សម្តេចប៉ាប ឡេអូ ទី១៤ ជំរុញឱ្យលោកអភិបាលនៅបារាំង ការពារការបង្ហាញវត្តមានជាសាធារណៈរបស់ព្រះសហគមន៍កាតូលិក

សម្តេចប៉ាប ឡេអូ ទី១៤ បានមានបន្ទូលទៅកាន់លោកអភិបាលនៃព្រះសហគមន៍កាតូលិកនៅបារាំងថា ព្រះសហគមន៍កាតូលិកមានតួនាទីជាអ្នកប្រកាសសាររបស់ព្រះជាម្ចាស់ ពោលគឺដើរតួនាទីបែបព្យាការីនៅក្នុងជីវិតសាធារណៈ ហើយទ្រង់បានជំរុញឱ្យក្រុមលោកអភិបាលការពារសេរីភាពរបស់ព្រះសហគមន៍ក្នុងការប្រកាសដំណឹងល្អ ការអប់រំ និងការគោរពប្រណិប័តន៍ជាសាធារណៈ។

ក្នុងអំឡុងពេលដំណើរទស្សនកិច្ចរបស់ទ្រង់ទៅកាន់ប្រទេសបារាំង ចាប់ពីថ្ងៃទី២៥ ដល់ថ្ងៃទី២៨ ខែកញ្ញា សម្តេចប៉ាប ឡេអូ បានលើកទឹកចិត្តអស់លោកអភិបាលឱ្យរក្សាភាពក្លាហាន និងស្មារតីផ្សព្វផ្សាយដំណឹងល្អ ព្រមទាំងជួយប្រទេសនេះឱ្យស្វែងរកឃើញឡើងវិញនូវបេតិកភណ្ឌគ្រិស្តសាសនារបស់ខ្លួន។

សម្តេចប៉ាប ឡេអូ បានមានបន្ទូលថា សំឡេងរបស់ព្រះសហគមន៍មានសិទ្ធិពេញលេញក្នុងការឱ្យគេឮនៅក្នុងទីសាធារណៈ ហើយតាមធម្មជាតិរបស់សំឡេងនោះ គឺមានសិទ្ធិអំណាច និងតួនាទីបែបជាព្យាការី។

សម្តេចប៉ាប ឡេអូ មានបន្ទូលថា ទោះបីជាសំឡេងនោះមិនតែងតែត្រូវបានគេយល់ស្របតាមក៏ដោយ ក៏សំឡេងរបស់ព្រះសហគមន៍នៅតែមានសារៈសំខាន់។ ទ្រង់ក៏បានលើកឡើងអំពីគំរូជាក់លាក់នៃភាពមិនពាក់ព័ន្ធនឹងសាសនាក្នុងកិច្ចការរដ្ឋ (Laïcité) របស់ប្រទេសបារាំង ដោយមានបន្ទូលថា តុល្យភាពដែលសម្រេចបានកន្លងមកនោះ កំពុងត្រូវបានគេចោទសួរជាបណ្តើរៗ។

សម្តេចប៉ាប ឡេអូ បានជំរុញឱ្យលោកអភិបាលរក្សាការប្រុងប្រយ័ត្នក្នុងការការពារសេរីភាព និងសិទ្ធិរបស់ព្រះសហគមន៍ក្នុងការផ្សព្វផ្សាយដំណឹងល្អ ការអប់រំអំពីសេរីភាពនៃសេចក្តីពិត និងការគោរពប្រណិប័តន៍ជាសាធារណៈ ដើម្បីឱ្យសេចក្តីស្រឡាញ់បែបគ្រិស្តសាសនាអាចត្រូវបានបង្ហាញយ៉ាងច្បាស់នៅក្នុងសង្គម។

សម្តេចប៉ាប ឡេអូ បានលើកទឹកចិត្តលោកអភិបាលឱ្យជួយពង្រឹងជំនឿរបស់គ្រិស្តបរិស័ទកាតូលិកនៅបារាំង និងដោះស្រាយបញ្ហាប្រឈមនានារបស់ប្រទេស ដោយភាពក្លាហាន និងគំនិតច្នៃប្រឌិតក្នុងការផ្សព្វផ្សាយដំណឹងល្អ។