ចំនួនមនុស្ស ប្រឈមកង្វះស្បៀងអាហារ នៅតែកើនឡើង

របាយការណ៍សកលដែលបានចេញផ្សាយថ្មីស្តីពីវិបត្តិស្បៀងអាហារ និយាយថា ឆ្នាំ២០២៣កន្លងទៅ គេនៅតែបានរកឃើញអំពីការកើនឡើងបន្ថែមទៀតនៃមនុស្សដែលកំពុងជួបប្រទះការខ្វះខាតស្បៀងអាហារយ៉ាងធ្ងន់ធ្ងរ។

របាយការណ៍ថ្មីដែលចុះផ្សាយដោយវ៉ាទីកង់ញូវបានឲ្យដឹងថា ចំនួនមនុស្សដែលកំពុងប្រយុទ្ធប្រឆាំងនឹងភាពអត់ឃ្លាន និងទទួលរងបញ្ហាកង្វះអាហារូបត្ថម្ភកំពុងបន្តកើនឡើងក្នុងល្បឿនដ៏គួរឱ្យព្រួយបារម្ភនៅទូទាំងពិភពលោក។

ក្នុងឆ្នាំ ២០២៣ ប្រជាជនជិត​២៨២លាននាក់នៅទូទាំង ៥៩ ប្រទេសនិងដែនដីបានប្រឈមមុខនឹងអសន្តិសុខស្បៀងកម្រិតខ្ពស់ដែលត្រូវការជំនួយជាបន្ទាន់។​

ប្រទេស ឬដែនដីដែលកំពុងតែមានបញ្ហាធ្ងន់ធ្ងរនោះគឺ មានហ្គាហ្សាដែលហែកហួរដោយសង្រ្គាម និងស៊ូដង់ជាតំបន់ដែលមានចំនួនប្រជាជនច្រើនបំផុតប្រឈមនឹងគ្រោះទុរ្ភិក្ស។​

យោងតាមរបាយការណ៍សកលចុងក្រោយស្តីពីវិបត្តិស្បៀងអាហារបានឲ្យដឹងថាពលរដ្ឋដែលជួបបញ្ហាអត់ឃ្លានរវាងឆ្នាំ២០២៣ និង២០២៤ ឃើញថា​មានការកើនឡើង២៤លាននាក់។

របាយការណ៍នេះត្រូវបានបោះពុម្ពផ្សាយក្នុងសប្តាហ៍កន្លងទៅដោយបណ្តាញសកលប្រឆាំងនឹងវិបត្តិស្បៀងអាហារ (GNFC) ដែលជាសម្ព័ន្ធនៃអង្គការអភិវឌ្ឍន៍ និងអង្គការមនុស្សធម៌ដែ​លបានចាប់ផ្តើមសកម្មភាពអង្កេតតាំងពីឆ្នាំ ២០២៦។

សម្ព័ន្ធនេះគឺមានការចូលរួមដោយសហភាពអឺរ៉ុប អង្គការស្បៀងអាហារ និងកសិកម្មរបស់អង្គការសហប្រជាជាតិ (FAO) និងកម្មវិធីស្បៀងអាហារពិភពលោក (WFP) ដើម្បី វាយតម្លៃ និងដោះស្រាយអសន្តិសុខស្បៀងនៅទូទាំងពិភពលោក។

យោងតាមការរកឃើញបានសង្កត់ធ្ងន់ថា មនុស្ស ២៤ លាននាក់កំពុងតែប្រឈមមុខនឹងការខ្វះខាតស្បៀងអាហារធ្ងន់ធ្ងរ៕