សម្រាប់ជាលើកទី១ ទីក្រុងរីយ៉ាដ បានចូលរួមធ្វើការវាយប្រហារ អមជាមួយទីក្រុងវ៉ាស៊ីនតុន ប្រឆាំងនឹងកងកម្លាំងគាំទ្រអ៊ីរ៉ង់នៅអ៊ីរ៉ាក់។ ការវាយប្រហារដែលបង្ហាញអំពីការរីកធំជាបន្តបន្ទាប់នៃជម្លោះតំបន់ ដែលកាន់តែស្មុគស្មាញថែមទៀត។
ទាហានអាម៉េរិក និងអារ៉ាប៊ី សាអ៊ូឌីត បានឆ្លងកាត់ខ្សែបន្ទាត់សង្រ្គាមថ្មីកាលពីថ្ងៃទី២៨ ខែ កក្កដា ដោយធ្វើការវាយប្រហាររួមគ្នា ក្នុងពេលរាត្រី ប្រឆាំងនឹងកងកម្លាំងសកម្មប្រយុទ្ធ គាំទ្រ អ៊ីរ៉ង់នៅអ៊ីរ៉ាក់។ នេះគឺជាលើកទី១ ចាប់តាំងពីការចាប់ផ្តើមនៃសង្រ្គាមតាំងពីថ្ងៃទី២៨ ខែកុម្ភៈ ដែលប្រទេសអារ៉ាប៊ី សាអ៊ូឌីត បានទទួលស្គាល់ជាផ្លូវការនូវការចូលរួមរបស់ខ្លួនសម្រាប់ សង្រ្គាមនៅក្បែរសហរដ្ឋអាម៉េរិកនៅក្នុងជម្លោះប្រឆាំងនឹងអ៊ីរ៉ង់។ បញ្ជាការកណ្តាលរបស់អាម៉េរិក (CENTCOM) បានបញ្ជាក់ថា ប្រតិបត្តិការសំដៅលើមណ្ឌលដឹកជញ្ជូន និងឃ្លាំងគ្រាប់របស់ភេរវករ។ យោងតាម សេនខម (CENTCOM) នេះគឺជាការវាយប្រហារសងសឹកបន្ទាប់ពីមានការវាយប្រហារដោយដ្រូន ៣០ដង ត្រូវបានធ្វើឡើងដោយកងអង្គភាពឆ្មាំបដិវត្តន៍ឥស្លាម (CGRI) នៅប៉ុន្មានថ្ងៃចុងក្រោយនេះ។ សហរដ្ឋអាម៉េរិក និងអារ៉ាប៊ី សាអ៊ូឌីត បានចោទប្រកាន់ក្រុមសកម្មប្រយុទ្ធគាំទ្រអ៊ីរ៉ង់ ដែលបានធ្វើប្រតិបត្តិការមួយផ្នែក វាយប្រហារលើហេដ្ឋារចនាសម្ព័ន្ធថាមពលរបស់ទីក្រុងរីយ៉ាដដោយប្រើដ្រូន។ ក្រសួងការពារជាតិអារ៉ាប៊ី សាអ៊ូឌីត បានរៀបរាប់ថា ប្រព័ន្ធការពារអាកាសរបស់ខ្លួន បានស្ទាក់ចាប់ និងបំផ្លាញដ្រូន ដែលបានព្យាយាមវាយប្រហារលើហេដ្ឋារចនាសម្ព័ន្ធប្រេងនៅតំបន់ខាងកើតនៃប្រទេស។ យោងតាមទីក្រុងវ៉ាស៊ីនតុន ក្រុមសកម្មប្រយុទ្ធទាំងនេះរៀបចំការវាយប្រហារថ្មី២ ប្រឆាំងនឹងកងកម្លាំងអាម៉េរិក និងហេដ្ឋារចនាសម្ព័ន្ធថាមពលនៅប្រទេសអារ៉ាប៊ី សាអ៊ូឌីត។
ប្រតិកម្មឆ្លើយតបចំពោះការវាយប្រហារទាំងនេះ មន្ត្រីយោធាជាន់ខ្ពស់អ៊ីរ៉ង់ម្នាក់ ដែលមិនបានបង្ហាញអត្តសញ្ញាណ បានប្រកាសតាមទូរទស្សន៍រដ្ឋថា ៖ វាគឺជា "កំហុសគណនាដ៏ធំ" ពីភាគីទីក្រុងវ៉ាស៊ីនតុន និងទីក្រុងរីយ៉ាដ។
ចំណែកភាគីសាមីប្រទេសអ៊ីរ៉ាក់ រដ្ឋាភិបាលឈីអ៊ីត ដែលជារដ្ឋាភិបាលកម្រមួយក្នុងពិភពលោក ដែលមានទំនាក់ទំនងទាំងខាងយោធា និងការទូតជាមួយវ៉ាស៊ីនតុន និងតេអេរ៉ង់ ក្នុងពេលតែមួយ បានកោះហៅប្រជុំបន្ទាន់ ប៉ុន្តែកិច្ចជួបជុំរវាងនាយករដ្ឋមន្ត្រីអ៊ីរ៉ាក់ លោកអាលី អាល់ ហ្ស៉ៃឌី និងព្រះអង្គម្ចាស់រជ្ជទាយាទ អារ៉ាប៊ី សាអូឌីត ម៉ូហាម៉េដ បេន សាល់ម៉ាន ដែលគ្រោងធ្វើនៅថ្ងៃទី៣០ ខែកក្កដា ត្រូវបានលុបចោល។ ដោយម្យ៉ាង ការស៊ើបអង្កេតមួយត្រូវបានបើកធ្វើ នៅខណៈដែលទាហានអ៊ីរ៉ាក់ប្រកាសថា អ៊ីរ៉ាក់មានការប្តេជ្ញាចិត្តក្នុងការការពារ មិនឲ្យទឹកដីខ្លួន ត្រូវបានប្រើជាផ្លូវឆ្លងកាត់ ឬជាចំណុចចាប់ផ្តើមសម្រាប់ការវាយប្រហារណាមួយ ដែលមានគោលដៅទៅលើប្រទេសបងប្អូន ឬប្រទេសមិត្ត ក៏ទេដែរ។
នៅក្នុងសេចក្តីប្រកាសមួយ ប្រធានាធិបតីអ៊ីរ៉ាក់បានចោទប្រកាន់ការវាយប្រហាររបស់អាម៉េរិក‑និងអារ៉ាប៊ីសាអូឌីត ថា គឺជាការរំលោភ អធិបតេយ្យភាព របស់អ៊ីរ៉ាក់។
ចំណែកកងកម្លាំងចល័តប្រជាជន (FMP) ដែលជាសម្ព័ន្ធមិត្តរបស់កងសកម្មប្រយុទ្ធគាំទ្រអ៊ីរ៉ង់ ដែលជាក្រុមរងការវាយប្រហារ បានបដិសេធរាល់ការពាក់ព័ន្ធនៅក្នុងការវាយប្រហារដោយដ្រូន។ ពួកគេបានបញ្ជាក់ថា យ៉ាងហោចណាស់ អ្នកប្រយុទ្ធប្រមាណ ២០នាក់ របស់ពួកគេ ត្រូវបានសម្លាប់ និង ៣២នាក់ ផ្សេងទៀត បានរងរបួស។
ចំណែកប្រព័ន្ធផ្សព្វផ្សាយអ៊ីរ៉ង បានអះអាងថា ការវាយប្រហារបានរីករាលដាលទៅដល់ខេត្ត ឌីយ៉ាឡា និងគៀគូក នៅភាគខាងឥសាននៃប្រទេសអ៊ីរ៉ាក់។
យោងតាមសារព័ត៌មាន វ៉ាស៊ីនតុន ប៉ុស្ត៍ បានឲ្យដឹងថា ការតស៊ូឥស្លាមនៅអ៊ីរ៉ាក់ ដែលជាសម្ព័ន្ធមិត្តនៃក្រុមយោធាគាំទ្រដោយអ៊ីរ៉ង់ និងប្រមូលផ្តុំដោយកងឯកភាពជាច្រើនរបស់ក្រុមប្រយុទ្ធ FMP បានវាយតម្លៃលើការចោទប្រកាន់របស់អារ៉ាប៊ី សាអ៊ូឌីតថា ជាការប្រឌិតឡើង។
Daily Program
