ព្រះករុណា ព្រះមហាក្សត្រ ទ្រង់អំពាវនាវដល់សហគមន៍ហ្វ្រង់កូហ្វូនី ឱ្យវិនិយោគឡើងវិញលើសន្តិភាព
ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា បានគូសបញ្ជាក់ពីគុណតម្លៃដែលមិនអាចខ្វះបាននៃសន្តិភាព ការផ្សះផ្សាជាតិ និងសាមគ្គីភាព ដោយមានព្រះរាជបន្ទូលថា ប្រវត្តិសាស្ត្ររបស់កម្ពុជាបានបង្រៀនប្រជាជនខ្លួនថា វិបុលភាពមិនអាចស្ថិតស្ថេរគង់វង្សបានឡើយ ប្រសិនបើគ្មានសន្តិភាព។
នៅក្នុងព្រះរាជសុន្ទរកថាបើកកិច្ចប្រជុំកំពូលហ្វ្រង់កូហ្វូនីលើកទី២០ ដែលប្រារព្ធឡើងនៅរាជធានីភ្នំពេញ កាលពីថ្ងៃអាទិត្យ ក្រោមមូលបទ «វិនិយោគឡើងវិញលើសន្តិភាព ដើម្បីវិបុលភាពរួម និងស្ថិរភាពយូរអង្វែង» ព្រះករុណាជាអម្ចាស់ជីវិតលើត្បូង បានលើកឡើងពីផលវិបាកដ៏មហន្តរាយនៃជម្លោះនានានៅជុំវិញពិភពលោក ដែលសង្គ្រាមនៅតែបន្តបំផ្លិចបំផ្លាញទីក្រុង បង្ខំឱ្យគ្រួសារជាច្រើនភៀសខ្លួន និងឆក់យកកុមារភាពរបស់កុមារ។
ព្រះមហាក្សត្រមានព្រះរាជបន្ទូលថា៖ «កម្ពុជាស្គាល់ច្បាស់ពីតម្លៃនៃការបាត់បង់សន្តិភាព និងដឹងថាផ្លូវក្នុងការកសាងសន្តិភាពឡើងវិញមានរយៈពេលវែងប៉ុនណា។ ប្រវត្តិសាស្ត្ររបស់យើងបានបង្រៀនយើងថា វិបុលភាពមិនអាចគង់វង្សបានទេ ប្រសិនបើគ្មានសន្តិភាព»។
ព្រះមហាក្សត្រកម្ពុជាបានសង្កត់ធ្ងន់ថា ការវិនិយោគឡើងវិញលើសន្តិភាព មានន័យថាជាការធានាថាមនុស្សជំនាន់ក្រោយនឹងមិនចាំបាច់រងទុក្ខវេទនា និងភាពខ្វះខាតដូចមនុស្សជំនាន់មុនធ្លាប់បានជួបប្រទះឡើយ ដោយព្រះអង្គបានពណ៌នាការប្តេជ្ញាចិត្តនេះថាជាខ្លឹមសារស្នូលនៃការរស់ឡើងវិញរបស់ជាតិកម្ពុជា។
ព្រះករុណាជាអម្ចាស់ជីវិតលើត្បូង ក៏បានសម្តែងព្រះរាជហឫទ័យសង្ឃឹមថា សេចក្តីប្រកាសទីក្រុងភ្នំពេញ សេចក្តីសម្រេច និងសេចក្តីអំពាវនាវ ដែលនឹងត្រូវអនុម័តនៅក្នុងកិច្ចប្រជុំកំពូលនេះ នឹងនាំទៅរកការប្តេជ្ញាចិត្តជាក់ស្តែង និងសកម្មភាពប្រកបដោយនិរន្តរភាព ទន្ទឹមនឹងការអំពាវនាវឱ្យបន្តកិច្ចសន្ទនាដោយភាពអត់ធ្មត់ និងការព្យាយាម ទោះបីជាស្ថិតក្នុងស្ថានភាពលំបាកយ៉ាងណាក៏ដោយ។
ព្រះមហាក្សត្របានគូសបញ្ជាក់បន្ថែមអំពីអត្ថន័យជានិមិត្តរូបនៃ «ស្នាមញញឹមខ្មែរ» ដ៏ល្បីល្បាញរបស់កម្ពុជា ហើយបានពណ៌នាថាស្នាមញញឹមនេះគឺជាការឆ្លុះបញ្ចាំងពីប្រវត្តិសាស្ត្រដ៏ឈឺចាប់ ភាពធន់ និងដំណើរឆ្ពោះទៅរកការផ្សះផ្សារបស់ប្រទេសជាតិ។
ព្រះមហាក្សត្រមានព្រះរាជបន្ទូលថា៖ «នៅកម្ពុជា គេនិយាយអំពីស្នាមញញឹមខ្មែរ។ លោកអ្នកនឹងឃើញស្នាមញញឹមនេះនៅលើព្រះភ័ក្ត្រថ្មនៃប្រាសាទបាយ័ន ដែលទតសម្លឹងទៅកាន់ទិសទាំងបួនអស់រយៈពេលប្រាំបីសតវត្សរ៍មកហើយ។ លោកអ្នកក៏នឹងជួបប្រទះស្នាមញញឹមនេះផងដែរ នៅតាមទីផ្សារ នៅតាមវត្តអារាម និងនៅតាមទីធ្លាសាលារៀន»។
ទោះជាយ៉ាងណាក៏ដោយ ព្រះអង្គបានរំលឹកឡើងវិញថា ស្នាមញញឹមនេះធ្លាប់បានបាត់បង់ម្តងរួចមកហើយក្នុងអំឡុងឆ្នាំដ៏សោកនាដកម្មរបស់ប្រទេសជាតិ នៅពេលដែលភាពភ័យខ្លាច និងទុក្ខវេទនាបានគ្របដណ្តប់លើជីវិតរបស់ប្រជាពលរដ្ឋ។ ប៉ុន្តែស្នាមញញឹមនេះបានវិលត្រឡប់មកវិញបន្តិចម្តងៗ នៅពេលដែលសន្តិភាពត្រូវបានស្តារឡើងវិញ។
ព្រះមហាក្សត្រមានព្រះរាជបន្ទូលថា៖ «ប៉ុន្តែស្នាមញញឹមនេះធ្លាប់បានស្គាល់ភាពភ័យខ្លាច។ ក្នុងអំឡុងឆ្នាំនៃសោកនាដកម្ម ស្នាមញញឹមបានរលុបបាត់ពីផ្ទៃមុខរបស់ប្រជាជន។ បន្ទាប់មក បន្តិចម្តងៗ ស្នាមញញឹមក៏បានវិលត្រឡប់មកវិញ នៅពេលដែលសន្តិភាពត្រូវបានស្តារឡើងវិញ។ វាមិនបំភ្លេចអ្វីទាំងអស់ ប៉ុន្តែវាបានជ្រើសរើសយកការផ្សះផ្សា»។
ព្រះករុណាជាអម្ចាស់ជីវិតលើត្បូង បានសង្កត់ធ្ងន់ថា បទពិសោធន៍របស់កម្ពុជាបានបង្ហាញឱ្យឃើញថា ប្រទេសជាតិមួយមិនអាចកសាងឡើងវិញតាមរយៈការសងសឹកបានឡើយ ប៉ុន្តែត្រូវកសាងឡើងតាមរយៈការផ្សះផ្សា ការយោគយល់គ្នា និងការគោរពគ្នាទៅវិញទៅមក។
ព្រះមហាក្សត្របានយាងអញ្ជើញប្រតិភូអន្តរជាតិដែលចូលរួមកិច្ចប្រជុំកំពូលនេះ ឱ្យនាំយកសារនៃសន្តិភាព និងការផ្សះផ្សារបស់កម្ពុជាទៅជាមួយផង ដោយព្រះអង្គបានពណ៌នាថា សន្តិភាពមិនមែនគ្រាន់តែជាការប្តេជ្ញាចិត្តជាអន្តរជាតិប៉ុណ្ណោះទេ ប៉ុន្តែក៏ជាអ្វីដែលឆ្លុះបញ្ចាំងនៅក្នុងទំនាក់ទំនងប្រចាំថ្ងៃរបស់មនុស្សផងដែរ។
ព្រះអង្គបានមានព្រះរាជបន្ទូលថា៖ «យើងខ្ញុំសូមឱ្យលោកអ្នកនាំយកស្នាមញញឹមនេះចេញពីរាជធានីភ្នំពេញទៅជាមួយ។ នៅកម្ពុជា សន្តិភាពចាប់ផ្តើមដោយស្នាមញញឹមដែលផ្តល់ឱ្យគ្នាទៅវិញទៅមករៀងរាល់ព្រឹក និងដោយការលាតដៃស្វាគមន៍។ យើងខ្ញុំសូមលាតដៃនោះជូនចំពោះលោកអ្នក»។
ជាទីបញ្ចប់ ព្រះករុណាជាអម្ចាស់ជីវិតលើត្បូង បានប្រសិទ្ធពរជ័យឱ្យកិច្ចប្រជុំកំពូលទទួលបានជោគជ័យគ្រប់ប្រការ និងសម្តែងព្រះរាជហឫទ័យសង្ឃឹមថា ការជួបជុំនៅរាជធានីភ្នំពេញនេះនឹងបន្សល់ទុកនូវស្លាកស្នាមដ៏យូរអង្វែងក្នុងប្រវត្តិសាស្ត្រនៃគ្រួសារហ្វ្រង់កូហ្វូនី។
ព្រះមហាក្សត្រមានព្រះរាជបន្ទូលថា៖ «សូមស្វាគមន៍ — សូមឱ្យសន្តិភាព ស្ថិតនៅជាមួយលោកអ្នកនៅថ្ងៃនេះ និងយូរអង្វែងតទៅមុខទៀត បន្ទាប់ពីកិច្ចប្រជុំកំពូលនេះ»។
