«រួមគ្នាឆ្លើយតបការទូន្មានរបស់សម្តេចប៉ាប ដើម្បីឆ្ពោះទៅការផ្លាស់ប្តូរទម្លាប់ និងថែរក្សាភពផែនដីដោយពង្រឹងភូមិភាគបៃតង» ជាប្រធានបទដែលបានលើកឡើងក្នុងកិច្ចប្រជុំភូមិភាគបៃតង កាលពីថ្ងៃទី២២ ខែឧសភា ឆ្នាំ២០២៤។
សិក្ខាកាមដែលបានចូលរួមកិច្ចប្រជុំនេះ មានប្រមាណជាង ៦៧នាក់ ដែលមកពីបណ្តាអង្គការ មណ្ឌល និងព្រះសហគមន៍នានាក្នុងភូមិភាគបាត់ដំបង។
កម្មវិធីនេះរៀបចំឡើងដោយ អង្គការករុណាបាត់ដំបង អង្គការជេស្វីតសឺវីសកម្ពុជា ដោយរួមសហការជាមួយនឹងព្រះសហគមន៍ភូមិភាគបាត់ដំបង ក្រោមអធិបតីភាពលោកអភិបាលទេព ច័ន្ទពិសិដ្ឋ អភិបាលភូមិភាគបាត់ដំបង លោកឪពុកព្រីយ៉ាឌី ហ្គ្រេហ្គោរីអូស (ហ្គ្រិច) ទទួលខុសត្រូវខាងផ្នែកបរិស្ថាននៃភូមិភាគបាត់ដំបង លោកបូជាចារ្យ បងប្រុសបងស្រី អ្នកណែនាំតាម មណ្ឌល អង្គការ និងព្រះសហគមន៍នានាក្នុងភូមិភាគបាត់ដំបង រួមនឹងព្រះសង្ឃនិមន្តមកចូលរួមដើម្បីធ្វើពិធីបំបួសដើមពោធិ៍នៅខាងមុខព្រះវិហារផងដែរ។
ជាកិច្ចចាប់ផ្តើម លោកឪពុកព្រីយ៉ាឌី ហ្គ្រេហ្គោរីអូស (ហ្គ្រិច) បានណែនាំដោយលើកឡើងអំពីផលប៉ះពាល់បរិស្ថានដោយសារកាប់បំផ្លាញព្រៃឈើ ការប្រើប្រាស់ប្លាស្ទិក និងការបំពុលបរិស្ថានតាមរូបភាពផ្សេងៗ។
លោកឪពុកបានថ្លែងបញ្ជាក់ថា ៖ «យើងមិនគ្រាន់តែស្តាប់ និងនិយាយប៉ុណ្ណោះ ប៉ុន្តែសូមឱ្យបងប្អូនអនុវត្តនៅតាមអង្គការ មណ្ឌល និងព្រះសហគមន៍ផងដែរ។ បរិស្ថានស្អាតផ្តើមចេញពីយើងម្នាក់ៗចូលរួមសកម្មភាពថែរក្សា និងលុបបំបាត់ការប្រើប្រាស់ប្លាស្ទិក»។
ជាមួយគ្នានោះដែរ លោកអភិបាលទេព ច័ន្ទពិសិដ្ឋ ក៏ថ្លែងពន្យល់អំពីពាក្យ «ឡោដោតូស៊ី» ដែលមានន័យថា «កោតសរសើរព្រះជាអម្ចាស់» ដែលទ្រង់បានបង្កើតស្នាព្រះហស្ថដ៏អស្ចារ្យសម្រាប់មនុស្សទាំងអស់ដែលរស់នៅលើផែនដីនេះ។
លោកអភិបាលបានមានប្រសាសន៍ថា ៖ «ភូមិភាគបៃតងមានន័យចង់ឱ្យភូមិភាគបាត់ដំបងដើរ តាមសារលិខិតរបស់សម្តេចប៉ាប ឡោដោតូស៊ី ដែលនាំឱ្យយើងចូលជ្រៅទៅក្នុងជីវិតយើង របៀបដែលយើងប្រកាសដំណឹងល្អដោយគិតពីបរិស្ថានធម្មជាតិ ដែលជាព្រះអំណោយទានរបស់ព្រះជាម្ចាស់»។
លោកអភិបាលបានបន្តទៀតថា ៖ «ពេលណាយើងគិតពីភូមិភាគបៃតង គឺយើងគិតពីព្រៃឈើ សត្វ និងពីរបៀបដែលយើងរស់នៅ និងអនុវត្តឡោដាតូស៊ី ហើយយើងត្រូវអធិដ្ឋាន កែប្រែអ្វីដែលមិនល្អ»។
មួយវិញទៀត ក្នុងថ្ងៃដដែលនោះដែរ ក៏មានពិធីបំបួសដើមពោធិ៍មួយដើម ដោយមានព្រះសង្ឃមកចូលបំបួស ដើម្បីឱ្យដឹងថាដើមពោធិ៍នេះ ជាព្រះអំណោយទានដ៏សក្ការៈ ហើយពេលណាបំបួស គឺដូចជាការផ្តល់ឋានៈឱ្យដើមពោធិ៍នេះ ដូចព្រះសង្ឃដែរ។
លោកអភិបាលទេព ច័ន្ទពិសិដ្ឋ បានបញ្ជាក់ថា ៖ «យើងនៅក្នុងព្រះសហគមន៍ យកប្រពៃណី និងយោបល់ពីសាសនាព្រះពុទ្ធដែលជួយយើងគិត គោរពស្រឡាញ់បរិស្ថាន ហើយដើមពោធិ៍ដែលយើងបំបួសនេះ បានរំលឹកយើងត្រូវការថែរក្សាការពារបរិស្ថាន ជាពិសេសឱ្យយើងសហការរវាងគ្រីស្តសាសនា និងពុទ្ធសាសនា ដើម្បីកសាងសន្តិភាពក្នុងពិភពលោក»។
កញ្ញា បាញ ចិន្តា អនុប្រធានផ្នែកបរិស្ថាននៃអង្គការជេស្វីតសឺវីសកម្ពុជា បានលើកឡើងថា សិក្ខាសាលានេះមានគោលបំណងពង្រឹងភូមិភាគបៃតង នៅក្នុងព្រះសហគមន៍កាតូលិកភូមិភាគបាត់ដំបង ជាហេតុធ្វើឱ្យយុវជនយុវនារី បងប្រុសបងស្រី បុព្វជិតបុព្វជិតា អ្នកធ្វើការនៅអង្គការ មណ្ឌល និងតាមព្រះសហគមន៍ផ្សេងៗ មកទីនេះដើម្បីរួមគ្នាគិត ត្រិះរិះពិចារណាថា តើអាចធ្វើអ្វីបានជួយទៅដល់ភូមិភាគបៃតងឱ្យមានអត្ថប្រយោជន៍កាន់តែច្រើនដល់ភពផែនដី ជាពិសេសសារលិខិតរបស់សម្តេចប៉ាបដែលទ្រង់បានសរសេរអំពីបរិស្ថាន។
កញ្ញាថា ៖ «នៅក្នុងសិក្ខាសាលានេះយើងបានរៀនអំពីសារលិខិតរបស់សម្តេចប៉ាប ក្នុងនោះយើងបានដកស្រង់ចំនុចមួយចំនួនដែលនិយាយអំពីការដឹងគុណ ការស្រឡាញ់ និងការថែរក្សា»។
ចំណែក អ្នកស្រី កៅ ធារ៉ា មកពីការិយាល័យភូមិភាគបាត់ដំបង បានមានចំណាប់អារម្មណ៍ក្នុងកិច្ចប្រជុំនេះដែរថា កិច្ចប្រជុំនេះល្អណាស់ ដែលទាំងអស់គ្នាគិតពីឡោដោតូស៊ី និងសារលិខិតរបស់សម្តេចប៉ាប។
អ្នកស្រីថា ៖ «យើងត្រូវអរព្រះគុណព្រះអង្គនូវអំណោយទានទាំងឡាយដែលព្រះអង្គប្រទានឱ្យយើង ដូចជាបរិស្ថានជុំវិញខ្លួន ខ្យល់ដកដង្ហើម និងអ្វីៗទាំងអស់ដែលព្រះអង្គប្រទានឱ្យយើងឥតបង់ថ្លៃ។ យើងត្រូវថែរក្សាអ្វីដែលយើងទទួលបានឱ្យកាន់តែប្រសើរឡើង កុំបំផ្លាញដែលនាំឱ្យប៉ះពាល់ដល់សុខភាព»។
ស្របពេលជាមួយគ្នានោះដែរ យុវជនព្រះសហគមន៍បាត់ដំបង លោក សូ រ៉ាវីត លើកឡើងថា ពាក្យឡោដោតូស៊ីនេះ បានដាស់តឿនដល់មនុស្សទាំងអស់ មិនសម្រាប់តែគ្រីស្តបរិស័ទប៉ុណ្ណោះទេ តែសម្រាប់មនុស្សជាតិទាំងអស់ដែលរស់នៅក្នុងភពផែនដីនេះ ឱ្យស្គាល់ ឱ្យយល់ពីបរិស្ថាន និងឈប់បំផ្លាញពិភពលោក ហើយចូលរួមការពារ ស្រឡាញ់និងថែរក្សា។
យុវជនមួយរូបទៀត លោក វេង បណ្តូល មកពីព្រះសហគមន៍ប៉ោយប៉ែត ខេត្តបន្ទាយមានជ័យ បានលើកឡើងថា ៖ «ខ្ញុំពិតជាសប្បាយចិត្តណាស់ដែលបានចូលរួមកម្មវិធីប្រជុំនេះ ហើយអ្វីដែលខ្ញុំចាប់អារម្មណ៍នោះគឺ ការប្រើប្រាស់ប្លាស្ទិក ព្រោះកន្លែងដែលខ្ញុំរស់នៅសម្បូរប្លាស្ទិក»។
នៅពេលលោកត្រឡប់ទៅវិញ លោកនឹងយកអ្វីដែលលោកឪពុក បងប្រុសបងស្រី និងបងប្អូនបានចែករំលែកទៅផ្សព្វផ្សាយបន្តដល់យុវជន និងគ្រីស្តបរិស័ទនៅក្នុងព្រះសហគមន៍ ជាពិសេសនៅតាមសាលា ដើម្បីឱ្យគាត់ចេះស្រឡាញ់បរិស្ថាន និងកាត់បន្ថយ ឬឈប់ប្រើប្រាស់ប្លាស្ទិក។ នេះបើតាមយុវជន វេង បណ្តូល បានបញ្ជាក់បន្ថែម៕
Daily Program
