សាលាដំបូងខេត្តសៀមរាប សម្រេចឃុំខ្លួនជនត្រូវចោទមួយរូបទៀត ក្នុងសំណុំរឿងព្រហ្មទណ្ឌពាក់ព័ន្ធនឹងក្រុមហ៊ុន ប៊ី្រលាន ស៊ីធីវើលដ៍
អ្នកនាំពាក្យសាលាដំបូងខេត្តសៀមរាប បានសម្រេចឃុំខ្លួន ជនត្រូវចោទឈ្មោះ រ៉េត សុធីដា ក្នុងសំណុំរឿងព្រហ្មទណ្ឌពាក់ព័ន្ធនឹងក្រុមហ៊ុន ប៊ី្រលាន ស៊ីធី វើលដ៍ ឯ.ក បន្ទាប់ពីបាននាំខ្លួនមកសាកសួរកាលពីថ្ងៃទី៣០ ខែមេសា ឆ្នាំ២០២៤។
យោងតាមសេចក្តីប្រកាសព័ត៌មាននាថ្ងៃទី២ ខែឧសភានេះ អ្នកនាំពាក្យសាលាដំបូងខេត្តសៀមរាប បានឱ្យដឹងថា នៅថ្ងៃទី២ ខែឧសភា ឆ្នាំ២០២៤ មន្ត្រីនគរបាលយុត្តិធម៌បាននាំខ្លួន ជនត្រូវចោទឈ្មោះ រ៉េត សុធីដា មកបង្ហាញខ្លួនចំពោះមុខចៅក្រមស៊ើបសួរ។
សេចក្តីប្រកាសបានបន្តថា ក្រោយពីបានសួរចម្លើយ ជនត្រូវចោទឈ្មោះ រ៉េត សុធីដា រួចមក និងបានពិនិត្យភស្តុតាងក្នុងសំណុំរឿង ព្រមទាំងពិចារណាអង្គហេតុ និងអង្គច្បាប់គ្រប់ជ្រុងជ្រោយ ចៅក្រមស៊ើបសួរបានសម្រេចឃុំខ្លួនជនត្រូវចោទខាងលើជាបណ្តោះអាសន្ន និងបានបញ្ជូនទៅពន្ធនាគារខេត្តសៀមរាប ដើម្បីបន្តការស៊ើបសួរតាមនីតិវិធីច្បាប់។
សូមបញ្ជាក់ថា ផ្អែកតាមចម្លើយរបស់ជនត្រូវចោទឈ្មោះ ឡេង ចាន់ណា ប្រធានក្រុមហ៊ុនប្រ៊ីលាន ស៊ីធីវើលដ៍ បានបញ្ជាក់ថា ជនត្រូវចោទ រ៉េត សុធីដា មានជាប់ពាក់ព័ន្ធនឹងបទល្មើសខាងលើ ដែលស្របនឹងការអះអាងជារួមរបស់ជនត្រូវចោទ ឈ្មោះ រ៉េត សុធីដា ដែលបានឆ្លើយចំពោះមុខចៅក្រមស៊ើបសួរថាកន្លងមកខ្លួនធ្លាប់បានណែនាំមិត្តភក្តិឱ្យ ដាក់ប្រាក់ចូលក្នុងក្រុមហ៊ុន ហើយខ្លួនក៏ទទួលបានផលប្រយោជន៍ជាប្រាក់មួយចំនួនពីការងារខាងលើ។
បន្ថែមលើសពីនេះ ជនត្រូវចោទឈ្មោះ រ៉េត សុធីដា បានឆ្លើយបញ្ជាក់ច្បាស់ថា «ខ្លួនមិនបានទទួលរងនូវការខាតបង់អ្វីមួយនៅក្នុងក្រុមហ៊ុន ប្រ៊ីលាន ស៊ីធីវើលដ៍ នោះទេ ដោយសារខ្លួនមិនបានដាក់ប្រាក់នៅក្នុងក្រុមហ៊ុន»។
តាមចម្លើយរបស់ជនត្រូវចោទឈ្មោះ ឡេង ចាន់ណា និងជនត្រូវចោទឈ្មោះ រ៉េត សុធីដា ឃើញថា ជនត្រូវចោទឈ្មោះ រ៉េត សុធីដា ពិតជាមានជាប់ពាក់ព័ន្ធនឹងបទល្មើសខាងលើ ហើយជនត្រូវចោទឈ្មោះ រ៉េត សុធីដា មិនមែនជាជនរងគ្រោះឡើយ។
អ្នកនាំពាក្យសាលាដំបូងខេត្តសៀមរាបបានបញ្ជាក់ថា ៖ «សាលាដំបូងខេត្តសៀមរាបនឹងបន្តចាត់ការ សំណុំរឿងនេះឱ្យបានឆាប់រហ័ស និងត្រឹមត្រូវតាមនីតិវិធីច្បាប់ជាធរមាន ដើម្បីរកយុត្តិធម៌ជូនអ្នកពាក់ព័ន្ធទាំងអស់»។
សូមរម្លឹកដែរថា ជនត្រូវចោទ ឡេង ចាន់ណា ដែលឆបោកលុយប្រជាពលរដ្ឋរឿងដីធ្លី-ផ្ទះ និងការវិនិយោគក្នុងទំហំទឹកប្រាក់ រាប់លានដុល្លារ រួមនឹងបក្សពួក ត្រូវបានកម្លាំងនគរបាលចាប់ខ្លួន កាលពីថ្ងៃទី១២ ខែមីនា ឆ្នាំ២០២៤ នាខេត្តសៀមរាប៕
Daily Program
