តើសុខទុក្ខបងប្អូនវីរកងទ័ព១៨នាក់យ៉ាងណាទៅហើយពេលនេះ?

ដូចដែលក្រសួងការពារជាតិបានប្រកាសថ្ងៃនេះជា ថ្ងៃទី៧១ហើយ ដែលវីរកងទ័ពកម្ពុជាចំនួន១៨រូបដែលត្រូវបានចាប់ខ្លួន និងដាក់ឱ្យស្ថិតក្រោមការឃុំគ្រងរបស់យោធាថៃ នៅតែបន្តស្ថិតក្រោមការគ្រប់គ្រងរបស់ពួកគេដដែល ខណៈដែលក្រុមគ្រួសារនិងញាតិមិត្តរបស់ពួកគេ​នៅតែអន្ទះសារទន្ទឹងរង់ចាំ​ការវិលប្រឡប់របស់ពួកគេមកវិញ។​

នៅក្នុងនាមជាប្រជាពលរដ្ឋកម្ពុជា យើងខ្ញុំសូមចូលរួមជាមួយនឹងរាជរដ្ឋាភិបាល និង អាជ្ញាធរគ្រប់លំដាប់បន្ត អំពាវនាវឱ្យភាគីថៃ ដោះលែងពួកគាត់ត្រឡប់មកវិញឱ្យបានឆាប់រហ័សជាទីបំផុត ដើម្បីឱ្យពួកគាត់អាចវិលត្រឡប់មកជួបជុំក្រុមគ្រួសាររបស់ពួកគាត់ និងប្រកបដោយសុខសុវត្ថិភាព ស្របតាមច្បាប់មនុស្សធម៌អន្តរជាតិ។

តើភាគីថៃរក្សាទុកពួកគេទាំង១៨នាក់ដើម្បីអ្វី ខណៈពេលនេះភាគីទាំងពីរបាន​កំពុងតែអនុវត្ត​បទឈប់បាញ់​ហើយស្ថានភាពព្រំដែនទោះបីជានៅមានភាពតានតឹង ទំនាស់មិនទាន់ដោះស្រាយ ប៉ុន្តែភាគីទាំងពីរក៏បានកំពុងតែអនុវត្តបទឈប់បាញ់។​

នៅក្នុងនាមជាអ្នករង់ចាំ​៧១​ថ្ងៃ ដូចជា៧១ឆ្នាំដូច្នេះដែរ។ ពួកគេមិនបានប្រពឹត្តកំហុសអ្វីទាំងអស់​  ហេតុអ្វីបានជាបន្តឃុំឃាំងពួកគេធ្វើអ្វីទៀត ហើយតើភាគីថៃចង់ដាក់ឲ្យពួកគេនៅក្រោម​ការគ្រប់គ្រងដែលមិនមានសេរីភាព បែកពីប្រពន្ធពីកូន ពីក្រុមគ្រួសារបស់ពួកគេធ្វើអ្វីបន្តទៀត​។​

នៅក្នុងករណីបែបនេះ សូមផ្តល់ព័ត៌មានបច្ចុប្បន្នភាព​អំពីសុខទុក្ខពួកគេមកខាងកម្ពុជា ដើម្បីយកទៅជំរាបព័ត៌មានដល់​គ្រួសារមកសាច់ញាតិពួកគេខ្លះផង ដើម្បីកុំអោយក្រុមគ្រួសារពួកគេ​បន្តឈឺចាប់រង់ចាំពេលវេលានៃការវិលត្រឡប់របស់ពូកគេ​ដោយគ្មានដំណឹង។​

សូមភាគីថៃកុំឃាត់ខ្លួនពួកគេ ហើយឃុំឃាំងពួកគេបន្តទៀតអី ហើយប្រជាពលរដ្ឋកម្ពុជា​គ្រប់រូបសូមកុំបំភ្លេចពួកគេ  ហើយបន្តការចូលរួមជាមួយ​នឹងរាជរដ្ឋាភិបាល​និងក្រសួងការពារជាតិ ដែលបានកំពុងតែធ្វើកិច្ចខិតខំប្រឹងប្រែងតាមគ្រប់យន្តការនៅក្នុងការអនុវត្តនូវកិច្ចព្រមព្រៀងបទឈប់បាញ់​ ហើយខិតខំអត់ធ្មត់គ្រប់យ៉ាង ដើម្បីសន្តិភាពនិងប្រក្រតីភាពរវាងប្រទេសទាំងពីរ។​

នៅក្នុងនាមជាពលរដ្ឋនៅក្នុងដំណាក់កាលនេះ សូមបន្តចូលរួមជាមួយនឹង រាជរដ្ឋាភិបាល​ដែលបាន កំពុងធ្វើការយ៉ាងសស្រាក់សស្រាំឥតឈប់ឈរ នូវគ្រប់យន្តការដោះស្រាយទាំងអស់លើ​ករណីនេះ ដើម្បីឱ្យភាគីថៃ ដោះលែងពួកគមកវិញ ឱ្យបានឆាប់ និងដោយសុខសុវត្ថិភាព។ សូមកុំបំភ្លេចពួកគេ !