ទីក្រុងគៀវ និងខាឃីវ ជាថ្មី គឺជាគោលដៅវាយប្រហារពីមីស៊ីលរបស់រុស្ស៊ី

កាលពីថ្ងៃអង្គារ ប្រទេសរុស្ស៊ីបានវាយប្រហារមីស៊ីលជាច្រើនលើទីក្រុងគៀវ ដែល​បង្កជា​ការ ដាច់ចរន្តអគ្គីសនី នៅក្នុងតំបន់ជាច្រើន​នៃទីក្រុង។ នៅថ្ងៃចន្ទ លោកវ្លាឌីមៀ ពូទីន ក៏បាន សន្យានឹងសងសឹកចំពោះ​ការស្លាប់របស់ជនស៊ីវិលរុស្ស៊ីជាច្រើន​នៅអំឡុងការវាយ​ប្រហារ​របស់​អ៊ុយក្រែន​លើ​ទីក្រុងរុស្ស៊ីបេលហ្គារ៉ូដ។

យោងតាមយោធាអ៊ុយក្រែន ដែលបានបាញ់ទម្លាក់មីស៊ីលរុស្ស៊ី ៧២គ្រាប់ បានឲ្យដឹងថា កាល​ពី​ថ្ងៃអង្គារទី២ ខែមករា ការវាយប្រហារជាបន្តបន្ទាប់តាមផ្លូវអាកាសលើអ៊ុយក្រែន ជាការ​វាយ​​ប្រហារមីស៊ីលប្រឆាំងនឹងទីក្រុងគៀវ ជាមួយនឹង​ការផ្ទុះដ៏មានកម្លាំងខ្លាំង ផ្ទុះឡើង និង​ព្រមទាំងមានការវាយប្រហារ​ទីក្រុងខាឃីវ។ ជាសរុប​ មីស៊ីលចំនួន៩៩គ្រាប់ បាញ់សំដៅ​មក​កាន់​អ៊ុយក្រែន។ យោងតាមអាជ្ញាធរអ៊ុយក្រែន បានឲ្យដឹងថា យ៉ាងហោចណាស់ មនុស្ស ៥នាក់ បានស្លាប់ និងមនុស្សជាង ១០០នាក់​បានរងរបួស។

ប្រធានាធិបតីអ៊ុយក្រែន លោកវ៉ូឡូឌីមៀ ហ្សេឡេនស្គី បានរៀបរាប់ថា ៖ “រុស្ស៊ីបាន​បង្ហាញ​ភាព​អមនុស្សសាជាថ្មី”។

នៅទីក្រុងគៀវ អគារនៃសង្កាត់ សូឡូមីញ៉ងស្គី ជិតមណ្ឌលកណ្តាល បានរងការប៉ះពាល់ ហើយ​បង្អួចជាច្រើនត្រូវបានបំផ្លាញ។ អ្នកពន្លត់អគ្គីភ័យ និងសន្តិសុខ ប្រញាប់ធ្វើការ ហើយ​ឃើញ​មានផ្សែងហ៊ុយចេញពីអគារជាច្រើន។

លោកវីតាលី គ្លីតឆកូ ចៅហ្វាយក្រុងគៀវ បានថ្លែងថា មនុស្សពីរនាក់បានស្លាប់ និង ៤៩​នាក់ទៀត បានរងរបួស។

ចំណែករដ្ឋមន្រ្តីក្រសួងមហាផ្ទៃអ៊ុយក្រែន បាននិយាយអំពីការទម្លាក់គ្រាប់បែកដ៏ច្រើនសម្បើម​របស់​រុស្ស៊ី និងបញ្ជាក់ថា អគារលំនៅដ្ឋាន ឃ្លាំងទំនិញ និងហេដ្ឋារចនាសម្ព័ន្ធសំខាន់ៗ ត្រូវ​រង​ការ​ខូចខាត។

នៅក្នុងសង្កាត់ ប៉ូឌីល នៃរដ្ឋធានីអ៊ុយក្រែន អគ្គីភ័យនៅឆេះនៅឡើងនៅកន្លែងពីរ។ យោង​តាម​ប្រភពរបស់អ៊ុយក្រែនបានឲ្យដឹងដែរថា ជនស៊ីវិលពីរនាក់បានស្លាប់ និង ១៦នាក់ទៀត បាន​រងរបួស ក្នុងមានក្មេងម្នាក់ នៅក្នុងការវាយ​ប្រហាររបស់រុស្ស៊ី​នៅក្នុងតំបន់គៀវ។

រដ្ឋមន្រ្តីក្រសួងថាមពលអ៊ុយក្រែន បានឲ្យដឹងថា ប្រជាជនច្រើនជាង ៨៦០០០នាក់ នៃទីក្រុង​គៀវ និងនៅតំបន់ជុំវិញ ស្ថិតនៅដោយគ្មានអគ្គីសនី​ប្រើប្រាស់ បន្ទាប់ពីការទម្លាក់គ្រាប់បែក។

យោងតាមប្រមុខយោធាតំបន់ បានឲ្យដឹងថា យ៉ាងហោចណាស់ មានការវាយប្រហារចំនួន ៤ដង បានប៉ះពាល់ទីក្រុង ខាឃៀវ នៅភាគខាងកើតប្រទេសអ៊ុយក្រែន និងបាន​សម្លាប់​យ៉ាង​ហោច​ណាស់មនុស្សម្នាក់។ មនុស្ស ៤៧នាក់ទៀត បានរងរបួស។ ប្រភពដដែលបានឲ្យដឹងថា អគារស្នាក់នៅដែលមានច្រើនជាន់ និងហេដ្ឋារចនាសម្ព័ន្ធស៊ីវិល ក៏រងការខូចខាត។

ចំណែកក្រសួងការពារជាតិរុស្ស៊ី កាលពីថ្ងៃអង្គារ បានបញ្ជាក់ថា រុស្ស៊ីបានបំផ្លាញគ្រប់គោល​ដៅ​ដែលបានកំណត់។ ដូចតាមទម្លាប់ ទីក្រុងមូស្គូ បានអះអាងអំពីការដាក់គោលដៅ​វាយ​ប្រហា​រដែលស្របច្បាប់ ដូចជា សហគ្រាស់អ៊ុយក្រែនដែលផលិតមីស៊ីល ដ្រូន កន្លែង​ជួសជុល​អាវុធ និងសម្ភារៈយោធា មជ្ឈមណ្ឌលផ្ទុកមីស៊ីល គ្រាប់រំសេវ និងសព្វាវុធផ្លូវអាកាស​ដែល​ប្រទេសលោកខាងលិចផ្គត់ផ្គង់ដល់របបទីក្រុងគៀវ។

ជាការសងសឹកចំពោះការវាយប្រហារទាំងនេះ យោធាអ៊ុយក្រែនបានបាញ់មីស៊ីល​លើតំបន់​ព្រំដែន​រុស្ស៊ីនៅទីក្រុងបែលហ្គារ៉ូដ។ ក្រសួងការពារជាតិរុស្ស៊ីអះអាងថា បានបាញ់ទម្លាក់​មីស៊ីល​​របស់​អ៊ុយក្រែនចំនួន ១៧គ្រាប់។

នៅក្នុងសេចក្តីប្រកាសមួយ ប្រមុខការទូតអ៊ុយក្រែន លោកឌីមីត្រូ គូឡឺបា បានអំពាវនាវ​ទៅ​កាន់​លោកខាងលិចឲ្យប្រតិកម្មក្នុងរបៀបដាច់ខាត ចំពោះការទម្លាក់គ្រាប់បែករបស់រុស្ស៊ី។