ព្រះសហគមន៍កាតូលិកភូមិភាគកំពង់ចាម បានរៀបចំពិធីបុណ្យអភិបូជាឧទ្ទិសចំពោះវិញ្ញាណក្ខន្ធ លោកឪពុក ហ្រ្វង់ស្វ័រ ប៉ុងសូដ៍ ដែលបានទទួលមរណភាពកាលពីថ្ងៃទី១៧ ខែមករា ឆ្នាំ២០២៥ នៅប្រទេសបារាំង។
ពិធីនេះរៀបចំឡើង ក្រោមអធិបតីភាពរបស់លោក សិលា សួន ហង្សលី អភិបាលព្រះសហគមន៍កាតូលិកភូមិភាគកំពង់ចាម នាថ្ងៃទី២០ ខែមករា កន្លងទៅ នៅព្រះវិហារ ព្រះយេស៊ូមានព្រះជន្មថ្មីដ៏រុងរឿង ស្ថិតនៅភូមិចម្លាក់ ឃុំចក ស្រុកអូររាំងឪ ខេត្តត្បូងឃ្មុំ ជាកន្លែងដែលលោកឪពុក ហ្រ្វង់ស្វ័រ ប៉ុងសូដ៍ មានសកម្មភាពជាច្រើនជាមួបងប្អូនក្នុងតំបន់នោះ តាំងពីឆ្នាំ២០១៦ រហូតដល់ពេលគាត់ចូលនិវត្តន៍។
អ្នកស្រី ញឹក ស្រីរ៉ាន់ គ្រីស្តបរិស័ទនៅព្រះសហគមន៍ចម្លាក់ ធ្លាប់ស្គាល់លោកឪពុក ហ្វ្រង់ស្វ័រ ប៉ុងសូដ៍ ខណៈរស់នៅជំរំជនភៀសខ្លួនខ្មែរថៃ ហើយបានទទួលអប់រំជំនឿជាមួយលោក បន្ទាប់មកក្លាយជាគ្រូអប់រំជំនឿ និងបានធ្វើការជាមួយគាត់នៅព្រះសហគមន៍ចម្លាក់នេះ។
អ្នកស្រីបានបន្តទៀតថា អ្វីដែលអស្ចារ្យសម្រាប់ព្រះសហគមន៍ចម្លាក់ គឺលោកបានកសាងព្រះវិហារមួយជារចនាបទខ្មែរ ដោយមានរូបគំនូរក្នុងគម្ពីរតាមអរិយធម៌ខ្មែរទាំងអស់។ អ្នកស្រីនិយាយថា «ទោះបីលោកបានចេញពីចម្លាក់ទៅហើយ តែពេលចូលទៅក្នុងព្រះវិហារយើងតែងស្រមៃឃើញលោកតានៅជាមួយយើងជានិច្ច»។
អ្នកស្រីបានប្រាប់ថា អ្វីដែលគាត់ចងចាំគឺសេចក្តីស្រឡាញ់ និងការចែកលែកដល់អ្នកដទៃ ដែលលោកមាន ដោយប្រកាន់ពូជសាសន៍ មានឬក្រ ហើយគាត់តែងជួយណែនាំនិងលើកទឹកចិត្តទាំងគ្រីស្តបរិស័ទនិងពុទ្ធបរិស័ទ។ «ដោយគាត់គិតថា អ្នកទាំងអស់គ្នាជាបុត្រធីតារបស់ព្រះជាម្ចាស់»។
លោក ហេង សារ៉ាត់ គ្រីស្តបរិស័ទមួយរូបទៀតនៅព្រះសហគមន៍ចម្លាក់ ហើយជាគ្រូបង្រៀនបានស្គាល់និងរស់នៅជាមួយលោកឪពុក ហ្វ្រង់ស្វ័រ ប៉ុងសូដ៍កាលពីឆ្នាំ២០១១ ហើយបានជួយធ្វើការងារបកប្រែព្រះគម្ពីរជាច្រើនជាមួយលោក ឲ្យដឹងថា លោកឪពុកបានជួយដល់ព្រះសហគមន៍ចម្លាក់ និងសង្គមជាច្រើនក្នុងស្រុកអូរាំងឪទាំងមូល។
លោកសារ៉ាត់ប្រាប់ថា «លោកតាបានចំណាយថវិកាជាច្រើនក្នុងការស្តារស្ទឹង ដែលស្ថិតក្នុងឃុំដំរិល ស្រុកអូររាំងឪ ហើយលោកតាបានសហការជាមួយអង្គការផ្សេងៗដើម្បីជួយដល់សិស្សក្រីក្រ សិស្សដែលនៅតំបន់ដាច់ស្រយាល»។
ក្រៅពីការងារសង្គម លោកបានចងសម្ពន្ធមេត្រីភាពជាអន្តរសាសនា ពោលគឺជាមួយពុទ្ធសាសនា និងជួយដល់វត្តអារ៉ាមផ្សេងៗក្នុងតំបន់ ហើយនៅរាល់ពេលមានបុណ្យសពរបស់ប្រជាពលរដ្ឋ លោកតាតែងតំណាងព្រះសហគមន៍កាតូលិកចូលចែករំលែកទុក្ខដល់ក្រុមគ្រួសាររបស់គេ។ នេះបើតាមលោកសារ៉ាត់បញ្ជាក់។
លោកបន្តថា ទោះគាត់ស្គាលើលោកក្នុងរយៈពេលខ្លី តែលោកគិតថា «លោកតាជាអច្ឆរិយបុគ្គលសម្រាប់ខ្ញុំ ... គាត់មិនដែលគិតពីខ្លួនឯងឡើយ គឺគាត់គិតពីអ្នកដទៃជាងខ្លួនឯង»។
បើតាមការរៀបរាប់របស់លោកសារ៉ាត់ឲ្យដឹងថា នៅព្រះសហគមន៍ចម្លាក់ លោកឪពុកបានជួយអភិវឌ្ឍលើវិស័យអប់រំ រួមមាន សាងសង់មត្តេយ្យសិក្សាក្នុងស្រុកអូររាំងឪចំនួន១១កន្លែង មណ្ឌលស្នាក់នៅរបស់សិស្សរៀននៅវិទ្យាល័យចំនួន២កន្លែង(នៅអូររាំងឪ និងចម្លាក់) ផ្តល់អាហារូបករណ៍ដល់និស្សិតនៅសកលវិទ្យាល័យ និងបណ្តុះបណ្ដាលគ្រូមត្តេយ្យដើម្បីបង្រៀនកុមារតូច ហើយខាងអភិវឌ្ឍសង្គម រួមមានជីកប្រឡាយទប់ទឹក សង់បង្គន់អនាម័យជូនដល់ជនក្រីក្រ ធ្វើឡជីវឧស្ម័ន ធ្វើរោងជីកំប៉ុស៍សម្រាប់បងប្អូនកសិករដើម្បីប្រើប្រាស់ជីធម្មជាតិដាក់ក្នុងស្រែ។
នៅថ្ងៃទី១៣ ខែធ្នូ ឆ្នាំ២០២១ ក្នុងពិធីជម្រាបលាលោកទៅប្រទេសបារាំងវិញ ជាអភិបូជាជាលើកចុងក្រោយ នៅព្រះវិហារចម្លាក់ លោកមានប្រសាសន៍ថា៖ «ពាក្យទូន្មានរបស់ខ្ញុំមានតែមួយគត់ សូមកាន់គ្រីស្តសាសនាដោយយកចិត្តទុកដាក់ និងការពារអរិយធម៌ខ្មែរ នេះជាគោលបំណងរបស់យើង!» ។
លោកឪពុកហ្វ្រង់ស្វ័រ ប៉ុងសូដ៍ កើតនៅថ្ងៃទី៨ ខែវិច្ឆិកា ឆ្នាំ១៩៣៩ នៅសាឡង់ឆេស (Sallanches) ជាកូនទី៧ក្នុងចំណោមបងប្អូន១២នាក់ ដែលមានឪពុកឈ្មោះឡេអុង ប៉ុងសូដ៍ (Léon Ponchaud) ជាកសិករ ដែលជាសមាជិកក្រុមប្រឹក្សាទូទៅនៃតំបន់សាឡង់ឆេស បានចូលរួមក្នុងចលនាសាធារណរដ្ឋ។
ក្នុងឆ្នាំ១៩៥៧ លោកបានចូលរួមជាមួយសាសនទូតក្រៅប្រទេសនាទីក្រុងប៉ារីស ក្រោយមកត្រូវបានបញ្ជូនមកបំពេញបេសកកម្មនៅកម្ពុជាក្នុងឆ្នាំ១៩៦៥។
ក្រៅពីកិច្ចការងារសង្គម លោកបានរួមចំណែកយ៉ាងខ្លាំង ដើម្បីឲ្យព្រះសហគមន៍កម្ពុជាអាចមានឯកសារនានាដើម្បីសិក្សានិងឈ្វេងយល់ ក្នុងនោះរួមមាន ព្រះគម្ពីរសម្រាយជាភាសាខ្មែរ សៀវភៅអប់រំជំនឿពីថ្នាក់កុមាររហូតដល់ពេញវ័យ សៀវភៅស្តីអំពីវ៉ាទីកង់ទី២ សៀវភៅអភិបូជាប្រចាំថ្ងៃ គម្ពីរសិក្សា និងឯកសាររបស់ព្រះសហគមន៍ជាច្រើនទៀតរាប់មិនអស់។ អ្វីដែលពិភពលោកបានស្គាល់លោក គឺស្នាដៃនិពន្ធសៀវភៅ «កម្ពុជាឆ្នាំសូន្យ» ដែលធ្វើឲ្យមតិអន្តរជាតិទទួលស្គាល់របបប្រល័យពូជសាសន៍ប៉ុលពត និងយកចិត្តទុកដាក់ចំពោះប្រទេសកម្ពុជា៕
ដោយ៖ ម៉េង ភីឡុង
Daily Program
