជុំនៅទីក្រុងរីយ៉ាដ ក្រោមការគាំទ្រពីកិច្ចព្រមព្រៀងនៃអង្កការសហប្រជាជាតិសម្រាប់ការប្រយុទ្ធប្រឆាំងនឹងការរីករាលដាលនៃវាលលំហ (CNULCD) និងដើម្បីពិភាក្សាអំពីមធ្យោបាយដើម្បីប្រែក្លាយដីពីធ្លាក់អន់ថយទៅជាដីមានជីជាតិឡើងវិញ។
វាប្រហែលជាគ្មានការសង្ស័យ បើមិនមានដីល្អ វាក៏មិនអាចមានជីវិតដែរ។ ដីផ្តល់ការចិញ្ចឹម ជំនាញ និងជាជម្រកសម្រាប់មនុស្សជាតិ។ ដីផ្តល់ការងារ គាំទ្រដល់មធ្យោបាយទ្រទ្រង់ជីវិត និងបង្កើតជាមូលដ្ឋានគ្រឹះនៃសេដ្ឋកិច្ចសង្គម ប្រទេសជាតិ និងពិភពលោក។ ដីចូលរួមសម្របសម្រួលអាកាសធាតុ និងមានសារសំខាន់ណាស់សម្រាប់ស្ថានជីវចម្រុះ។
ទោះបីជាវាមានសារសំខាន់សម្រាប់ជីវិតដូចដែលយើងដឹង ដីរហូតដល់ ៤០% នៃផ្ទៃដីពិភពលោកទាំងមូលកំពុងធ្លាក់អន់ថយគុណភាព។ នេះនឹងផ្តល់ផលប៉ះពាល់ដល់ប្រជាជនប្រមាណជា ៣,២ ពាន់លាននាក់ ឬប្រហែលជិតពាក់កណ្តាលនៃប្រជាជនពិភពលោក។
ភ្នំដែលត្រូវបានកាប់ឈើឡើងត្រងោលនៅប្រទេសហៃទី រហូតដល់ការបាត់បង់ជាបន្តបន្ទាប់នៃបឹងឆាតនៅតំបន់សាហែល ទ្វីបអាហ្រ្វិក និងការឡើងរីងខ្សោះនៃដីដែលដាំដុះបាននៅប្រទេសហ្ស៉កហ្ស៊ី ការធ្លាក់ថយគុណភាពរបស់ដីបានប៉ះពាល់គ្រប់តំបន់នៅលើពិភពលោក។
វាមិនមែនជាការពន្លើសទេដែលនិយាយថា អនាគតរបស់យើងផ្ទាល់ គឺស្ថិតនៅមាត់ជ្រោះ ប្រសិនបើដីរបស់យើងមិនមានសុខភាពល្អទេនោះ។
ការរីកសាយភាយនៃវាលលំហគឺជាដំណើរការនៃដីដែលធ្លាក់ថយគុណភាពនៅក្នុងតំបន់នានាដែលជួបគ្រោះរាំងស្ងួតជាទូទៅ។ នេះគឺជាលទ្ធផលនៃកត្តាជាច្រើន មានជាអាទិ៍ ការប្រែប្រួលអាកាសធាតុ និងសកម្មភាពរបស់មនុស្ស មានការធ្វើកសិកម្មហួសហេតុ និងការកាប់បំផ្លាញព្រៃឈើជាដើម។
ផ្ទៃដីប្រមាណ ១០០លាន ហិចតា ឬប្រមាណ ១លាន គម២ ឬទំហំស្មើនឹងប្រទេសអេហ្ស៊ីប ដែលជាដីមានគុណភាព និងផលិតកសិផលបាន បានខូចខាតជារៀងរាល់ឆ្នាំ។ ដីនៅលើផ្ទៃដីទាំងនេះ ដែលការដុះដាលរបស់វាអាចចំណាយពេលរាប់រយឆ្នាំ កំពុងត្រូវធ្លាក់ថយគុណភាព ជារឿយៗ ដែលបណ្តាលមកពីលក្ខខណ្ឌអាកាសធាតុខ្លាំងក្លាហួសហេតុ។
សីតុណ្ហភាពកើនឡើងដោយហេតុផលនៃការប្រែប្រួលអាកាសធាតុ។ នេះបង្កបានជាបាតុភូតឧតុនិយមហួសហេតុ មានជាអាទិ៍គ្រោះរាំងស្ងួត និងទឹកជំនន់។ ហើយទាំងនេះក៏ធ្វើឲ្យរឹតតែស្មុគស្មាញដល់ការងារដើម្បីរក្សាផលិតភាពរបស់ដី។
វាបានបង្ហាញយ៉ាងច្បាស់ថា ការថយចុះគុណភាពដី គឺពាក់ព័ន្ធនឹងការប្រឈមខាងបរិស្ថានដែលកាន់តែទូលំទូលាយដូចជា ការប្រែប្រួលខាងអាកាសធាតុដែរ។
ប្រព័ន្ធបរិស្ថានដីស្រូបយក ១/៣ នៃការបំភាយឧស្ម័នកាបូនិចរបស់មនុស្ស ដែលជាឧស្ម័នទទួលខុសត្រូវបង្កឲ្យមានការប្រែប្រួលអាកាសធាតុ។ ប៉ុន្តែ ការគ្រប់គ្រងមិនល្អនៃដីគំរាមដល់សមត្ថភាពស្រូបយកដ៏មានសារសំខាន់នេះ ដែលកាន់តែបំផ្លាញកិច្ចខិតខំប្រឹងប្រែងដើម្បីសំដៅពន្យឺតការសាយភាយនៃឧស្ម័នចង្រៃនេះ។
ការកាប់បំផ្លាញព្រៃឈើ ដែលចូលរួមចំណែកដល់ការរីករាលដាលនៃវាលលំហ មានកំណើនឡើង ជាមួយនឹងមានតែ ៦០% នៃព្រៃឈើពិភពលោកដែលមិនទាន់រងការប៉ះពាល់។ នេះគឺស្ថិតនៅក្រោមអ្វីដែលអង្គការសហប្រជាជាតិហៅថា គោលដៅសុវត្ថិភាពគឺរក្សាព្រៃឈើឲ្យនៅ ៧៥%។
ដំណឹងល្អ គឺថា មនុស្សអាចមានចំណេះដឹង និងអំណាចដើម្បីផ្តល់ជីវិតសាជាថ្មីដល់ដី ដោយប្រែក្លាយវាពីការចុះអន់ថយគុណភាពទៅជាដីស្តារឡើងវិញ។
Daily Program
