ព្រះមហាក្សត្រ និង​ព្រះវររាជមាតា នរោត្តម មុនិនាថ សីហនុ ផ្ញើសារចូលរួមរំលែកទុក្ខដល់​ក្រុមគ្រួសារយោធិនពលី និងយោធិនរងរបួស នៅយោធភូមិភាគទី៣

ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ​ និង​សម្តេចព្រះមហាក្សត្រី ព្រះវររាជមាតា នរោត្តម មុនិនាថ សីហនុ នៃព្រះរាជាណាចក្រកម្ពុជា បាន​ផ្ញើសា​រជូនក្រុមគ្រួសារយោធិនពលី និងយោធិនរងរបួស នៅយោធភូមិភាគទី៣ ក្នុងខេត្តកំពង់ស្ពឺ។

ព្រះរាជសាររបស់ព្រះមហាក្សត្រ បាន​ថ្លែងថា ៖ «ខ្ញុំមានសេចក្តីរន្ធត់ឥតឧបមា ដោយបានទទួលដំណឹងពីបងប្អូន កូនចៅជាយោធិន ដែលបានទទួលរងគ្រោះដោយឧបទ្ទវហេតុផ្ទុះគ្រាប់ នៅយោ​ធភូមិភាគទី៣ ក្នុងខេត្តកំពង់ស្ពឺ នៅរសៀលថ្ងៃទី២៧ ខែមេសា ឆ្នាំ២០២៤ ដែលបណ្តាលឱ្យ​មានយោធិនពលី និងរបួសជា ច្រើននាក់»។

ព្រះអង្គបានបន្តថា ៖ «ខ្ញុំមានសេចក្ដីសោកស្តាយជាទីបំផុត និងសូមចូលរួមរំលែកទុក្ខដ៏ក្រៀមក្រំ ជាមួយក្រុម គ្រួសារនៃយោធិនដែលជាអ្នកស្នេហាជាតិ ហើយបានពលីក្នុងបេសកកម្មបម្រើជាតិ មាតុភូមិ និងសូមឱ្យវិញ្ញាណក្ខន្ធយោធិនពលីទាំងអស់ បានទៅកាន់សុគតិភពកុំបីឃ្លៀងឃ្លាតឡើយ»។

​ជាមួយគ្នានេះដែរ សម្តេចព្រះមហាក្សត្រី ព្រះវររាជមាតា នរោត្តម មុនិនាថ សីហនុ​ ក៏បាន​ចេញ​ព្រះរាជសារ​ជូន ក្រុមគ្រួសារយោធិនពលី និងយោធិនរងរបួស នៅយោធភូមិភាគទី៣ ក្នុងខេត្តកំពង់ស្ពឺផងដែរ។

ព្រះមហាក្សត្រីបាន​លើកឡើងថា ៖ «ខ្ញុំមានហឫទ័យតក់ស្លុត ដោយបានទទួលដំណឹងដ៏រន្ធត់ អំពីឧបទ្ទវហេតុផ្ទុះគ្រាប់ នៅយោធភូមិភាគទី៣ ក្នុងខេត្តកំពង់ស្ពឺ នៅរសៀលថ្ងៃទី២៧ ខែមេសា ឆ្នាំ២០២៤ ដែលបណ្ដាលឱ្យ មានបងប្អូន កូនចៅ ចៅទូតជាយោធិនពលី និងរបួសជាច្រើននាក់»​។

ព្រះមហាក្សត្រី​មានសេចក្ដីសោកស្ដាយជាទីបំផុត និងសូមចូលរួមរំលែកទុក្ខដ៏ក្រៀមក្រំ ជាមួយក្រុម គ្រួសារនៃយោធិនទាំងអស់ ដែលជាអ្នកស្នេហាជាតិ ហើយបានពលីក្នុងបេសកកម្មបម្រើជាតិ មាតុភូមិ និងសូមឱ្យវិញ្ញាណក្ខន្ធយោធិនពលីទាំងអស់ បានទៅកាន់សុគតិភពកុំបីឃ្លៀងឃ្លាតឡើយ។

ព្រះមហាក្សត្រី បន្តថា ៖ «ខ្ញុំសូមជូនពរដល់បងប្អូន កូនចៅ ចៅទួតយោធិន ដែលរងរបួសកំពុងសម្រាកព្យាបាល នៅមន្ទីរពេទ្យទាំងអស់ សូមឱ្យបានឆាប់ជាសះស្បើយ»​។​

សូមរម្លឹក​ផងដែរថា នារសៀល​ថ្ងៃទី​២៧ ខែមេសា ឆ្នាំ២០២៤ ឧបទ្ទវហេតុផ្ទុះគ្រាប់ នៅយោធភូមិភាគទី៣ ក្នុងខេត្តកំពង់ស្ពឺ បាន​កើតឡើង ដោយបានបណ្តាលឱ្យ​យោធិនចំនួន ២០ នាក់ បានពលីជីវិត និងយោ​ធិនមួយចំនួនទៀតបានរបួស។​

សម្តេចមហាបវរធិបតី នាយករដ្ឋមន្រ្តី ហ៊ុន ម៉ាណែត បាន​សរសេលើហ្វេសប៊ុក​នាយប់ថ្ងៃទី​២៧ ខែមេសាដោយបានបង្ហាញ​ក្តីរន្ធត់ ក្តុកក្តួលឥតឧបមា ដែលបានទទួលដំណឹងអំពីឧបទ្ទវហេតុផ្ទុះគ្រា​ប់នៅយោធភូមិភាគទី៣ ក្នុងខេត្តកំពង់ស្ពឺនេះ​ ដែលបានបង្កឱ្យយោធិនចំនួន ២០ នាក់ បានព​លីជីវិត និងយោធិនមួយចំនួនទៀតបានរបួស។

យោងតាម​របាយការណ៍​របស់កងទ័ពជើងគោក យោធភូមិភាគទី​៣ ​បាន​ឱ្យដឹងថា ករណីផ្ទុះឃ្លាំ​ងស្តុកគ្រាប់ បានកើតឡើង​នៅវេលាម៉ោង ១៤.២៥នាទី ​នៅទីតាំងឃ្លាំងគ្រាប់បច្ចេកទេស យោធភូមិភាគទី៣។​

របាយការណ៍បានបន្តថា ការផ្ទុះនេះបានបណ្តា​លឱ្យមានការខូចខាតបឋមរួមមាន៖​ មនុស្សចំនួន ២០នាក់ (អាចស្លាប់ទាំងអស់) ក្នុងនោះ មាននាយទាហានខេត្តកោះកុងចំនួន ១៥នាក់ និងនាយទាហានទីបញ្ជាការយោធភូមិភាគ ចំនួន ៥នាក់។​

ចំពោះអាវុធ-គ្រាប់មកពីខេត្តកោះកុងមាន រថយន្ត ៥គ្រឿង (ផ្ទុះខ្ទេចរថយន្ត ១គ្រឿងរួមទាំងអាវុធ គ្រាប់នៅលើរថយន្ត, រថយន្តមួយគ្រឿងទៀតខូចធ្ងន់ធ្ងរផ្នែកខាងក្រៅតែអាវុធគ្រាប់នៅលើ​នឹង, ៣គ្រឿងទៀត មិនទាន់បានដាក់អាវុធគ្រាប់ចុះ)។​​​

ចំណែកអគារខូចខាតធ្ងន់ធ្ងរ ចំនួន ៤ខ្នង (អាវុធគ្រាប់ក្នុងឃ្លាំង៣ខ្នង ខូចខាតទាំងស្រុង, អគារស្នាក់នៅ១ ខ្នង និងអគារការិយាល័យក្នុងទីបញ្ជាការយោធភូមិភាគ ខូចខាតផ្នែកខាងក្រៅរួមមានទ្វា បង្អួច និងដំបូល)។ ខូចខាតផ្ទះប្រជាពលរដ្ឋជុំវិញទីបញ្ជាការយោធភូមិភាគ ចំនួន ២៥ខ្នងៗផងដែរ៕