អ៊ីស្រាអែលសន្យាវាយតបវិញបន្ទាប់ពីការវាយប្រហារយ៉ាងសម្បើម និងមិនដែលធ្លាប់ធ្វើ ឡើងដោយអ៊ីរ៉ង ទោះបីជាមានការអំពាវនាវពីប្រទេសជាច្រើន រួមមាន ទាំងសម្ព័ន្ធមិត្តរបស់ ខ្លួនអាម៉េរិក ដើម្បីបញ្ចៀសការរអិលធ្លាក់ទៅរកភាពកាន់តែតានតឹង នៅក្នុងតំបន់ ដែលមាន ភាពធ្ងន់ធ្ងររួចហើយដោយសារសង្រ្គាមនៅដែនដីហ្គាហ្ស៉ា។
អគ្គមេបញ្ជាការនៃយោធាអ៊ីស្រាអែល លោកឧត្តមសេនីយ៍ ហ៊ែរហ្ស៊ី ហាឡឺវី ក្នុងដំណើរទស្សនកិច្ចនៅមូលដ្ឋានណាវ៉ាទីម (ភាគខាងត្បូង) ដែលរងការវាយប្រហារ បានថ្លែងថា ទាហានអ៊ីស្រាអែល នឹងវាយតប សម្រាប់ការបាញ់មីស៊ីលដ៏ច្រើន និងដ្រូនរបស់អ៊ីរ៉ងទៅលើទឹកដីរដ្ឋអ៊ីស្រាអែល។
យោងតាមអគ្គលេខាធិការអង្គការសហប្រជាជាតិ លោកអន់តូនីញ៉ូ ហ្គូទែរ៉េស បានឲ្យដឹងថា ចាប់តាំងថ្ងៃអាទិត្យ មានការអំពាវនាវកើនឡើងដើម្បីរារាំងការវាយតបដ៏សម្បើម ដែលប្រថុយនឹងធ្វើឲ្យតំបន់នេះឆាបឆេះបន្តទៀត ដែលវានៅនឹងគែមអន្លង់ជ្រោះជ្រៅទៅហើយ។
កាលពីថ្ងៃចន្ទ នាយកទីភ្នាក់ងារអន្តរជាតិនៃថាមពលអាតូមិក (AIEA) លោករ៉ាហ្វ៉ាអែល ហ្គ្រូស៊ី បានថ្លែងថា អ៊ីរ៉ងបានបិតរោងចក្រនុយក្លេអ៊ែររបស់ខ្លួនកាលពីថ្ងៃអាទិត្យ ដែលជាថ្ងៃនៃការវាយប្រហារប្រឆាំងអីស្រាអែល។
នៅអំឡុងសន្និសីទសារព័ត៌មាននៅខាងក្រៅកិច្ចប្រជុំរបស់ក្រុមប្រឹក្សាសន្តិសុខនៃអង្គការសហប្រជាជាតិ ដែលសំដៅលើរោងចក្រនុយក្លេអ៊ែរ អ៊ុយក្រែន ហ្សាប៉ូរីស្យា លោករ៉ាហ្វ៉ាអែល ហ្គ្រូស៊ី ត្រូវបានសាកសួរអំពីលទ្ធភាពនៃការវាយប្រហារសងសឹងរបស់អ៊ីស្រាអែលប្រឆាំងនឹងរោងចក្រនុយក្លេអ៊ែរអ៊ីរ៉ង។ ប្រមុខAIEA បានឆ្លើយតបថា ៖ “ជានិច្ចកាល យើងមានការព្រួយបារម្ភអំពីលទ្ធភាពនៃសង្រ្គាម។”
ទីភ្នាក់ងារព័ត៌មានផ្លូវការចិនបានរាយការណ៍កាលពីថ្ងៃអង្គារថា រដ្ឋមន្រ្តីកិច្ចការបរទេសចិន លោកវ៉ាង យី បានពិភាក្សាតាមទូរសព្ទ ជាមួយសមភាគីអ៊ីរ៉ង់របស់លោក និងបញ្ជាក់ថា ទីក្រុងតេអេរ៉ង់ ជាថ្មីម្តងទៀត បានសម្តែងឆន្ទៈបន្ធូរបន្ថយសភាពការណ៍ បន្ទាប់ពីការវាយប្រហារមិនធ្លាប់មានទៅលើដែនដីអ៊ីស្រាអែល។ យោងតាមភាគីចិន លោកហូសសេន អាមៀ អាបដូលឡាហៀន រដ្ឋមន្រ្តីការបរទេសអ៊ីរ៉ង បានបង្ហាញប្រាប់លោកវ៉ាងយី អំពីជំហរបស់អ៊ីរ៉ង ឆ្លើយតបនឹងការទម្លាក់គ្រាប់បែក ដែលត្រូវបានដាក់បន្ទុកលើអីស្រាអែល ទៅលើស្ថានទូតអ៊ីរ៉ងនៅទីក្រុងដាម៉ាស ប្រទេសស៊ីរី។ ជានិច្ចកាល យោងតាមទីភ្នាក់ងារព័ត៌មានចិន ការទូតអ៊ីរ៉ង បានវាយតម្លៃថា ក្រុមប្រឹក្សាសន្តិសុខនៃអង្គការសហប្រជាជាតិ មិនបាននាំមកនូវការឆ្លើយតបចាំបាច់សម្រាប់ការវាយប្រហារនេះ និងថា អ៊ីរ៉ង មានសិទ្ធស្វ័យការពារខ្លួន ក្នុងការឆ្លើយតបនឹងការរំលោភដែនអធិបតេយ្យ។
ក្រឡេកមើលទៅកាន់សហរដ្ឋអាម៉េរិក ប្រមុខសភាជាន់ទាបនៃសភាអាម៉េរិក បានថ្លែងកាល ពីថ្ងៃចន្ទថា សភាតំណាងរាស្រ្តអាម៉េរិកនឹងបោះឆ្នោតនៅសប្តាហ៍នេះនៅលើពង្រាងច្បាបដាច់ ដោយឡែកៗពីគ្នា សម្រាប់ជំនួយទៅអ៊ុយក្រែន និងអ៊ីស្រាអែល បន្ទាប់ពីច្រើនខែនៃនយោបាយខុសគ្នារវាងរដ្ឋបាលលោកចូ បាយឌិន និងអ្នកប្រឆាំងមកពីបក្សសាធារណរដ្ឋ។
កញ្ចប់ថវិកា ៦០ពាន់លានដុល្លារ គឺសម្រាប់ទីក្រុងគៀវ ដែលទាមទារដោយប្រធានាធិបតីមកពីគណបក្សប្រជាធិបតេយ្យ ត្រូវបានរាំងខ្ទប់ នៅសភាអាម៉េរិក ជាច្រើនខែមកហើយ ក៏ដូចជា កញ្ចប់ថវិកាសម្រាប់ជួយអ៊ីស្រាអែលផងដែរ។
លោកម៉ៃ ចនស៊ុន ប្រមុខក្រុមសាធារណរដ្ឋនៃសភាតំណាងរាស្រ្ត បានថ្លែងថា ៖ “នៅសប្តាហ៍នេះ យើងនឹងពិនិត្យសំណើនៃច្បាប់ដាច់ដោយឡែកៗ ពីគ្នា ដែលមានច្បាប់អនុញ្ញាតឲ្យជួយសម្ព័ន្ធមិត្តរបស់យើង អ៊ីស្រាអែល និងគាំទ្រអ៊ុយក្រែនក្នុងសង្រ្គាមប្រឆាំងនឹងការឈ្លានពានរបស់រុស្ស៊ី”។
Daily Program
