ព្រះសហគមន៍នៅអាមេរិកនឹងរៀបចំពិធីអធិដ្ឋានសុំឱ្យប្រឆាំងនឹងអំពើរំលូត​

ព្រះសហគមន៍កាតូលិកនៅទូទាំងសហរដ្ឋអាមេរិកកំពុងតែរៀបចំអធិដ្ឋាន៩ថ្ងៃដើម្បីជីវិតដែលជាពិធីខាងជំនឿត្រូវបានរៀបចំឡើងដើម្បីរំលឹកនូវគ្រោះថ្នាក់នៃអំពើរំលូតកូន​។

វ៉ាទីកង់ញូវបានរាយការណ៍ថា ពិធីនេះ ត្រូវបានគេគ្រោងរៀបចំចាប់ពីថ្ងៃទី​១៦ ខែមករា តទៅ ​ក្រោមការឧបត្ថម្ភដោយក្រុមអន្តរសភាលោកអភិបាលព្រះសហគមន៍កាតូលិកអាមេរិក ។

ព្រឹត្តិការណ៍នេះត្រូវបានគេដឹងថា បានរៀបចំឡើងដំបូងនៅក្នុងឆ្នាំ​២០១៣ នៅចំថ្ងៃខួបលើកទី៤០ឆ្នាំនៃការសម្រេចចិត្តរបស់តុលាការអាមេរិកនៅទីក្រុងវ៉ាស៊ីនតោន កាលពីឆ្នាំ១៩៧៤ ទាក់​ទងនឹងសកម្មភាពរំលូតកូន ហើយក្រោយមកក៏ត្រូវបានគេចាប់អារម្មណ៍ ហើយរៀបចំឡើងនៅទូទាំងសហរដ្ឋអាមេរិករហូតដល់សព្វថ្ងៃនេះ។

នៅរៀងរាល់ថ្ងៃនៃពិធីដែលគេគ្រោងទាំង៩ ថ្ងៃនេះ គឺផ្តោតសំខាន់នៅលើការអប់រំ​ ការចែករំ​លែ​កព័ត៌មាន សកម្មភាពទាក់ទងនឹងការជួយកសាងវប្បធម៌នៃការអោយតម្លៃទៅលើជីវិត ជាដើ​ម។​

គោលដៅនៃការរៀបចំកម្មវិធីនេះឡើងគឺដើម្បីជំរុញឲ្យសាធារណជនយកចិត្តទុកដាក់នៅក្នុងការការពារមាតានិងទារក ប្រឆាំងនឹងការរំលូតដែលជាសកម្មភាពដ៏មហន្តរាយមួយខាងអា​រម្មណ៍របស់មនុស្សជាតិ​៕