លោក អ៊ាង សុផល្លែត៖ ភាពស្អាតបានជំរុញឱ្យរោងចក្រសហគ្រាស ទទួលយកការបំពាក់ឧបករណ៍ស្វ័យត្រួតពិនិត្យសំណល់រាវ

រដ្ឋមន្រ្តីក្រសួងបរិស្ថាន លោក អ៊ាង សុផល្លែត បានសម្តែងនូវការសាទរចំពោះក្រុមហ៊ុនខ្មែរប៊ែវើរីជីស ដែលបានយកចិត្តទុកដាក់ និងរួមចំណែកក្នុងការការពារជីវៈចម្រុះ ជាមួយក្រសួងបរិស្ថានប្រកបដោយទំនួលខុសត្រូវក្នុងសង្គម ស្របតាមយុទ្ធសាស្រ្តចក្រាវិស័យបរិស្ថាន របស់រាជរដ្ឋាភិបាលកម្ពុជា នីតិកាលទី៧នៃរដ្ឋសភា។

ការលើកឡើង​របស់រដ្ឋមន្រ្តីបរិស្ថាន បានធ្វើឡើងនៅក្នុងដំណើរទស្សនកិច្ចចុះត្រួតពិនិត្យ ការបំពាក់ឧបករណ៍ត្រួតពិនិត្យ ការបញ្ចេញសំណល់រាវ របស់ក្រុមហ៊ុនខ្មែរប៊ែវើរីជីស នៅថ្ងៃទី៧ ខែឧសភា ឆ្នាំ២០២៤ រាជធានីភ្នំពេញ។ នេះបើយោងតាម​ក្រសួង​បរិស្ថាន។

ក្រសួងបានលើកឡើងទៀតថា តាមយន្តការបច្ចុប្បន្ន ការវាយតម្លៃទីតាំង ការអង្កេតតាមដាន និងការធ្វើអធិការកិច្ចប្រភពបំពុល អគ្គនាយកដ្ឋានគាំពារបរិស្ថាន ត្រូវបញ្ជូនមន្ត្រីចុះពិនិត្យនៅតាមទីតាំងដោយផ្ទាល់ ដែលការងារនេះត្រូវចំណាយធនធានច្រើន ទាំងធនធានមនុស្ស ពេលវេលា ថវិកា និងមានការរំខាតដល់រោងចក្រសហគ្រាសទៀតផងដែរ។

​ជាក់ស្តែងក្រោយការវាយតម្លៃ និងយោងតាមបទពិសោធ៍ពីបណ្តាប្រទេសជាច្រើន ក្រសួងបរិ​ស្ថា​​នបានរៀបចំ និងដាក់ឱ្យប្រើ ប្រកាសលេខ៣០២ចុះថ្ងៃទី ២៩ខែកញ្ញា ឆ្នាំ២០២១ ស្តីពីការអនុវត្តវិធានស្វ័យត្រួតពិនិត្យនៅតាមប្រភពបំពុលសក្តានុពល ដែលមានវិសាលភាពអនុវត្តចំ​ពោះ​រាល់ប្រភពបំពុល អាចបង្កផលប៉ះពាល់ធ្ងន់ធ្ងរដល់បរិស្ថាន ប្រព័ន្ធអេកូឡូស៊ី និងសុខភាពសាធារណៈ តាមរយៈការបំពាក់ឧបករណ៍តាមដានស្វ័យប្រវត្តិ និងប្រព័ន្ធគ្រប់គ្រងទិន្នន័យ Online ដែលអនុញ្ញាតឱ្យក្រសួងធ្វើការតាមដានត្រួតពិនិត្យ ការបញ្ចេញសំណល់រាវ ទាន់ពេលវេលាជាក់លាក់ (Real Time) និងមានចំណាត់ការភ្លាមៗចំពោះប្រភពបំពុលបរិស្ថាន។

សូមបញ្ជាក់ថា ឧបករណ៍ស្វ័យត្រួតពិនិត្យការបញ្ចេញសំណល់រាវនៅក្នុងរោងចក្រ សហគ្រាស គឺជាយន្តការប្រកបដោយតម្លាភាពរវាងក្រុមហ៊ុនដែលជាម្ចាស់ប្រភពបំពុល និងក្រសួងបរិស្ថាន ព្រ​មទាំងជួយបង្កើនប្រសិទ្ធភាពនៃការគ្រប់គ្រងសំណល់រាវជារួម ដើម្បីទទួលបានភាពស្អាត សុវត្ថិភាពបរិស្ថាន កាត់បន្ថយបានពីការបំពុលដោយការបញ្ចេញសំណល់រាវខុសពីស្តង់ដារអនុញ្ញាត និងធានាការអភិវឌ្ឍន៍ប្រកបដោយចីរភាព៕