នាយករដ្ឋមន្ត្រី៖ បើអាកាសធាតុក្ដៅខ្លាំងលើស ៤០ ដឺក្រេ សាលាមានសិទ្ធិផ្អាក​ការសិ​ក្សាសិ​ន​បាន

សម្តេចបវរធិបតី នាយករដ្ឋមន្រ្តី ហ៊ុន ម៉ាណែត បាន​លើកឡើង​ថា ក្នុង​ករណី​អាកាសធាតុក្តៅខ្លាំងលើស៤០ដឺក្រេ ហើយសាលាមិនអំណោយផល គណៈគ្រប់គ្រងសាលា​អាចមានសិទ្ធិក្នុង​ការផ្អាកការសិក្សាបាន។

សម្តេចធិបតី បានថ្លែងបញ្ជាក់ដូចនេះ នាព្រឹកថ្ងៃទី​១ ខែឧសភា ឆ្នាំ​២០២៤ ក្នុង​ពិធីសំណេះ​សំណាលជាមួយមន្ត្រីរាជការ បុគ្គលិក កម្មករ និយោជិត កំពង់ផែស្វយ័តក្រុងព្រះសីហនុ នាឱកា​ស អបអរសាទរខួបអនុស្សាវរីយ៍ លើកទី១៣៨ នៃទិវាពលកម្មអន្តរជាតិ ០១ ឧសភា ២០២៤។

សម្តេចមានប្រសាសន៍ថា ៖ «បើថ្ងៃណា​ពាក់ព័ន្ធទៅនឹងសីតុណ្ហភាពឡើងលើស​៤០ដឺក្រេ សុំឱ្យពិនិត្យមើល ទី១ម៉ោងពេលវេលារៀន អាចកែម៉ោង​រៀន ទី២ ពាក់ព័ន្ធនឹងទឹកប្រើប្រាស់ និង​ហូប ហើយ​បើចាំបាច់ត្រូវ​ប្រគល់សិទ្ធិឱ្យគណៈគ្រប់គ្រងសាលាក្នុង​ការសម្រេចផ្អាកការសិក្សាថ្ងៃណាដែលសីតុណ្ហភាពឡើងលើស​៤០ដឺក្រេ»។

សម្តេចនាយករដ្ឋមន្រ្តី បានបន្តទៀតថា លោកឃើញមាននៅតាមសាលាខ្លះ សិស្សត្រូវយក​កនន្សែងត្រជាក់ជ្រលក់ទឹក យកមកដាក់លើក្បាល​រាប់ម៉ោង គឺមិនល្អទេ។ ដូចនេះថ្ងៃណាក្តៅខ្លាំង​គណៈគ្រប់គ្រងអាច​ឱ្យសិស្សផ្អាកការសិក្សាសិនបាន​។

សម្តេចបញ្ជាក់ថា ៖ «មិនចំណេញទេមួយថ្ងៃនោះ ដែលត្រូវ​ឱ្យកូនក្មេងតូចៗអង្គុយនៅកន្លែងដែល​មិនអំណោយផល កន្លែងក្តៅខ្លាំងពេក ហើយជាពិសេសថ្ងៃដែលក្តៅខ្លាំង​ លើសពី​៤០ដឺក្រេ»។

សូមបញ្ជាក់ដែរថា កាលពីថ្ងៃទី​៣០ ខែមេសា ក្រសួងអប់រំ យុវជន និង កីឡា បានសម្រេចប្តូរម៉ោ​ងសិក្សារបស់សិស្សានុសិស្ស ដោយសារអាកាសធាតុក្តៅខ្លាំងលើសពី៤០អង្សារសេ ដែល​ការប្តូរម៉ោងសិក្សានេះ គឺធ្វើឡើងនៅទូទាំងប្រទេសកម្ពុជា៕

​