រាជរដ្ឋាភិបាលបើកឱកាសរើសពលទាហាន៣០០នាក់

ប្អូនៗនិស្សិត និងយុវជន​ ឱកាសប្រឡូកខ្លួននៅក្នុងខឿនការពារជាតិបានបើកចំហរហើយ ដូច្នេះសូមប្អូនៗរត្រៀមខ្លួនចុះឈ្មោះនិងឆ្លងកាត់ដំណើរការជ្រើសរើសតាមសមត្ថភាព និងតាមជំនាញរបស់ខ្លួន។

តាមលិខិតមួយដែលផ្សព្វផ្សាយដោយសារព័ត៌មាននានា បានឲ្យដឹងថា សម្តេចធិបតី ហ៊ុន ម៉ាណែត​ នាយករដ្ឋមន្រ្តី​កម្ពុជាបានចុះហត្ថលេខារួចហើយតាំងពីថ្ងៃទី ១០ ខែមេសា ឆ្នាំ២០២៥ ដើម្បីអនុញ្ញាតឲ្យក្រសួងការពារជាតិ​អាចជ្រើសរើសពលទាហានសរុបដល់ទៅ​៣០០ នាក់ សម្រាប់បំពេញ ក្របខណ្ឌឲ្យកងឯកភាពនានា តាមជំនាញនិងតាមចំណង់ចំណូលចិត្ត។

ប្អូនៗដែលគ្មានការងារធ្វើ​គួរតែសន្សំចំណេះវិជ្ជានិងហាត់ទេពកោសល្យក៏ដូចជាសមត្ថភាពដើម្បីត្រៀម​លក្ខណៈប្រលង​ជ្រើសរើស​ យកឱកាសមួយដែលស្របច្បាប់ដើម្បី​​បម្រើនិងការពារជាតិ។

តាមលិខិតនោះ ក្រសួងការពារជាតិផ្ដល់​ឱកាសចូលបម្រើការងារនៅបញ្ជាការដ្ឋាននៃកងទ័ពជើងអាកាសសរុបចំនួន ១០០ នាក់ ហើយនៅកងឯកភាពចំណុះបញ្ជាការដ្ឋានវិស្វកម្មអគ្គបញ្ជាការដ្ឋាន គឺមានចំនួន ១៥០ នាក់។ ក្រៅពីនោះ សម្រាប់មជ្ឈមណ្ឌលហ្វឹកហ្វឺនពហុសាសន៍ចំណុះមូលដ្ឋានសមុទ្ររាមកងទ័ពជើងទឹកគឺមានចំនួន ៣០ នាក់ និង វិទ្យាសា្ថនបញ្ជាការដ្ឋានសេនាធិការចំនួន ២០ នាក់។

តាំងពីរាជរដ្ឋាភិបាលអណត្តិទី៧ ចាប់ដំណើរការកន្លងមក គឺមានតែក្រសួងពីរទេដែលរាជរដ្ឋាភិបាលបើក​ឱកាសឲ្យជ្រើសរើសបុគ្គលិក គឺក្រសួងអប់រំ​យុវជន​និង​កីឡា  និងក្រសួងកសិកម្ម​រុក្ខាប្រម៉ាញ់និង នេសាទ ហើយក្រសួងការពារជាតិគឺជាក្រសួងទីបី។

នេះគឺជាឱកាសរបស់ប្អូនៗហើយ ដូច្នេះសូមត្រៀមខ្លួនហើយស្វះស្វែងរកឱកាសនេះបណ្តើរៗដើម្បីកុំឲ្យឱកាស​នេះ​រំលង​ទៅ។

នៅក្នុងករណីដែលប្អូនៗមានឱកាសបាន​ចូលរួម​បម្រើ​ជាតិ​ សូមត្រងត្រាប់ក្រេបជញ្ជក់នូវចំណេះនិងជំនាញ ដើម្បីធ្វើយ៉ាងណាប្រែក្លាយខ្លួនឲ្យទៅជាកម្លាំងស្រួចពោរពេញដោយសមត្ថភាព​ខ្ពស់ ត្រៀមខ្លួនជានិច្ច​ការពារជាតិស្របតាមច្បាប់និងបាវចនារបស់ជាតិ៕