សមាជិកនៃអង្គការការីតាសនិងដៃគូក្នុងនិងក្រៅប្រទេស ចំនួន២០នាក់ ចូលរួមសិក្ខាសាលាស្ដីអំពីក្របខណ្ឌឆ្លើយតបនឹងការប្រែប្រួលអាកាសធាតុថ្នាក់តំបន់អាស៊ីអាគ្នេយ៍ថ្ងៃទី៨-១១ កក្កដា ២០២៤នៅភ្នំពេញដែលរៀបចំដោយអង្គការការីតាសអូស្ត្រាលី សហការជាមួយអង្គការការីតាសឥណ្ឌូណេស៊ី ការីតាសហ្វីលីពីន ការីតាសកម្ពុជា អង្គការដៃគូដូចជា អង្គការអភិវឌ្ឍន៍និងភាពជាដៃគូក្នុងសកម្មភាព(DPA) និងអង្គការសមាគមថែរក្សាបរិស្ថាននិងវប្បធម៌(CEPA)។
លោកយ៉ូសែប កូដាម៉ានឆាលី ជាទីប្រឹក្សាថ្នាក់តំបន់អាស៊ីនៃអង្គការការីតាសអូស្ត្រាលី មានប្រសាសន៍អំពីគោលដៅនៃសិក្ខាសាលានេះថា អង្គការការីតាសក្នុងតំបន់ដែលមានកម្ពុជា ឥណ្ឌូណេស៊ី ហ្វីលីពីន និងទីម័រខាងកើត ចង់បង្កើតគោលនយោបាយរួមមួយដើម្បីឆ្លើយតបនឹងការប្រែប្រួលអាកាសធាតុ។
លោកយ៉ូសែប ឲ្យដឹងថា ការីតាសអូស្ត្រាលីមានបេសកកម្មនៅតំបន់អាស៊ីអាគ្នេយ៍ ដែលមានដៃគូសហការនៅកម្ពុជា វៀតណាម ហ្វីលីពីន និងទីម័រខាងកើត។ លោកបន្ថែមថា ពេលនេះយើងចង់ឱ្យពួកគាត់នៅជាមួយគ្នា រៀបចំផែនការនិងសកម្មភាពរួម អំពីការប្រែប្រួលអាកាសធាតុ ដែលកំពុងកើតមានឡើង ដើម្បីយកទៅអនុវត្តនៅក្នុងតំបន់ និងតាមប្រទេសរៀងខ្លួន។
លោកថា៖ «ការប្រែប្រួលអាកាសធាតុកំពុងប្រកាសអាសន្ន និងបន្ទាន់មួយក្នុងតំបន់អាស៊ីអាគ្នេយ៍។»
ក្នុងជំនួបរយៈពេលបួនថ្ងៃនេះ អង្គការការីតាសនិងដៃគូ នឹងបង្កើតឱ្យមានដំណាក់កាលដែលជាយុទ្ធសាស្ត្រតម្រង់ទិស ដើម្បីយកទៅប្រើប្រាស់ស្វែងរកកិច្ចគាំទ្រពីម្ចាស់ជំនួយ និងកិច្ចសហការពីរដ្ឋាភិបាល អន្តរាគមន៍លើផែនការសកម្មភាពទាំងនោះ ឆ្លើយតបនឹងតម្រូវការរបស់ជនក្រីក្រដែលរងឥទ្ធិពលពីបម្រែបម្រួលអាកាសធាតុនេះ។ នេះបើតាមការឲ្យដឹងពីលោកយ៉ូសែប។
ក្នុងកម្មវិធីនេះ សិក្ខាកាមទាំងអស់បានចាប់ផ្ដើមឈ្វេងយល់អំពីគ្នាទៅវិញទៅមក អំពីទស្សនវិស័យនិងបេសកកម្មរបស់ស្ថាប័ននីមួយៗ និងដាក់ធាតុចូលសំខាន់ៗ ដើម្បីរៀបចំផែនការរួមគ្នាឆ្លើយតបនឹងការប្រែប្រួលអាកាសធាតុដែលកំពុងកើតមាននៅក្នុងថ្នាក់តំបន់។ ក្នុងនោះដែរក៏បានរិះគិតអំពីស្នាព្រះហស្ដរបស់ព្រះជាម្ចាស់ និងសេចក្ដីថ្លៃថ្នូររបស់មនុស្សជាតិនិងបរិស្ថាន ដោយផ្តោតសំខាន់លើឯកសារឡោដាវតូស៊ីរបស់សម្ដេចប៉ាបហ្រ្វង់ស៊ីស្កូ និងផ្អែកលើបរិបទក្នុងតំបន់អាស៊ីអាគ្នេយ៍។
លោកអភិបាលអេនរីគេ ហ្វីការេដូ អភិបាលព្រះសហគមន៍កាតូលិកភូមិភាគបាត់ដំបងនិងជាប្រធាក្រុមប្រឹក្សាភិបាលនៃអង្គការការីតាសកម្ពុជា បានណែនាំអង្គប្រជុំអំពីព្រះសហគមន៍និងបម្រែបម្រួលអាកាសធាតុនាថ្ងៃទី១។
លោកមានប្រសាសន៍ថា យើងត្រូវមានទស្សនវិស័យវែងឆ្ងាយ និងមានចិត្តទូលំទូលាយ និងបម្រើដោយចិត្តសុភាពរាបសារ។ លោកអភិបាលបន្ថែមថា ព្រះសហគមន៍តែងយកចិត្តទុកដាក់លើធម៌មេត្តាករុណា សាមគ្គីភាពជាមួយអ្នកក្រីក្រ បង្កើតភាពជាបងប្អូន និងធ្វើឱ្យមានសមធម៌ មិនមែនសមភាពនោះឡើយ។ លោកអភិបាលក៏សូមឱ្យម្នាក់ៗដែលចូលរួមត្រូវផ្លាស់ប្ដូរឥរិយាបទនៃការរស់នៅរបស់ខ្លួន ដើម្បីរួមចំណែកកាត់បន្ថយការបំពុលបរិស្ថាន។
អង្គការការីតាស ជាស្ថាប័នរបស់ព្រះសហគមន៍កាតូលិក ដែលដើរតួយ៉ាងសំខាន់ក្នុងសង្គម ដើម្បីគាំទ្រសកម្មភាពមេត្តាករុណា និងបង្ហាញវត្តមានរបស់ព្រះជាម្ចាស់ដល់មនុស្សទាំងអស់។
នាថ្ងៃបិទសិក្ខាសាលានេះអ្នកស្រី ជីង រ៉ៃ ហេនដឺសុន ប្រធានផ្នែកកម្មវិធីអេកូឡូជីជាតិរបស់អង្គការការីតាសហ្វីលីពីន និយាយថា ព្រះសហគមន៍កាតូលិក ជាពិសេសក្នុងតំបន់អាស៊ីអាគ្នេយ៍ បានធ្វើការយ៉ាងច្រើនទាក់ទងនឹងការការពារអេកូបរិស្ថាន។ ហើយក្នុងអង្គសិក្ខាសាលានេះ ជួយឲ្យយើងទទួលបានគន្លឹះប្រយោជន៍មួយចំនួនដើម្បីយកទៅអនុវត្តតាមប្រទេស។
ជីងបន្ថែមទៀតថា យើងចង់បង្កើតគោលនយោបាយដែលឲ្យសហគមន៍យល់ថា ពួកគាត់មិនគ្រាន់តែដឹងថា ព្រះសហគមន៍មានវត្តមានជាមួយពួកគេប៉ុណ្ណោះទេ ប៉ុន្តែឲ្យពួកគាត់យល់ថា មានមនុស្សនិងស្ថាប័នច្រើនណាស់ដែលយកចិត្តទុកដាក់និងគិតគូរអំពីសុខទុក្ខរបស់ពួកគាត់ ហើយបញ្ជូលពួកគាត់ក្នុងគម្រោងនៃអេកូឡូស៊ី។
ជីងសង្ឃឹមថា កិច្ចប្រជុំនេះ នឹងជួយឲ្យការីតាសទាំងមូលអាចបញ្ចេញសកម្មភាព។ ជីង៖ «យើងក្រោកឈរទាំងអស់គ្នា និងធ្វើយុទ្ធនាការរួមគ្នា»។
កញ្ញា ណៃ វិច្ឆិកា ប្រធានផ្នែកអភិវឌ្ឍន៍នៃអង្គការការីតាសកម្ពុជា ឲ្យដឹងថា នៅទីនេះ សមាជិកទាំងអស់បានរៀនសូតពីគ្នាទៅវិញទៅមក ទាំងបទពិសោធលើផ្នែកបច្ចេកទេស និងរបៀបអនុវត្តនៅតាមប្រទេសនីមួយៗ។
វិច្ឆិកាសង្ឃឹមថា៖ «យើងនឹងមានគម្រោងមួយ ដែលវាគ្រប់ជ្រុងជ្រោយសម្រាប់ការឆ្លើយតបទៅនឹងលក្ខខណ្ឌអាកាសធាតុក៏ដូចជាបរិស្ថានទាំងមូលសម្រាប់ប្រទេសទាំងបីនេះ»។
បន្ទាប់ពីសិក្ខាសាលានេះ សមាជិកចូលរួមទាំងអស់បានកំណត់កាលបរិច្ឆេទ ដើម្បីប្រជុំគ្នានិងកែទម្រង់យុទ្ធសាស្ត្រនិងគោលនយោបាយសម្រាប់ការឆ្លើយតបការប្រែប្រួលអាកាសធាតុ ក្នុងកម្រិតតំបន់ និងថ្នាក់ជាតិជាបន្តទៀត៕
អត្ថបទ៖ កែវ កញ្ញា
Daily Program
