សម្តេចប៉ាបថ្កោលទោសឧស្សាហកម្មអាវុធ និងសេវាកម្មរកប្រាក់ចំណេញ កើតចេញពីការស្លាប់របស់មនុស្សជាតិ

សម្តេចប៉ាបហ្វ្រង់ស៊ីស្កូ អធិដ្ឋានសម្រាប់ជនរងគ្រោះនៃសង្រ្គាមនៅអ៊ុយក្រែន ប៉ាឡេស្ទីន អ៊ីស្រា​អែល និងមីយ៉ាន់ម៉ា ដោយគូសបញ្ជាក់ពីការមិនគាំទ្រ ពាក់ព័ន្ធនឹងការវិនិយោគដែលរកបានផលចំណេញច្រើនបំផុតជាពិសេសពីការវិនិយោគទាក់ទងនឹងឧស្សាហកម្មអាវុធ។

មានបន្ទូលនៅថ្ងៃដែលព្រះសហគមន៍រៀបចំពិធីពិសិដ្ឋរំលឹកដល់ព្រះនាងព្រហ្មចារិនី ម៉ារី នាខែឧសភា នេះ សម្តេចប៉ាបបានដាស់តឿនគ្រិស្តបរិស័ទកុំឱ្យភ្លេច ការអធិដ្ឋានសុំសន្តិភាព និងសម្រាប់ប្រជាជនដែលរងគ្រោះដោយសង្រ្គាម។

នាឱកាសនោះសម្តេចប៉ាបបានសុំឱ្យគ្រិស្តបរិស័ទអធិស្ឋានសម្រាប់ពលរដ្ឋអ៊ុយក្រែន ដែលកំពុងតែ"រងទុក្ខវេទនា" ហើយទ្រង់ក៏បានសុំឱ្យយើងអធិដ្ឋានសម្រាប់អស់អ្នកទាំងអស់ដែលកំពុងតែរស់នៅក្នុងក្នុងតំបន់ប៉ះទង្គិចរវាងប៉ាឡេស្ទីននិងអ៊ីស្រាអែល។

សម្តេចប៉ាបក៏បានបង្វែរគំនិតរបស់ទ្រង់ឲ្យស្នើឲ្យគ្រប់គ្នារិះគិតនិងបញ្ចេញសកម្មផាព ទៅកាន់ជនភៀសខ្លួនរ៉ូហ៊ីងយ៉ានៅក្នុងប្រទេសមីយ៉ាន់ម៉ា និង អស់ទីកន្លែងដែលកំពុងតែមានសង្រ្គាម ឫអំពើហិង្សាប្រដាប់អាវុធ។

ចុងក្រោយ សម្តេចប៉ាប បានរំលឹកដល់អ្នកដែលមានវត្តមានទាំងអស់ថា ៖ «ជាអកុសល ថ្ងៃនេះ​ ការវិនិយោគដែលផ្តល់ប្រាក់ចំណូលច្រើនបំផុត គឺជារោងចក្រផលិតអាវុធ»។ សម្តេចប៉ាប​បាន​មានបន្ទូល ​ម្ដង​ទៀត​ថា​ការ​ទទួល​បាន​ផល​ចំណេញ​ពី​សេចក្ដី​ស្លាប់​គឺ​«​គួរ​ឲ្យ​ខ្លាច»៕