មន្ត្រីផ្តល់អត្តសញ្ញាណបណ្ណជាង ១ ម៉ឺនសន្លឹក ជូនប្រជាពលរដ្ឋដោយឥតគិតថ្លៃទូទាំងប្រទេស

ក្នុងរយៈពេល៧ថ្ងៃកាលពីសប្ដាហ៍មុន ចាប់ពីថ្ងៃទី២២ ដល់ថ្ងៃទី២៨ ខែមេសា ឆ្នាំ២០២៤ មន្ត្រីទ​ទួលបន្ទុកសេវាអត្តសញ្ញាណកម្មទូទាំងប្រទេស បានផ្តល់អត្តសញ្ញាណបណ្ណសញ្ជាតិខ្មែរសរុបចំ​នួន ១១ ០៦៧ សន្លឹកជូនប្រជាពលរដ្ឋដោយឥតគិតថ្លៃនៅទូទាំងប្រទេស។ នេះបើតាមការលើកឡើងរបស់​លោ​ក ទូច សុខៈ អ្នកនាំពាក្យរងក្រសួងមហាផ្ទៃ។​

លោក ទូច សុខៈ បាន​ឱ្យដឹងថា នៅថ្ងៃទី២២ ខែមេសា មន្ត្រីទទួលបន្ទុកសេវាអត្តសញ្ញាណកម្មទូ​ទាំងប្រទេស បានផ្តល់អត្តសញ្ញាណបណ្ណសញ្ជាតិខ្មែរចំនួន ៦៩៤សន្លឹក។ នៅថ្ងៃទី២៣ ខែមេសា បានផ្តល់ចំនួន ១៩៤៣សន្លឹក។ នៅថ្ងៃទី២៤ បានផ្តល់ចំនួន ២០៨០សន្លឹក។ នៅថ្ងៃទី២៥ បានផ្តល់ចំនួន ២០៦៣សន្លឹក។ នៅថ្ងៃទី២៦ បានផ្តល់ចំនួន ១៧៣៨សន្លឹក។ នៅថ្ងៃទី២៧ បានផ្តល់ចំនួន ១៧៨៧សន្លឹក និងថ្ងៃទី២៨ ខែមេសា បានផ្តល់ចំនួន ៧៦២សន្លឹក។​

សូមបញ្ជាក់ជូនថា រយៈពេល៥ថ្ងៃកាលពីថ្ងៃទី១៧ រហូតដល់ថ្ងៃទី២១ ខែមេសា ឆ្នាំ២០២៤ បន្ទាប់ពីបញ្ចប់ការឈប់សម្រាកអបអរសាទរឆ្នាំថ្មីប្រពៃណីជាតិ កន្លងមក មន្ត្រីទទួលបន្ទុកសេវាអត្តសញ្ញាណកម្មទូទាំងប្រទេស បានបន្តបំពេញតួនាទី និងភារកិច្ច ផ្ល់សេវាជូនប្រជាពលរដ្ឋយ៉ាងសកម្មជាប្រក្រតី ក្នុងនោះ មានអត្តសញ្ញាណបណ្ណសញ្ជាតិខ្មែរចំនួន ៨ ៨៧២សន្លឹក បានបន្តផ្ដល់ជូនប្រជាពលរដ្ឋ ដោយឥតគិតថ្លៃផងដែរ។ ​

អត្តសញ្ញាណបណ្ណសញ្ជាតិខ្មែរ ជាបណ្ណសម្រាប់សម្គាល់អត្តសញ្ញាណសញ្ជាតិខ្មែរលើបុគ្គលម្នាក់ៗមានសញ្ជាតិជាខ្មែរ។ អត្តសញ្ញាណបណ្ណសញ្ជាតិខ្មែរមានសារៈសំខាន់ ឬសារៈប្រយោជន៍ ដើម្បីប្រជាជនយកទៅប្រើប្រាស់បំពេញសំណុំឯកសារផ្សេងៗ តាមផ្លូវច្បាប់។ ប្រជាពលរដ្ឋខ្មែរទាំងពីភេទមានអាយុពី១៥ឆ្នាំឡើង អាចស្នើសុំធ្វើអត្តសញ្ញាណបណ្ណសញ្ជាតិខ្មែរ នៅអធិការដ្ឋាននគរបាលក្រុង ស្រុក  ខណ្ឌ ឬនៅស្ថានីយ៍ចល័ត នៃឃុំ សង្កាត់ របស់ខ្លួន តាមការជូនដំណឹ​ងរបស់អាជ្ញាធរ។ ​

លោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានជំរុញឱ្យអគ្គនាយកដ្ឋានអត្តស​ញ្ញាណកម្ម សិក្សាតាមបណ្តាច្រកចេញចូលតែមួយ ដើម្បីជំរុញការផ្តល់សេវាធ្វើអត្តសញ្ញាណបណ្ណ​ ជូនប្រជាពលរដ្ឋឱ្យបានឆាប់រហ័ស ជាពិសេសពិនិត្យលទ្ធភាពបន្ថែមទៀត ដើម្បីឈានទៅពង្រឹងគុណភាពនៃផ្តល់សេវាជូនប្រជាពលរដ្ឋ៕