ទទួលរងការគំរាមដកតំណែង ប្រធានាធិបតីកូរ៉េខាងត្បូង លោកយូន ស៊ុកយូល ចង់ប្រយុទ្ធ រហូតដល់នាទីចុងក្រោយ
កាលពីថ្ងៃព្រហស្បតិ៍ ទី១១ ខែធ្នូ នៅអំឡុងសេចក្តីថ្លែងសន្ទរកថា តាមកញ្ចក់ទូរទស្សន៍ ប្រធានាធិបតីកូរ៉េខាងត្បូង លោកយូន ស៊ុកយូល បានសន្យានឹងប្រយុទ្ធរហូតដល់នាទីចុងក្រោយ។ គណបក្សប្រឆាំងត្រូវលោកចោទប្រកាន់ ដែលមានតំណាងរាស្រ្តគ្រោងនឹងបោះឆ្នោតនៅថ្ងៃសៅរ៍ ដើម្បីដកតំណែងលោក ថាអាចនឹងបង្កជាវិបត្តិឲ្យជាតិ។
ការផ្លាស់ប្តូរភ្លាមៗ នៃស្ថានភាពនៅកូរ៉េខាងត្បូង ប្រធានាធិបតីលោកយូន ស៊ុកយូល មានហានិភ័យរងការដកតំណែងបន្ទាប់ពីការប៉ុងប៉ង់របស់លោកក្នុងការដាក់ច្បាប់អាជ្ញាសឹក កាលពីសប្តាហ៍មុន។ លោកយូន ស៊ុកយូល បានបញ្ជាក់កាលពីថ្ងៃទី១១ ខែធ្នូ ថា លោកនឹងប្រយុទ្ធរហូតដល់នាទីចុងក្រោយ និងចោទប្រកាន់បក្សប្រឆាំងក្នុងការបង្កើតវិបត្តិឲ្យជាតិ។
លោកយូន ស៊ុកយូល បានបន្ទោសថា សភាដែលត្រូវបានគ្រប់គ្រងដោយគណបក្សប្រឆាំង គ្រោងធ្វើការបោះឆ្នោតនៅថ្ងៃសៅរ៍ ដើម្បីដកលោកចេញពីតួនាទី។ សភាបានក្លាយជាបិសាចដែលបំផ្លាញសណ្តាប់ធ្នាប់ធម្មនុញ្ញនៃប្រជាធិបតេយ្យសេរី។ មេដឹកនាំកូរ៉េខាងត្បូងធ្វើការសង្កត់ធ្ងន់ថា លោកនឹងប្រយុទ្ធជាមួយប្រជាជនរហូតដល់នាទីចុងក្រោយ។
ដោយលើកឡើងមានជាអាទិ៍ការលំបាកនឹងធ្វើឲ្យមានការបោះឆ្នោតអនុម័តថវិកា លោកបានធ្វើឲ្យប្រទេសប៉ះទង្គិចដោយការដាក់ច្បាប់អាជ្ញាសឹក ដែលគួរឲ្យភ្ញាក់ផ្អើលនៅក្នុងរាត្រីពីថ្ងៃទី៣ ដល់ថ្ងៃទី៤ ខែធ្នូ មុននឹងតម្រូវឲ្យដកវិញនៅពេល ៦ម៉ោងក្រោយមក នៅក្រោមសំពាធរបស់សភា និងប្រជាជនដែលចុះតាមដងផ្លូវ។
បន្តិចក្រោយមក លោកយូន ស៊ុកយូល បានរួចខ្លួនពីការដោះឆ្នោតសម្តែងការមិនទុកចិត្តដោយសភាជាតិ ដោយការសង្រ្គោះពីគណបក្សរបស់លោក។ ប៉ុន្តែគណបក្សប្រជាធិបតេយ្យ បានកំណត់ថ្ងៃសៅរ៍ ទី១៤ ខែធ្នូ សម្រាប់ការបោះឆ្នោតដកតំណែងជាលើកទី២។
ប្រសិនបើសមាជិក ៨រូប មកពីគណបក្សអំណាចប្រជាជន (PPP) របស់លោកយូន ស៊ុកយូល គាំទ្រការបោះឆ្នោតថ្មីនេះដែរ ច្បាប់ដកលោកប្រធានាធិបតីនឹងត្រូវអនុម័ត។ សម្រាប់ការប៉ុនប៉ុងជាលើកទី១ នៅថ្ងៃទី៧ ខែធ្នូ មានតែសមាជិកពីររូបនៃគណបក្សលោកដែលបោះឆ្នោតគាំទ្រឲ្យដក។ តាំងពីថ្ងៃអង្គារ សមាជិក ៣រូបទៀត នៃគណបក្សរបស់លោកបានប្រកាសថា ពួកគេនឹងគាំទ្រឲ្យដករូបលោកពីប្រធានាធិបតី។
ប្រធានាធិបតីកូរ៉េខាងត្បូងបានថ្លែងថា លោកសូមទោសជាថ្មីចំពោះប្រជាជនដែលត្រូវមានការភ្ញាក់ផ្អើល និងព្រួយបារម្ភក្នុងហេតុផលនៃច្បាប់អាជ្ញាសឹក (…) លោកអង្វរឲ្យជឿលើភាពស្មោះត្រង់ដ៏កក់ក្តៅរបស់លោកសម្រាប់ប្រជាជនកូរ៉េខាងត្បូង។ លោកបានអះអាងថា លោកមិនគេចពីទំនួលខុសត្រូវរបស់លោកខាងផ្លូវច្បាប់ និងផ្លូវនយោបាយ ដែលពាក់ព័ន្ធនឹងការប្រកាសអំពីច្បាប់អាជ្ញាសឹកនោះទេ។
ដោយត្រូវដាក់ជាគោលដៅក្នុងការស៊ើបអង្កេតពីបទ បះបោរ លោកយូន ស៊ុកយូល អាយុ ៦៣ឆ្នាំ ត្រូវបានហាមឃាត់មិនឲ្យចាកចេញពីប្រទេស ក៏ដូចជា រដ្ឋមន្រ្តីក្រសួងការពារជាតិ រដ្ឋមន្រ្តីក្រសួងមហាផ្ទៃ និងមេបញ្ជាការនៃច្បាប់អាជ្ញាសឹកមួយរយៈពេលខ្លី។ មន្រ្តីប៉ូលីសជាន់ខ្ពស់ពីររូបទៀត ក៏ត្រូវបានឃាត់ខ្លួនផងដែរ។
សំពាធរបស់ប្រជាជននៅតែខ្លាំង បាតុកររាប់ពាន់នាក់ បានប្រមូលផ្តុំកាលពីថ្ងៃពុធនៅពីមុខសភា និងច្រៀងចម្រៀងខេប៉ុប ដោយគ្រវីដំបងបំភ្លឺមានពណ៌ និងកាន់ផ្លាកដែលទាមទារឲ្យរំលាយគណបក្ស PPP ដែលគាំទ្រដល់ការបះបោរ។
កាលពីថ្ងៃអង្គារ ក្រុមការងាររបស់ PPP បានស្នើអំពីផែនទីបង្ហាញផ្លូវអំពីការដកថយរបស់ប្រធានាធិបតី។ ក្រុមការងារសន្យាអំពីការលាលែងរបស់លោកយូន ស៊ុកយូល នៅខែកុម្ភៈ ឬខែមីនា ជាមួយនឹងការបោះឆ្នោតប្រធានាធិបតីថ្មីនៅខែមេសា ឬឧសភា។ ផែនការនេះមិនទាន់ត្រូវបានទទួលការយល់ព្រមពីគណបក្ស PPP ទាំងមូលទេ។
Daily Program
