​គណបក្សហ៊្វុនស៊ិនប៉ិច ប្ដេជ្ញាចូលរួម​ជាមួយរាជរដ្ឋាភិបាល លើការអនុវត្តតម្រោងព្រែកជី​កហ្វូណន-តេជោ

​គណបក្សហ្វ៊ុនស៊ិនប៉ិច បានចេញសេចក្តីថ្លែងការណ៍​លើការអនុវត្តតម្រោងព្រែកជីកហ្វូណន-តេជោ ដោយ​បាន​​សម្ដែងការ​អបអរសាទរ ចំពោះគម្រោងព្រែកជីកហ្វូណន-តេជោ និងចូលរួមលើ​កទឹកចិត្តបន្តការអនុវត្តគម្រោងនេះឱ្យបានសម្រេចជោគជ័យ។

យោងតាម​សេចក្តីថ្លែងការណ៍​របស់គណបក្សហ៊្វុនស៊ិនប៉ិច ចុះថ្ងៃទី​២៩ ខែមេសា ឆ្នាំ​២០២៤ បាន​ឱ្យដឹងថា គម្រោងព្រែកជីកហ្វូណន-តេជោ ដែលតភ្ជាប់ពីទន្លេមេគង្គទៅសមុទ្រ គឺជាគម្រោ​ង ប្រវត្តិសាស្ត្រថ្មីមួយនឹងផ្ដល់អត្ថប្រយោជន៍យ៉ាងធំធេងជូនជាតិមាតុភូមិ និងប្រជារាស្ត្រខ្មែរ។

ប្រភពដដែលបានបញ្ជាក់ថា ៖ «ព្រែកជីកនេះជាចំណែកយ៉ាងសំខាន់ក្នុងការអភិវឌ្ឍសេដ្ឋកិច្ចសង្គមជាតិ តាមរយៈការដឹកជញ្ជូន តាមផ្លូវទឹក និងនាវាចរណ៍ឱ្យកាន់តែមានភាពល្អប្រសើរឡើ​ង ក៏ដូចជាការតភ្ជាប់សេដ្ឋកិច្ចកម្ពុជា ទៅថា្នក់តំបន់និងពិភពលោក»។

សេចក្តីថ្លែងការណ៍បន្តថា ​ព្រែកជីកនេះ ​អាចជួយរំដោះទឹកជំ​នន់នៅតាមខេត្តភាគនិរតី ជាប្រ​ភពផ្គត់ផ្គង់ទឹកសម្រាប់ប្រជារាស្ត្រកម្ពុជាប្រកបរបរកសិកម្ម វារីវប្បកម្ម និងជួយសម្រួលការដឹកជ​ញ្ជូ​នកសិផលនានាពីតាមបណ្តាលខេត្តឱ្យកាន់តែមានភាពងាយស្រួល កាត់បន្ថយការចំ​ណាយនិ​ងពេលវេលាជាដើម។

សេចក្តីថ្លែងការណ៍សង្កត់ធ្ងន់ថា ៖ «គម្រោងដ៏មហាសាលនេះ ពិតជាមានអត្ថប្រយោជន៍យ៉ាងច្រើនសម្បើមបំផុតសំរាប់ប្រជាជាតិខ្មែរ ហើយក៏ជាមោទនភាពសម្រាប់យើងទាំងអស់គ្នាផងដែរ ដូចនេះក្នុងនាម ព្រះអង្គម្ចាស់ នរោ​ត្តម ចក្រាវុធ ព្រះប្រធានគណបក្សហ៊្វុនស៊ិនប៉ិច ប្ដេជ្ញាចូលរួមការពារជាមួយរាជរដ្ឋាភិបាលកម្ពុជា ព្រះរាជវង្សានុវង្ស និងប្រជារាស្ត្រខ្មែរ ធ្វើយ៉ាងណាឱ្យគ​ម្រោងមួយនេះសម្រេចបានជោគជ័យ ជាស្ថាពរ ដើម្បីជាឧត្តមប្រយោជន៍ជាតិ សម្រាប់ប្រជារាស្ត្រខ្មែរគ្រប់ជំនាន់តរៀងទៅ»​៕​