ប្រមុខរាជរដ្ឋាភិបាល ប្រកាស​ផ្តល់​ក្របខ័ណ្ឌ​ដល់សាច់ញាតិ យោធិនពលីទាំង ២០នាក់ដែល​ស្លាប់​ក្នុង​ឧបទ្ទវហេតុផ្ទុះគ្រាប់ នៅយោធភូមិភាគទី៣

សម្តេចមហាបវរធិបតី នាយករដ្ឋមន្រ្តី ហ៊ុន ម៉ាណែត បាន​ប្រកាសតាមរយៈបណ្តាញហ្វេសប៊ុកនាថ្ងៃទី​៦ ខែឧសភា ឆ្នាំ​២០២៤នេះ ផ្តល់ក្របខ័ណ្ឌជូនដល់សាច់ញាតិបង្កើតរបស់យោធិនពលីទាំង ២០នាក់ដែល​បានស្លាប់​ក្នុង​ករណីផ្ទុះគ្រាប់ កាលពីថ្ងៃទី​២៧ ខែមេសាកន្លងទៅនេះ។

សម្តេចធិបតីបានលើកឡើងថា ៖ «ខ្ញុំបានឃើញសាររបស់ក្មួយ ជាសំណាង រស្មីសត្យា ជាកូនប​ង្កើតរបស់វរសេនីយ៍ទោ ជា សំណា​ង ជាយោធិនដែលបានពលីក្នុងឧបទ្ទវហេតុផ្ទុះគ្រាប់នៅយោ​ធភូមិភាគទី៣ ដោយក្មួយបានស្នើសុំក្របខ័ណ្ឌ ចូលបម្រើក្នុងជួរកងយោធពលខេមរភូមិន្ទដើម្បីបានបន្តវេនតពីឪពុក។ ខ្ញុំឯកភាពតាមសំណើរបស់ក្មួយប្រុស រស្មីសត្យា»។ ​

សម្តេចបានបញ្ជាក់បន្ថែមទៀតថា ៖ «មិនត្រឹមតែសម្រាប់ក្មួយប្រុស រស្មីសត្យា តែម្នាក់ទេ ខ្ញុំនឹងផ្តល់ក្របខ័ណ្ឌជូនដល់សាច់ញាតិបង្កើត របស់យោធិនពលីទាំង ២០នាក់ (អាចជាកូន ជាចៅ ឬជាបងប្អូនបង្កើត និងអាចជាស្រី ឬជាប្រុសក៏បាន) ដើម្បីអាចបានចូលបម្រើក្នុងជួរកងទ័ពបន្ត​វេ​ន​ពីឪពុក ឬបងប្អូនរបស់គាត់»​។

កាលពី​ថ្ងៃទី​៤ ខែឧសភា កន្លងទៅ យុវជន ជាសំណាង រស្មីសត្យា អាយុ២៣ឆ្នាំ ដែលជាកូនប្រុ​ស​របស់​យោធិនរបស់វរសេនីយ៍ទោ ជា សំណាង ជាយោធិនដែលបានពលីក្នុងឧបទ្ទវហេតុផ្ទុះគ្រាប់នៅយោធភូមិភាគទី៣ បានសរសេរលើហ្វេសប៊ុកថា ខ្លួន​បញ្ចប់ការសិក្សាចប់ថ្នាក់ទី១២ (សញ្ញាបត្រមធ្យមសិក្សាទុតិយភូមិ) បច្ចុប្បន្នមិនមានការងារអ្វីទេ សុខភាពល្អធម្មតា ដែលត្រូវជា​កូនច្បងលោក ជា សំណាង។

យុវជនរូបនេះបានលើកឡើងថា ៖ « សូមគោរពដល់សម្ដេចមហាបវរធិបតី ហ៊ុន ម៉ាណែត ជាទីគោរព ខ្ញុំបាទមានបំណងបន្តវេនពីឪពុកចូលបម្រើការងារយោធានៅខេត្តកោះកុងបន្ដទៀត ដើ​ម្បី​បានប្រាក់ខែចិញ្ចឹមម្ដាយ ប្អូនៗនិងជីដូនចាស់ជរា ព្រោះសព្វថ្ងៃក្រុមគ្រួសារខ្ញុំ គ្មានអ្វីទីពឹង សូ​មសម្ដេច ហ៊ុន ម៉ាណែត សម្ដេចតា មេត្តាជួយសម្រេចបំណងខ្ញុំបាទផង»។​

បន្ទាប់ពី​សម្តេចធិបតីបាន​ប្រកាស​ផ្តល់ក្របខ័ណ្ឌ​នេះ យុវជន ជាសំណាង រស្មីសត្យា បាន​បង្ហោះសារតាម​ហ្វេសប៊ុក នាថ្ងៃទី​៦ ខែឧសភានេះដែរថា ៖ «ពិតជាមានសេចក្ដីរំភើបជាខ្លាំងពេលដែលបានឃើញសារបង្ហោះរបស់សម្ដេចបវរធិបតី ហ៊ុន ម៉ាណែត បែបនេះ»។

សូមរម្លឹកផងដែរថា យ៉ាងហោចណាស់ យោធិន​ចំនួន២០នាក់​បាន​ស្លាប់ និង​មួយ​ចំនួន​ទៀត​រងរបួស ហើយ​អគារ​កងទ័ព​និង​ផ្ទះ​សម្បែង​ប្រជាពលរដ្ឋ​ជិត ១០០ ខ្នង​ក៏​រង​ការខូចខាត ដោយ​សា​រ​ការផ្ទុះ​ឃ្លាំង​ស្តុក​គ្រាប់​នៅ​បន្ទាយ​យោធភូមិភាគ​ទី៣ ស្ថិតនៅ​ភូមិ​បុរី​កម្មករ សង្កាត់​ច្បារមន ក្រុ​ង​​ច្បារមន ខេត្តកំពង់ស្ពឺ កាលពី​វេលា​ម៉ោង ២និង២៥នាទី​រសៀល​ថ្ងៃ​​ទី២៧ ខែមេសា​ ឆ្នាំ​២០២៤​៕