តើទីក្រុងខាកគីវ នឹងក្លាយជាគោលដៅវាយប្រហារបន្ទាប់របស់ទាហានរុស្ស៊ី?

ស៊ីរ៉ែនបន្លឺស្ទើបែកក្រដាសត្រចៀក ការទម្លាក់គ្រាប់បែកមិនឈប់ឈរ និងដ្រូន ហោះ​នៅក្នុង​អាកាស នេះគឺជាអ្វីដែលប្រជាជននៅទីក្រុងខាកគីវ ឆ្លងកាត់ក្នុងជីវិតប្រចាំថ្ងៃ។ ខាកគីវ គឺជា ទីក្រុងធំក្នុងលំដាប់ទី២ របស់ប្រទេសអ៊ុយក្រែន ដែលស្ថិតនៅក្បែរព្រំដែនជាមួយប្រទេស រុស្ស៊ី។ មនុស្ស ៦នាក់ បានស្លាប់ បន្ទាប់ពីការវាយ​ប្រហារចុងក្រោយ កាលពីរាត្រីថ្ងៃទី៦ មេសា។

ពេលនោះ រុស្ស៊ីបានបាញ់ដ្រូនចំនួន ៣២ គ្រឿង ដ្រូន ស្ហ៉ាហេដ ដែលជាការផលិតរបស់អ៊ីរ៉ង និង​វាយប្រហារដាក់គោលដៅស៊ីវិលជាសំខាន់ មាន អគារប្រជាជនរស់នៅ ស្ថានីយ៍សេវារដ្ឋ និង​រថយន្តជាង ១០គ្រឿង។

នៅខែកុម្ភៈ ឆ្នាំ២០២២ ភ្លាមៗបន្ទាប់ពីការចាប់ផ្តើមនៃការវាយប្រហាររបស់រុស្ស៊ី ទាហាននៃ​ទីក្រុង​មូស្គូ បានទទួលជ័យជម្នះរុលចូលរហូតដល់ច្រកទ្វារនៃទីក្រុងខាកគីវ មុននឹងត្រូវ​រុញ​ច្រាន​​រហូត​ទៅដល់ព្រំដែន​វិញនៅអំឡុងការវាយប្រហាររបស់អ៊ុយក្រែននៅខែកញ្ញា ឆ្នាំ​២០២២។

តាំងពីពេលនោះ ការវាយប្រហារកើតមានឡើងមិនសូវញឹកញាប់ និងហើយប្រជាជនបានកើន​​ឡើងវិញរហូតដល់ ១,៣ លាននាក់ ដែលមុនសង្រ្គាមមានប្រមាណ ២លាន នាក់។

សារព័ត៌មាន The Washington Post  បានរាយការណ៍ថា នៅប៉ុន្មានខែចុងក្រោយនេះ ការ​វាយ​​ប្រហារ បានចាប់ផ្តើម និងកើតឡើងជាបន្តបន្ទាប់មកលើទីក្រុង ខាកគីវ ក៏ដូចជា នៅតំបន់​ជុំវិញ។

សារព័ត៌មានប្រចាំថ្ងៃរបស់អាម៉េរិក បញ្ជាក់ថា សម្រាប់ការវាយប្រហារ ទីក្រុងខាកគីវគឺ​ជា​គោលដៅ​មួយដ៏ងាយស្រួលបំផុតសម្រាប់ទីក្រុងមូស្គូ។ ទីក្រុងនេះ គឺស្ថិតនៅជិតព្រំដែន ដែល​សូម្បីប្រព័ន្ធការពារដែនអាកាសដ៏ទំនើប ក៏មានការលំបាកនឹងឆ្លើយតបទាន់ពេលវេលា ចំពោះ​មីស៊ីលល្បឿនលឿនរបស់រុស្ស៊ី។

ចំណែកប្រធានាធិបតីអ៊ុយក្រែន លោកវ៉ូឡូឌីមៀ ហ្សេឡេនស្គី អះអាងថា ៖ “ដោយ​ភាព​លោភលន់​របស់រុស្ស៊ីចង់បានទីក្រុងនេះ និងភាពនៅជិតបង្កើយ​របស់វានៅជិតព្រំដែន​រុស្ស៊ី​ផង នៅ​ប៉ុន្មានថ្ងៃចុងក្រោយនេះ ក៏មានពាក្យចចាមអារ៉ាម អំពីការវាយប្រហារទ្រង់ទ្រាយធំសំដៅ​ដណ្តើម​យកទីក្រុងខាកគីវ។ ប៉ុន្តែទីក្រុងនេះត្រូវ​បានការពារ និងមិនស្ថិតនៅក្នុងគ្រោះ​ថ្នាក់ឡើយ។  សារព័ត៌មាន The Kiyv Independent បានរៀបរាប់ថា សម្រាប់ចារកម្មអ៊ុយក្រែន ពាក្យចចាមអារ៉ាមនេះជាផ្នែកនៃប្រតិបត្តិការទាំងមូលដើម្បីធ្វើឲ្យ​ខូចចិត្តសាស្រ្តរបស់​ប្រជាជន​​អ៊ុយក្រែនពីសំណាក់ក្រុងមូស្គូ។ សារព័ត៌មាននេះ បញ្ជាក់ថា គ្មានអ្វីបង្ហាញថា វិមាន​ក្រឹម​ឡាំងនឹងរៀបចំ​ការវាយប្រហារជើងគោកថ្មីលើទីក្រុងនេះឡើយ។

យោងតាមអគ្គមេបញ្ជាការកងទ័ពអ៊ុយក្រែន លោកអូឡេចសាន សៀស្គី បា​នឲ្យដឹងថា ទោះ​បី​ជា​មានសំដីធានាពីមន្រ្តីរបស់អ៊ុយក្រែនក៏ដោយ នៅទីក្រុងខាកគីវ ការគំរាមកំហែង​មិន​ដែល​ចាត់​ទុក​ថា ស្រាលនោះឡើយ។ មានការពង្រឹងលានដ្ឋាន និងប្រព័ន្ធការពារដ៏ស្មុគស្មាញ កំពុង​ត្រូវ​បាន​រៀបចំឡើងនៅជុំវិញទីក្រុងខាកគីវ។

នៅក្នុងការវិភាគរបស់ខ្លួន សារព័ត៌មាន BBC វាយតម្លៃថា បើរុស្ស៊ីវាយប្រហារខាកគីវ វានឹង​អាច​​បញ្ឈប់ការវាយប្រហាររបស់អ៊ុយក្រែនទៅលើតំបន់ បេលហ្គារ៉ូដ ដែលនៅជិត​អ៊ុយក្រែន។ ស្ថិតនៅចម្ងាយប្រមាណ ១០០ គីឡូម៉េទ្រពីទីក្រុង ខាកគីវ ដែនដីនេះ គឺជា​ផ្ទាំង​ស៊ីបទៀងទាត់​នៃ​ការទម្លាក់គ្រាប់បែករបស់អ៊ុយក្រែន។

បើយោងតាម BBC បានឲ្យដឹងថា លើសពីនេះ ប្រតិបត្តិការបែបរុស្ស៊ីលើទីក្រុងខាកគីវ នឹងទាមទារចាបាច់នូវការចល័តកម្លាំង​ប្រមាណ ៣០០០០០នាក់ បន្ថែមនៅក្នុងទាហានរុស្ស៊ី។ ហើយដំណឹងសម្រាប់ការរើសទាហាន ដែលប្រកាសដោយវ្លាឌីមៀ ពូទីន នៅថ្ងៃទី២៩ មីនា គឺជាការសម្រេចដាច់ខាត។