ចំណង​អាពាហ៍ពិពាហ៍គួរតែថែរក្សា និងដើរដល់ចុងបញ្ចប់នៃជីវិត!

ក្តីស្រលាញ់របស់មនុស្សមានច្រើនប្រភេទច្រើនយ៉ាង ប៉ុន្តែក្តីស្រលាញ់ដែលមានលក្ខណៈជាភេទសម្ព័ន្ធគួរតែជាចំណងដែលបុរស និងនារីគួរតែថែរក្សានិងបំប៉នរហូតដល់ទីអវសាន្តនៃជី​វិត រៀងៗខ្លួន។​

ក្តីស្រលាញ់អាចចាត់ទុកថា ជាសភាវគតិពីព្រោះតាំងពីកើតមករហូតដល់ស្លាប់ទៅវិញមនុស្សណាក៏ចេះយំ ចេះសើច ចេះកើតទុក្ខនិងចេះសប្បាយរីករាយ ហើយក្តីស្រលាញ់ក៏ដូចគ្នា។ ក្តីស្រលាញ់នេះ ត្រូវបានគេអះអាងថា វាមាននៅក្នុងញាណរបស់មនុស្សតាំងពីនៅក្នុងផ្ទៃ ហើយចេញពីផ្ទៃពោះមកម្ល៉េះ។

នៅពេលចេញពីផ្ទៃពោះទារកក៏សន្សំក្តីស្រលាញ់មាតាបិតា អាណាព្យាបាល សាច់ញាតិ ហើ​យ​ដល់ចំរើនវ័យធំបន្តិចក៏ចាប់ផ្តើមមានក្តីស្រលាញ់ក្តីស្អប់​ច្រណែនទន្ទឹមគ្នា ហើយនៅក្នុងនោះក្តីស្រលាញ់នេះក៏បន្តរីកចំរើនដល់ស្រលាញ់មិត្តភក្ដិ រហូត​ដល់រូបរាងកាយពេញវ័យ ដែ​លគេហៅថា ពេញកម្លោះក្រមុំនោះ ក៏ចាប់ផ្តើមមានគំនួចចិត្តជាក្តីស្រលាញ់តាមបែបភេទសម្ព័ន្ធ។​

ក្តីស្រលាញ់ភេទសម្ព័ន្ធនេះ ប្រសិនបើមនុស្សមិនមានការអប់រំតាមផ្លូវសីលធម៌ វប្បធម៌ ប្រ​ពៃណីទំនៀមទម្លាប់ និងច្បាប់របស់ប្រទេសជាតិទេនោះគឺពិតជាពិបាកមានព្រំដែនណាស់ គឺវាដូចជាសត្វដូច្នេះដែរ។​

ក្តីស្រលាញ់តាមភេទសម្ព័ន្ធជាសត្វនេះ គឺដឹងតែត្រូវការនៅពេលដែលវាដល់ខែដល់ឆ្នាំដល់ពេលវេលា​របស់វា ប៉ុន្តែមនុស្សយើងខុសពីសត្វពីព្រោះយើង​មាន​មនសិការ ចេះត្រិះរិះ​ពិចារណា​និង​ថ្លឹងថ្លែង​។

ព្រះជាម្ចាស់​បាន​បង្កើត​មនុស្ស​ជាបុរសនិង​ស្ត្រី​ ឲ្យមានលក្ខណៈដូច​ព្រះអង្គ (កណ១,២៧) ព្រះអង្គ​បាន​ឲ្យគេ​បង្កើត​កូនចៅ​បន្ត​ពូជពង្ស​រហូតមកដល់​សព្វថ្ងៃនេះ។ ព្រះអង្គ​បាន​ឲ្យ​ពួកគេ​ចេះ​ស្មោះត្រង់​នឹងគ្នាទៅវិញទៅមក បង្កើត​គ្រួសារ​ដោយ​មានសុភមង្គល។

ចំណង​មេត្រីភាព​ដែលព្រះជាម្ចាស់​បាន​ចង​ជាមួយមនុស្ស​បាន​បន្ត​អស់កល្បជានិច្ច។ ដូច្នេះ​ប្តី​និង​ប្រពន្ធ​ត្រូវ​រក្សា​សម្ព័ន្ធ​ភាព​នេះ​។ អ្នកដែល​បំបែក​បំបាក់​សម្ពន្ធមេត្រីនេះ នឹង​ត្រូវ​រងទុក្ខទោស​ជាមិន​ខាន ព្រោះនេះ​ជា​អំពើ​បាប។

ផ្អែកតាមចំណុចទាំងនេះ យើងទាំងអស់គ្នាគួរតែរិះគិតអោយច្បាស់លាស់ ជាពិសេសនៅមុនពេលចាប់ដៃគ្នាចងសម្ព័ន្ធនៃក្តីស្រលាញ់តាមទំនាក់ទំនងជាភេទសម្ព័ន្ធនេះ។​

តាមកត្តាសង្គម និងប្រពៃណីក៏ដូចជាវប្បធម៌របស់ជាតិសាសន៍ខ្មែរគឺអោយតម្លៃ និងពូនជ្រុំចំណងមេត្រីលើក្តីស្រលាញ់តាមភេទសម្ព័ន្ធនេះខ្លាំងណាស់ ដូច្នេះនៅមុនពេលដែលសម្រេចចិត្តចងសម្ព័ន្ធភាពក្តីស្រលាញ់បែបនេះគួរតែសិក្សា និងថ្លឹងថ្លែងមើលចិត្តមើលថ្លើមគ្នាអោយ​ច្បាស់លាស់កុំឃើញភ្លាមចាប់ចិត្តពូនមេត្រីភ្លាមៗ​ បន្ទាប់​មក​ក៏បែកបាក់គ្នា។

សរុបមកវិញសូមលើកកំពស់និងថែរក្សាពូនជ្រុំភេទសម្ព័ន្ធនេះ​អោយបានគត់មត់ ហើយ​ដៃគូ ត្រូវ​ចេះ​សហការគ្នា ដើម្បី​រិះរក​ផ្លូវ​ទៅកាន់សុភមង្គល៕