ថ្នាក់ដឹកនាំ​ក្រសួង​ចំនួន​៣ ​សិក្សា និងរៀបចំគម្រោងពាក់ព័ន្ធនឹងវិស័យកសិកម្ម ធនធានទឹក និងអភិវឌ្ឍន៍ជនបទ

នា​ថ្ងៃទី៦ ខែឧសភា ឆ្នាំ២០២៤ នេះ រដ្ឋមន្រ្តីនៃក្រសួង​ចំនួន​៣បាន​ចូលរួមកិច្ចប្រជុំអន្តរក្រសួង ស្ដីពីកសិកម្ម ធនធានទឹក និងអភិវឌ្ឍន៍ជនបទ ​នាសាលប្រជុំទីស្តីការក្រសួងកសិកម្ម រុក្ខាប្រ​មាញ់ និងនេសាទ។

រដ្ឋមន្រ្តីនៃក្រសួង​ទាំង៣នោះរួមមាន លោក ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម, លោក​ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងលោក ឆាយ ឫទ្ធិសែន រដ្ឋមន្រ្តីក្រសួងអភិវឌ្ឍន៍ជនបទ រួមនឹងមន្រ្តីពាក់ព័ន្ធជាច្រើនរូបទៀត។​

យោងតាម​ក្រសួង​ធនធានទឹកបាន​ឱ្យដឹងថា ​​កិច្ចប្រជុំក៏មានការធ្វើបទបង្ហាញរបស់តំណាងក្រសួងនីមួយៗ ពីសក្តានុពល តួនាទីនិងភារកិច្ច សមិទ្ធផលនានា ផែនការអនុវត្តន៍ បញ្ហាប្រឈម និងការងារពាក់ព័ន្ធដែលតម្រូវឱ្យមានកិច្ចសហការរវាងក្រសួងទាំងបី។

ប្រភពដដែល​បានបន្តថា កិច្ចប្រជុំនេះមានគោលបំណងបង្កើនកិច្ចសហការឱ្យបានជិតស្និទ្ធក្នុងកា​រសិក្សា និងរៀបចំគម្រោងពាក់ព័ន្ធនឹងវិស័យកសិកម្ម ធនធានទឹក និងអភិវឌ្ឍន៍ជនបទ។​ ព្រមទាំ​ងពិភាក្សាពីដែនសមត្ថកិច្ច បញ្ហាប្រឈមដែលធ្វើឱ្យរាំងស្ទះ ឬយឺតយ៉ាវដល់ការអនុវត្តកា​រងារ ការពង្រឹង និងពង្រីកកិច្ចសហការរវាងក្រសួងទាំងបីទាំងនៅថ្នាក់ជាតិ និងថ្នាក់ក្រោមជាតិ ការបន្ស៊ីគ្នានៃការរៀបចំផែនការ និងការរៀបចំផែនការមេរួមគ្នា ស្របតាមកម្មវិធីនយោបាយនិងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលនីតិកាលទី៧ នៃរដ្ឋសភា៕