បារាំង សហរដ្ឋអាម៉េរិក និងសម្ព័ន្ធមិត្ត អំពាវនាវឲ្យមានបទឈប់បាញ់នៅលីបង់

កាលពីថ្ងៃពុធ ទី២៥ ខែកញ្ញា យោងតាមសេចក្តីប្រកាសរួមមួយដែលផ្សព្វផ្សាយដោយសេត វិមាន បានឲ្យដឹងថា ​សហរដ្ឋអាម៉េរិក បារាំង សហគមន៍អឺរ៉ុប និងប្រទេសអារ៉ាបជាច្រើន បាន អំពាវនាវឲ្យមានការឈប់បាញ់ជាបន្ទាន់រយៈពេល ២១ថ្ងៃ នៅលីបង់ ដែលជម្លោះរវាង អ៊ីស្រាអែល និងហេហ្សបូឡា កំពុងគំរាមនឹងឆាបឆេះពេញនៅក្នុងតំបន់។

សេចក្តីប្រកាសដែលចុះហត្ថលេខាដោយសហរដ្ឋអាម៉េរិក បារាំង សហគមន៍អឺរ៉ុប អូស្រ្តាលី កាណាដា អាឡឺម៉ង អ៊ីតាលី ជប៉ុន អារ៉ាប៊ី សាអ៊ូឌីត អារ៉ាបរួម អេមីរ៉េត និងកាតា មានន័យថា ៖ ”យើងអំពាវនាវឲ្យមានការឈប់បាញ់ជាបន្ទាន់រយៈពេល ២១ថ្ងៃ នៅព្រំដែនរវាង​លីបង់ និង​អ៊ីស្រាអែល​ដើម្បីផ្តល់សំណាងសម្រាប់ការទូត ក្នុងទំនាក់ទំនងជាមួយស្ថានភាពនៅលីបង់ និង​នៅហ្គាហ្សា។”

នៅក្នុងសេកចក្តីប្រកាសរួមមួយដាច់ដោយឡែក ដែលត្រូវបានផ្សព្វផ្សាយ បន្ទាប់ពី​ជំនួប​របស់​ពួកគេ​​នៅខាងក្រៅសមាជនៃអង្គការសហប្រជាជាតិនៅទីក្រុងញូយ៉ក ប្រធានាធិបតីអាម៉េរិក លោកចូ បាយឌិន ប្រធានាធិបតីបារាំង លោកអេម៉ានូអែល ម៉ាក្រុង បញ្ជាក់ថា បានធ្វើការ​ជាមួយ​គ្នា​នៅ​ប៉ុន្មានថ្ងៃចុងក្រោយនេះដើម្បីឈានទៅដល់ការអំពាវនាវរួមគ្នាសម្រាប់ការឈប់​បាញ់​បណ្តោះអាសន្ន ហើយក៏បានចូលរួមពីប្រទេសនានាផងដែរ។

កាលពីថ្ងៃពុធ ប្រមុខការទូតបារាំង នៅអំឡុងកិច្ចប្រជុំបន្ទាន់នៃក្រុមប្រឹក្សាសន្តិសុខអង្គការ​សហ​ប្រជាជាតិ បានថ្លែងថា ប្រទេសបារាំង ក្នុងដៃគូជាមួយសហរដ្ឋអាម៉េរិក ស្នើនូវការ​ឈប់​បាញ់​បណ្តោះអាសន្នរយៈពេល ២១ថ្ងៃ នៅលីបង់ ដើម្បីកិច្ចចចារវាងអីស្រាអែល និង​ក្រុម​ហេហ្សបូឡា។ នៅទីក្រុងញូយ៉ក លោកហ្សង់ ណូអែល បារ៉ូត បានលើកឡើងថា ៖ “ប៉ុន្មាន​ថ្ងៃ​ចុង​ក្រោយនេះ យើងបានធ្វើការជាមួយដៃគូអាម៉េរិក សម្រាប់​គ្រោងការបទ​ឈប់បាញ់​បណ្តោះ​​អាសន្នរយៈ​ពេល ២១ថ្ងៃ ដើម្បីអនុញ្ញាតឲ្យមានកិច្ចចរចា។” លោកបានបន្ថែមថា ៖ “គ្រោង​ការនេះនឹងត្រូវ​ផ្សព្វ​​ផ្សាយ​ជាសាធារណៈឲ្យបានលឿនបំផុត ​ហើយយើង​មានទំនុកចិត្ត​លើភាគីទាំងពីរថានឹង​យល់​​ព្រម​ចំពោះគ្រោងការនេះ”។

រដ្ឋមន្រ្តី​ក្រសួងការបរទេសបារាំង ដែលជាអ្នកផ្តួចផ្តើមគំនិតសម្រាប់កិច្ចប្រជុំបន្ទាន់នេះ បាន​សង្កត់​ធ្ងន់ថា សង្រ្គាមមិនមែនជៀសមិនរួចនោះទេ គឺនៅក្នុងលក្ខខណ្ឌថា អង្គពាក់ព័ន្ធទាំងអ​ស់ ត្រូវ​តាំង​ចិត្តដោះស្រាយសម្រាប់ឲ្យមានដំណោះស្រាយជម្លោះមួយ។ លោកបានលើក​ឡើង​បន្ត​ថា ៖ “ស្ថានភាពនៅលីបង់នៅពេលនេះ គំរាមនឹងឈានដល់​ចំណុចដែលលែងអាច​ត្រឡប់​ក្រោយ”។ លោកបានព្រមានថា ៖ “សព្វថ្ងៃនេះ ភាពតានតឹងរវាង​ក្រុមហេហ្សបូឡា និង​អ៊ីស្រាអែល​ផ្តល់ហានិភ័យរុញច្រានតំបន់ឲ្យធ្លាក់ទៅក្នុងជម្លោះជាទូទៅ​យ៉ាងឆាប់រហ័ស”។​លោក​ហ្សង់ ណូអែល បារ៉ូត បានរំឭកថា ប្រទេសលីបង់ បានធ្លាក់ទន់ខ្សោយ​យ៉ាងខ្លាំងរួច​ហើយ​ដោយសារវិបត្តិនយោបាយ និងសេដ្ឋកិច្ច។ លោកបានព្រមានថា ៖ “ប្រទេសនេះ មិន​ត្រូវ​ជួបសង្រ្គាមណាមួយទៀតទេ”។

កាលពីថ្ងៃពុធដែរ អគ្គលេខាអង្គការសហប្រជាជាតិ លោកអន់តូនីញ៉ូ ហ្គូទែរ៉េស នៅអំឡុងកិច្ច​ប្រជុំ​​បន្ទាន់នៃក្រុមប្រឹក្សាសន្តិសុខអំពីការវាយប្រហាររបស់អ៊ីស្រាអែលប្រឆាំង​នឹងក្រុម​ហេហ្សបូឡា បានប្រកាសអាសន្នថា  ៖ “ឋាននរកលេចមាននៅលីបង់ដោយហិង្សា”។ លោក​និយាយ​ឡើងវិញថា ពិភពលោកមិនអាចទុកឲ្យលីបង់ក្លាយជាហ្គាហ្ស៉ាមួយទៀតឡើយ។

កាលពីថ្ងៃពុធដែរ រដ្ឋមន្រ្តីកិច្ចការបរទេសអ៊ីរ៉ង់ លោកអាបបាស អារ៉ាជី បានព្រមានថា តំបន់​មជ្ឈិម​បូព៌ាស្ថិតនៅ​មាត់​គែម​​នៃ​មហន្តរាយពេញលេងទាំងស្រុង។ លោកអះអាងថា ទីក្រុង​តេអេរ៉​ង់​​នឹងគាំ​ទ្រប្រទេស​លីបង់​តាម​​គ្រប់មធ្យោបាយនៅក្នុងករណីមានការរីករាលដាល​នៃការ​វាយប្រហាររបស់​អ៊ីស្រាអែល។