លោកអន់តូនីញ៉ូ ហ្គូទែរ៉េស អគ្គលេខាអង្គការសហប្រជាជាតិបានព្រមានថា ៖ “យើងដឹងអំពីការកើនលើសជាអចិន្ត្រៃយ៍នៃកម្រិតកំណត់នៃសីតុណ្ហភាពដែលវាមានន័យសំខាន់សម្រាប់ប្រជាជន និងភពផែនដី។” លោកបញ្ជាក់ដែរថា វិទ្យាសាស្រ្តជំរុញយើងឲ្យប្រតិកម្មសម្រាប់អាកាសធាតុ និងសេដ្ឋកិច្ចផងដែរ។
សន្និសីទនៃអង្គការសហប្រជាជាតិអំពីអាកាសធាតុ (COP30) នឹងប្រព្រឹត្តទៅនៅខែវិច្ឆិកានេះ នៅទីក្រុងបឺឡេម ប្រទេសប្រេស៊ីល ហើយក៏ជាឱកាសនៃការជួបជុំនៃមេដឹកនាំពិភពលោកជាច្រើន មេដឹកនាំសាជីវកម្ម និងតំណាងនៃអង្គការសង្គមស៊ីវិលផងដែរ។ វាក៏ជាឱកាសដ៏ប្រពៃសម្រាប់មេដឹកនាំនានានឹងបញ្ជាក់ឡើងវិញនូវការសន្យារបស់ពួកគេសម្រាប់ប្រឈមមុខតទល់នឹងវិបត្តិអាកាសធាតុ។
ទឹកជំនន់នៅអាស៊ីខាងត្បូង អគ្គីភ័យព្រៃនៅអាម៉េរិកខាងជើង និងកម្តៅជាកម្រិតឯកតកម្មនៅទ្វីបអឺរ៉ុប បានបង្ហាញភស្តុតាងនូវអ្វីដែលអ្នកវិទ្យាសាស្រ្តធ្លាប់បានបញ្ជាក់តាំងពីច្រើនឆ្នាំមកហើយ គឺការប្រែប្រួលអាកាសធាតុកាន់តែធ្ងន់ធ្ងរ និងកាន់តែលឿន ជាងការឆ្លើយតបខាងនយោបាយ។
អង្គការឧតុនិយមពិភពលោកនៃអង្គការសហប្រជាជាតិ បង្ហាញថា ឆ្នាំ២០២៤ គឺជាឆ្នាំដែលក្តៅបំផុតមិនដែលធ្លាប់មាន ប៉ុន្តែស្របពេលជាមួយគ្នា ទេសភាពនយោបាយអន្តរជាតិ បែរជាបន្តបែកបាក់ សហរដ្ឋអាម៉េរិកដែលជាអ្នកបំភាយឧស្ម័នផ្ទះកញ្ចក់ដ៏ធំបំផុតមួយ បានដកខ្លួនចេញម្តងទៀតពីកិច្ចព្រមព្រៀងទីក្រុងប៉ារីសអំពីអាកាសធាតុចាប់តាំងពីឆ្នាំ២០២៥។
អគ្គលេខាអង្គការសហប្រជាជាតិរំឭកថា ថាមពលស្អាត គឺជាប្រភពនៃការងារ កំណើន និងការអភិវឌ្ឍដោយចីរភាព។ លោកបានបញ្ជាក់ថា វាបង្កើតអគ្គីសនីដែលលឿនបំផុត និងមិនសូវថ្លៃ ការពារសេដ្ឋកិច្ចពីការប្រែប្រួលមិនទៀងទាត់នៃទីផ្សារឥន្ធនៈផូស៊ីល ធានាសុវត្ថិភាព និងអធិបតេយ្យភាពថាមពល និងចូលរួមផ្គត់ផ្គង់ថាមពលស្អាត និងអាចជាវប្រើប្រាស់បានសម្រាប់ទាំងអស់គ្នា”។ លោកបានកត់សម្គាល់ថា ទោះបីមានការឧបត្ថម្ភធនដ៏ខ្លាំងសម្រាប់ឥន្ធនៈផូស៊ីល ដែលធ្វើឲ្យទីផ្សារភាន់ច្រឡំ ប៉ុន្តែថាមពលស្អាតបានទទួលការវិនិយោគ ២ដង ធំជាងមុន លើសថាមពលឥន្ធនៈផូស៊ីលកាលពីឆ្នាំមុន។
លោកហ្គូទេរ៉េស បានបញ្ជាក់ថា ៖ ”ជាសេចក្តីសង្ខេប គឺភាពស្អាតមានការប្រកួតប្រជែងខ្ពស់ ហើយសកម្មភាពសម្រាប់អាកាសធាតុ គឺត្រូវតែធ្វើ។” លោកសន្និដ្ឋានដែរថា កិច្ចព្រមព្រៀងទីក្រុងប៉ារីសស្តីអំពីអាកាសធាតុ ឆ្នាំ២០១៥ បានធ្វើឲ្យស្ថានការណ៍ខុសពីមុន”។
តាំងពីអំឡុងរយៈពេល ១០ឆ្នាំ មុន ការកើនឡើងដែលត្រូវបានគ្រោងទុកសម្រាប់សីតុណ្ហភាពពិភពលោក បានធ្លាក់ចុះពីការកម្រិតមិនឲ្យកើនលើសពី 4 °C មកនៅត្រឹម 2,6 °C ។ ហើយប្រសិនការចូលរួមសព្វថ្ងៃដែលត្រូវបានកំណត់នូវកម្រិតជាតិ ត្រូវបានដាក់ឲ្យដំណើរការបានពេញលេញ ស្ថានភាពនឹងកាន់តែល្អប្រសើរ។
សម្រាប់សេចក្តីកត់សម្គាល់ដ៏មានសុទិដ្ឋិនិយមនេះ អគ្គលេខាអង្គការសហប្រជាជាតិបានវិនិច្ឆ័យថា ផែនការថ្មីៗ សម្រាប់ឆ្នាំ២០៣៥ ដែលនឹងទៅកាន់តែឆ្ងាយ និងកាន់តែលឿន គឺចាំបាច់។ បើតាមរូបលោក គេត្រូវធ្វើឲ្យសម្រេចនូវការកាត់បន្ថយដ៏សម្បើមនូវការបំភាយឧស្ម័នផ្ទះកញ្ចក់ ដើម្បីមិនឲ្យសីតុណ្ហភាពកើនលើសពី 1,5 °C ដោយគ្របដណ្តប់គ្រប់ការបំភាយ និងគ្រប់វិស័យ ព្រមទាំងបង្កើនល្បឿនការផ្ទេរថាមពលស្អាតដល់កម្រិតពិភពលោក។
លោកអន់តូនីញ៉ូ ហ្គូទែរ៉េស បានបញ្ជាក់ថា ប្រសិនបើគោលដៅទាំងនេះត្រូវបានសម្រេច យើងនឹងបង្កើតលក្ខខណ្ឌសម្រាប់ទស្សវត្សមួយដែលការងារអំពីអាកាសធាតុត្រូវបានបង្កើនល្បឿន។ ហើយការកាត់បន្ថយការកើនកម្តៅ គឺអាចទៅរួច។
Daily Program
