អគ្គលេខាធិការអង្គការ OIF អំពាវនាវឱ្យមានការដោះស្រាយជម្លោះដោយសន្តិវិធី និងពហុភាគីនិយមកាន់តែរឹងមាំ
លោកជំទាវ Louise Mushikiwabo អគ្គលេខាធិការនៃអង្គការអន្តរជាតិហ្វ្រង់កូហ្វូនី (OIF) បានអំពាវនាវដល់បណ្តាប្រទេសនិយាយភាសាបារាំង ឱ្យពង្រឹងការប្តេជ្ញាចិត្តរួមគ្នាចំពោះសន្តិភាព ការដោះស្រាយជម្លោះដោយសន្តិវិធី និងពហុភាគីនិយម ដោយជំរុញឱ្យអង្គការនេះដើរតួនាទីកាន់តែសកម្មក្នុងការដោះស្រាយបញ្ហាប្រឈមសកល។
ថ្លែងក្នុងពិធីបើកកិច្ចប្រជុំកំពូលហ្វ្រង់កូហ្វូនីលើកទី២០ នៅរាជធានីភ្នំពេញ កាលពីថ្ងៃសៅរ៍ ក្រោមមូលបទ «វិនិយោគឡើងវិញលើសន្តិភាព ដើម្បីវិបុលភាពរួម និងស្ថិរភាពយូរអង្វែង» លោកជំទាវបានសង្កត់ធ្ងន់ថា សន្តិភាពត្រូវតែនៅតែជាអាទិភាពជាមូលដ្ឋាន ចំពេលដែលវិបត្តិ និងជម្លោះសកលកំពុងកើនឡើង។
លោកជំទាវបានមានប្រសាសន៍ថា៖ «ការវិនិយោគឡើងវិញលើសន្តិភាព មានន័យថាជាការបដិសេធមិនឱ្យអស្ថិរភាពក្លាយជារឿងធម្មតា។ វាមានន័យថាជាការបដិសេធមិនឱ្យទុក្ខវេទនារបស់មនុស្សជាតិក្លាយជាទម្លាប់»។
ដោយគូសបញ្ជាក់ពីបទពិសោធន៍ប្រវត្តិសាស្ត្ររបស់កម្ពុជា អគ្គលេខាធិការអង្គការ OIF បានកត់សម្គាល់ថា ព្រះរាជាណាចក្រកម្ពុជាបានឆ្លងកាត់សង្គ្រាម និងអំពើប្រល័យពូជសាសន៍ មុននឹងចាប់ផ្តើមដំណើរដ៏វែងឆ្ងាយនៃការកសាងជាតិឡើងវិញ។ លោកជំទាវ Louise Mushikiwabo បានរំលឹកឡើងវិញថា កិច្ចព្រមព្រៀងសន្តិភាពទីក្រុងប៉ារីស ដែលត្រូវបានចុះហត្ថលេខាកាលពី ៣៥ ឆ្នាំមុន បានត្រួសត្រាយផ្លូវសម្រាប់ការកសាងប្រទេសកម្ពុជាឡើងវិញ តាមរយៈកិច្ចខិតខំប្រឹងប្រែងផ្នែកការទូតរួមគ្នាប្រកបដោយនិរន្តរភាព។
លោកជំទាវ Louise Mushikiwabo បានមានប្រសាសន៍ថា បទពិសោធន៍របស់កម្ពុជាបានផ្តល់នូវការរំលឹកដ៏សំខាន់អំពីតម្លៃដ៏មហន្តរាយនៃការបំផ្លិចបំផ្លាញមនុស្សជាតិ និងសារៈសំខាន់ដែលមិនអាចកាត់ថ្លៃបាននៃសន្តិភាព ដែលធ្វើឱ្យរាជធានីភ្នំពេញក្លាយជាទីកន្លែងដ៏មានអត្ថន័យសម្រាប់ថ្នាក់ដឹកនាំហ្វ្រង់កូហ្វូនី ក្នុងការឆ្លុះបញ្ចាំងពីមធ្យោបាយដើម្បីលើកកម្ពស់ការផ្សះផ្សាជាតិ និងស្ថិរភាព។
លោកជំទាវអគ្គលេខាធិការក៏បានគូសបញ្ជាក់ផងដែរអំពីសារៈសំខាន់នៃការពង្រឹងពហុភាគីនិយម និងសាមគ្គីភាពក្នុងចំណោមប្រទេសហ្វ្រង់កូហ្វូនី ដោយពណ៌នាថា អង្គការ OIF មិនមែនគ្រាន់តែជាអង្គការសម្រាប់កិច្ចសហប្រតិបត្តិការប៉ុណ្ណោះទេ ប៉ុន្តែក៏ជាសំឡេងនយោបាយនៅលើឆាកអន្តរជាតិផងដែរ។
លោកជំទាវ Louise Mushikiwabo បានអំពាវនាវឱ្យមានសំឡេងរួមគ្នាកាន់តែរឹងមាំក្នុងការដោះស្រាយបញ្ហាសកលសំខាន់ៗ រួមមានការផ្លាស់ប្តូរសណ្តាប់ធ្នាប់ពហុភាគី ការការពារពហុភាសានិយម និងអភិបាលកិច្ចនៃបច្ចេកវិទ្យាឌីជីថល និងបញ្ញាសិប្បនិម្មិត (AI)។
សម្លឹងទៅមុខ លោកជំទាវ Louise Mushikiwabo បានអំពាវនាវដល់ប្រមុខរដ្ឋ និងប្រមុខរដ្ឋាភិបាលដែលចូលរួមកិច្ចប្រជុំកំពូលនៅរាជធានីភ្នំពេញ ឱ្យប្រើប្រាស់ការជួបជុំនេះជាឱកាសដើម្បីកំណត់វិធានការចាំបាច់នានាសម្រាប់ពង្រឹងសន្តិភាពយូរអង្វែង ដោយគិតគូរពីចំណុចខ្លាំង និងផលប្រយោជន៍របស់ប្រទេសនីមួយៗ។
លោកជំទាវ Louise Mushikiwabo បានសម្តែងក្តីសង្ឃឹមថា កិច្ចប្រជុំកំពូលនេះនឹងត្រូវបានចងចាំទុកជាចំណុចរបត់មួយ ដែលសហគមន៍ហ្វ្រង់កូហ្វូនីបានសម្រេចចិត្តពង្រឹងការរួមចំណែករបស់ខ្លួនក្នុងការការពារសន្តិភាព នៅក្នុងគ្រាដ៏សំខាន់សម្រាប់សង្គមនានានៅជុំវិញពិភពលោក។ លោកជំទាវក៏បានកោតសរសើរប្រជាជនកម្ពុជា ដែលបានជ្រើសរើសយកការកសាងឡើងវិញ ឯកភាពជាតិ និងវឌ្ឍនភាព ជាមាគ៌ាឆ្ពោះទៅរកសន្តិភាព ដោយទទួលបានការបំផុសគំនិតពីភាពធន់ជាប្រវត្តិសាស្ត្រ និងការប្តេជ្ញាចិត្តរបស់ប្រទេសជាតិក្នុងការកសាងអនាគតប្រកបដោយសន្តិភាព។
