ទាហានអង់គ្លេសអាចត្រូវដាក់ពង្រាយក្នុងតំបន់ហ្គាហ្សាដើម្បីជួយផ្តល់ជំនួយតាមផ្លូវសមុទ្រថ្មី ដែលសហគមន៍អន្តរជាតិជួយដល់ពលរដ្ឋរងគ្រោះនៅហ្គាហ្សា។
ទូរទស្សន៍BBC បានរាយការណ៍ថា គ្មានកងកម្លាំងអាមេរិកណាម្នាក់នឹងត្រូវដាក់ពង្រាយតាមច្រាំងសមុទ្រនៅមជ្ឈឹមបូព៌ាទេ តែទោះជាយ៉ាងណាក៏ដោយ ចក្រភពអង់គ្លេសត្រូវបានគេរាយការណ៍ថាកំពុងពិចារណាលើការបញ្ជូនទាហាននៅពេលដែលច្រករបៀងជំនួយបើក។
ប្រភពដដែលបានអះអាងថា ជំនួយនឹងត្រូវបានបញ្ជូនទៅ ហ្គាហ្សា ដោយចេញពីកោះស៊ីប មុនពេលត្រូវបានផ្ទេរទៅឡានដឹកទំនិញ និងនាវាតូចៗ។
មានសេចក្តីរាយការណ៍ថា នៅពេលនេះក្រុមហាម៉ាសកំពុងពិនិត្យមើលការឆ្លើយតបរបស់អ៊ីស្រាអែលចំពោះសំណើឲ្យមានបទឈប់បាញ់នៅតំបន់ហ្គាហ្សា។
ក្រុមជនប្រដាប់អាវុធនេះបានប្រកាសថាខ្លួនបើកចំហចំពោះសំណើណាមួយសម្រាប់ការបញ្ចប់អរិភាពនៅក្នុងតំបន់ហ្គាហ្សា។
នៅពេលនេះប្រទេសកាតា អេហ្ស៊ីប និងសហរដ្ឋអាមេរិកកំពុងស្វែងរកកិច្ចព្រមព្រៀងមួយសម្រាប់ការដោះដូរអ្នកទោស និងបទឈប់បាញ់លើកទីពីរ។
ចាប់តាំងពីជម្លោះបានផ្ទុះឡើង យ៉ាងហោចណាស់ប្រជាជនប៉ាឡេស្ទីន ៣៤ ៣០០ នាក់ត្រូវបានសម្លាប់នៅក្នុងការវាយប្រហាររបស់អ៊ីស្រាអែលលើតំបន់ហ្គាហ្សា និងប្រហែល ១ ២០០ នាក់បានស្លាប់នៅក្នុងការវាយប្រហាររបស់ក្រុមហាម៉ាសលើអ៊ីស្រាអែល៕
Daily Program
