មន្រ្តីគណបក្ស ក្រុមសហជីព អង្គការ យុវជនបរិស្ថាន និស្សិត ព្រះសង្ឃ រួមនឹងប្រជាពលរដ្ឋប្រមាណជា ២០០នាក់ បានយាងនិមន្ត និងចូលរួមប្រារព្ធវិញ្ញាណខន្តលោកបណ្ឌិត កែម ឡី ដើម្បីរំលឹកខួបលើកទី៨ នាស្ថានីយ៍ប្រេងឥន្ធនៈកាល់តិច ជាប់នឹងស្តុបបូកគោ នាព្រឹកថ្ងៃទី១០ ខែកក្កដា ឆ្នាំ២០២៤។
ក្នុងឱកាសនោះ មានការហែក្បួនពីយុវជនបរិស្ថាន ព្រះសង្ឃ សហជីព ដោយក្នុងនោះមានលោក រ៉ុង ឈុន ទីប្រឹក្សាគណបក្សកម្លាំងជាតិផងដែរ។
លោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ បានថ្លែងក្នុងពិធីរំលឹកវិញ្ញាណខន្តលោកបណ្ឌិតកែម ឡី ថា ក្នុងនាមសហជីព សង្គមស៊ីវិល សមាគមជាបណ្តាញសារព័ត៌មានឯករាជ្យទាំងអស់ដែលបានចូលរួមប្រារព្ធខួប៨ឆ្នាំ របស់លោកបណ្ឌិតកែម ឡីដែលជវីរៈបុរសរបស់ប្រជាពលរដ្ឋ គឺមិនអាចបំភ្លេចនូវវីរៈភាព និងការលះបង់របស់លោកបណ្ឌិត កែម ឡីបានទេ។
លោកបានបន្តថា ៖ «ថ្ងៃនេះដែរ គឺជាការបន្លឺនូវសម្លេង បន្លឺនូវជួងប្រាប់ប្រជាពលរដ្ឋខ្មែរទាំងក្នុងនិងក្រៅប្រទេសឱ្យបានដឹងថាយើងបាត់បង់បណ្ឌិត បាត់បង់វីរៈបុរសរបស់យើងនៅថ្ងៃទី១០ ខែកក្កដាដែលជាទិវាប្រវត្តិសាស្រ្តសម្រាប់ជាតិខ្មែរ។ ខ្ញុំសូមឱ្យខ្មែរទាំងអស់ រម្លឹកនូវការលះបង់របស់លោកបណ្ឌិតកែម ឡី»។
លោក វន់ ពៅ បានអំពាវនាវឱ្យប្រជាពលរដ្ឋខ្មែរទាំងអស់រួមគ្នាគិតពីបញ្ហាជាតិ គិតពីបញ្ហាសង្គម បន្តពីវីរៈភាព បន្តពីបណ្តាំលោកបណ្ឌិត កែម ឡី «ជូតទឹកភ្នែក រួចបន្តដំណើរទៅមុខ» ដើម្បីជាតិ ដើម្បីសង្គម និងកូនចៅជំនាន់ក្រោយទៀត។
លោកបានបញ្ជាក់ថា ៖ «ខ្ញុំសុំឱ្យអង្គការជាតិ-អន្តរជាតិ ព្រមទាំងរាជរដ្ឋាផិបាលវែកមុខរកឃាតករពិត វែកមុខអ្នកនៅពីក្រោយនៃការបញ្ជាសម្លាប់លោកបណ្ឌិត កែម ឡី។ យើងនៅតែមានមន្ឌិលនៅឡើយ រឿងនេះហាក់នៅស្រពិជស្រពិលទាំងមហាជនទាំងយើងទាំងអស់គ្នានៅមិនទាន់អស់ចិត្ត ដែលថ្ងៃនេះយើងសុំសំណូមពរដល់រាជរដ្ឋាភិបាល ស្ថាប័នពាក់ព័ន្ធទាំងអស់ស៊ើបអង្កេតដើម្បីរកយុត្តិធម៌សម្រាប់ក្រុមគ្រួសាររបស់លោកបណ្ឌិត សម្រាប់យើងទាំងអស់គ្នា និងសម្រាប់ប្រជាជាតិទាំងមូល»។
ក្នុងពិធីនោះដែរ លោក សាន់ ម៉ាឡា ប្រធានកម្មវិធីបណ្តាញ និងតស៊ូមតិនៃអង្គការភាពជាដៃគូដើម្បីបរិស្ថាន និងការអភិវឌ្ឍ ក៏បានប្រាប់ឱ្យុដឹងដែរថា លោកនៅតែចាំមើលយុត្តិធម៌សម្រាប់លោកបណ្ឌិត កែម ឡី ថ្វីត្បិតយើងទាំងអស់គ្នាមានជំនឿថា លោកអឿត អាងដែលត្រូវបានតុលាការចោទប្រកាន់ថាជាឃាតករសម្លាប់លោកបណ្ឌិត កែម ឡី គឺមិនមែនជាឃាតករតែម្នាក់ឯងនោះទេ តែអាចមានអ្នកណាម្នាក់នៅពីក្រោយ ឬជាអ្នកបញ្ជាដោយផ្ទាល់។
លោកបញ្ជាក់ថា ៖ «យើងបន្តអំពាវនាវឱ្យរដ្ឋាភិបាល និងតុលាការមេត្តាពន្លឿនផ្តល់យុត្តិធម៌សម្រាប់លោកបណ្ឌិតកែម ឡី ហើយយើងសង្ឃឹមថានៅក្នុងបរិបត្តិដែលពិភពលោកមានការជឿនលឿន អំពើឃាតកម្ម យ៉ង់ឃ្នងបែបនេះនឹងមិនកើតមានតទៅទៀតទេ»។
លោក សាន់ ម៉ាឡា នៅតែជឿជាក់ថាទៅថ្ងៃខាងមុខប្រវត្តិសាស្ត្រនឹងផ្តល់យុត្តិធម៌ចំពោះពួកគាត់ ហើយទៅថ្ងៃខាងមុខពន្លឺយុត្តិធម៌នឹងកើតមាន ហើយយើងក៏បួងសួងសុំឱ្យទេវតាផ្តន្ទាទោសទៅមេខ្លោង និងអ្នកពាក់ព័ន្ធទាំងអស់ដែលបានសម្លាប់អ្នកស្នេហាជាតិ អ្នកវិភាគ អ្នកកាសែត និងមេសហជីព ឱ្យទទួលបានផលកម្មតាមអ្វីដែលគាត់បានសាង។
កញ្ញា រៀម ស្រីពេជ្ររតនា អនុប្រធានទី៤ នៃសមាគមសម្ពន្ធនិស្សិតបញ្ញវន្តខ្មែរ ឬហៅកាត់ថាKSILA បានលើកឡើងថា កញ្ញាមកគោរពវិញ្ញាណខន្តលោកបណ្ឌិត កែម ឡី និងទាមទារឱ្យមានការដោះលែងលោកកើត សារ៉ាយ ប្រធានសមាគមKSILA សកម្មជនបរិស្ថាន រួមនឹងអ្នកទោសមនសិការទាំងអស់ផងដែរ។
កញ្ញាថា ៖ «ពួកយើងមកទីនេះ គឺពួកយើងសុទ្ធសឹងតែមានមន្ទិលសង្ស័យ ហើយមិនសុខចិត្តចំពោះការដែលលើកឡើងថា ជនម្នាក់ដែលមិនដឹងមកពីណា ហើយថាលោកបណ្ឌិតជំពាក់លុយ ហើយក៏បានបាញ់សម្លាប់លោកបណ្ឌិត។ យើងមិនជឿទេ ព្រោះជននោះមើលទៅតោកយ៉ាករកតែបាយហូបគ្មាន តែហេតុអីមកបាញ់សម្លាប់លោកបណ្ឌិតដោយសាររឿងជំពាក់លុយ»។
ទីប្រឹក្សាគណបក្សកម្លាំងជាតិ លោក រ៉ុង ឈុន ដែលបានទៅគោរពវិញ្ញាណខន្តលោកបណ្ឌិត កែម ឡី ដែរនោះ ក៏បានថ្លែងឱ្យដឹងដែរថា ក្នុងរយៈពេល៨ឆ្នាំកន្លងផុតទៅហើយ តែអាជ្ញាធរកម្ពុជាមិនទាន់បានផ្តល់សេរីភាពដល់លោកបណ្ឌិតកែម ឡី ក៏ដូចជាសាច់ញាតិមិត្តិភក្តិ និងប្រជាពលរដ្ឋនៅទូទាំងប្រទេសកំពុងទន្ទឹងរងចាំយុត្តិធម៌ជូនលោកបណ្ឌិត កែម ឡី និងសាច់ញាតិ ក្រុមគ្រួសារកូនៗរបស់គាត់។
លោកបានថ្លែងថា ៖ «យើងឃើញថាការយឺតយ៉ាវរបស់អាជ្ញាធរកម្ពុជា បង្ហាញពីការមិនបានយកចិត្តទុកដាក់ការវែកមុខឃាតករ និងអ្នកពាក់ព័ន្ធយកមកផ្តន្ទាទោសតាមច្បាប់នៅឡើយដោយទុកឱ្យឃាតករ និងអ្នកពាក់ព័ន្ធនៅមានសេរីភាពដល់ពេលនេះ»។
ឆ្លៀតក្នុងឱកាសនោះដែរ លោក រ៉ុង ឈុន បានបន្តថា ក្នុងឱកាសខួប៨ឆ្នាំរបស់លោកបណ្ឌិត កែម ឡីនេះដែរ លោកក៏បានអំពាវនាវឱ្យអាជ្ញាធរពិនិត្យឡើងវិញ និងផ្តល់លទ្ធភាពឱ្យពួកគាត់មានសេរីភាពឡើងវិញ រួមទាំងអ្នកជាប់ឃុំមនសិការផងដែរ។
នៅថ្ងៃខួប៨ឆ្នាំនេះដែរ លោកស្រី ប៊ូ រចនា ភរិយាលោកបណ្ឌិត កែម ឡី ក៏បានសរសេររៀបរាប់នៅលើបណ្តាញសង្គមហ្វេសប៊ុករបស់លោកស្រីថា ៖ «រាល់ឆ្នាំឱ្យតែជិតដល់ថ្ងៃបុណ្យខួបនៃមរណភាពរបស់បង ដែលពួកក្រុមចោរលួចបាញ់សម្លាប់យ៉ាងព្រៃផ្សៃទាំងគ្មានញញើតដៃ នៅកណ្តាលទីក្រុង ភ្នំពេញ។ អូនតែងតែមានរឿងច្រើនណាស់ដែលត្រូវទូលពិតដល់បង។ បងក៏ដឹងនឹងស្គាល់ហើយថា ជីវិតដែលរស់នៅស្រុកគេ ហើយគ្មានទីពឹង វាមិនស្រួលដូចការគិត និងកក់ក្តៅដូចបានរស់នៅក្បែរឪពុកម្តាយយើងនោះឡើយ»។
លោកស្រីបន្តថា គឺមានតែស៊ូទ្រាំ អត់ធ្មត់ ខំប្រឹងរស់ និងដើរទៅមុខដោយខ្លួនឯងប៉ុណ្ណោះ។
ជាមួយគ្នានោះដែរ លោកស្រីក៏បានលើកឡើងដែរថា លោកស្រីបានតស៊ូគ្រប់ឧបសគ្គរហូតអាចទិញផ្ទះបាន ដែលជាកម្មសិទ្ធិខ្លួនឯងដើម្បីជាម្លប់ ជាជម្រក ដែលមានភាពកក់ក្តៅដូចគ្រួសារដទៃដែរ។
រយៈពេល៨ឆ្នាំមកនេះ ស្គាល់គ្រប់រសជាតិ ផ្អែម ប្រៃ ល្វីង ជូរ ចត់ ។មានទាំងក្រុមតាមជិះជាន់ ជាន់ពន្លិច បន្តោសថាមិនចូលរួមនិយាយរឿងសង្គម អ្នកខ្លះទៀតថា ភ្លេចការឈឺចាប់អស់ហើយ មួយក្រុមទៀតប្រឹងវ៉ៃ និងប្រឹងតាមបំផ្លាញកិត្តិយស។ និយាយមួលបង្កាច់ទាំងរស់ ក៏គេហ៊ានធ្វើ ព្រោះជាបំណងរបស់គេចងបាន។ លោកស្រីរចនា បន្ថែម។
សូមរម្លឹកផងដែរថា លោកបណ្ឌិត កែម ឡី អ្នកវិភាគ និងស្រាវជ្រាវសង្គម ត្រូវបានគេបាញ់សម្លាប់នៅចំដើមទ្រូង និងក្បាល នៅក្នុងម៉ាតស្ថានីយ៍ប្រេងឥន្ធនៈកាល់តិច ដែលពោរពេញដោយមនុស្ស នៅកណ្តាលរាជធានីភ្នំពេញ ភ្លាមៗកាលពីមុន ម៉ោង ៩ព្រឹក ថ្ងៃអាទិត្យទី១០ ខែកក្កដា ឆ្នាំ២០១៦ ក្នុងវ័យ៤៦ឆ្នាំ។
ជនសង្ស័យត្រូវបានចាប់ខ្លួនភ្លាមៗ នៅប្រហែលជាពីរគីឡូម៉ែត្រពីកន្លែងកើតហេតុបន្ទាប់ពីបានធ្វើការបាញ់ប្រហារ។ ក្រោយពេលចាប់ខ្លួន បុរសនោះបានប្រាប់ថាខ្លួនឈ្មោះ “ជួប សម្លាប់” និងសារភាពថាជាឃាតករសម្លាប់លោក កែម ឡី ហើយនិយាយថា ការសម្លាប់នេះ គឺមកពីលោក កែម ឡី មិនព្រមសងលុយដែលជំពាក់ ៣០០០ ដុល្លារអាមេរិក។ “ជួប សម្លាប់” (ជាឈ្មោះដែលនគរបាលបាននិយាយថាមិនមែនជាឈ្មោះពិត) នឹងត្រូវបញ្ជូនខ្លួនទៅកាន់តុលាការនាថ្ងៃនោះដែរ។
ប្រជាពលរដ្ឋបានកើនឡើងកាន់តែច្រើន មកប្រមូលផ្តុំគ្នានៅក្រៅស្ថានីយ៍ប្រេងឥន្ធនៈ ជាកន្លែងដែលសាកសពរបស់លោកស្ថិតនៅ មុនពេលដែលប្រជាពលរដ្ឋរាប់ពាន់នាក់ទាំងនោះចាប់ផ្តើមហែសពរបស់លោក ឆ្ពោះទៅកាន់វត្តចាស់ នៅតំបន់ជ្រោយចង្វារនៅពេលរសៀលថ្ងៃដដែលនោះ។ នៅពេលដែលអ្នកទាំងនោះមកដល់វត្ត ដែលមានចម្ងាយប្រមាណប្រាំពីរគីឡូម៉ែត្រ ក្បួនហែបានកើនឡើងដល់ប្រហែលជា ៥០០០ នាក់ រាប់បញ្ចូលទាំងព្រះសង្ឃ និងសហគមន៍មូលដ្ឋានផងដែរ។
សាលាដំបូងរាជធានីភ្នំពេញ បានសម្រេចចោទជនសង្ស័យ ដែលបានបាញ់សម្លាប់លោកបណ្ឌិត កែម ឡី ដោយការចោទប្រកាន់ចំនួនពីរបទគឺ «ឃាតកម្មគិតទុកជាមុន និងបទកាន់កាប់អាវុធដោយគ្មានការអនុញ្ញាត»។
លោកអឿត អាង ហៅ ជួប សម្លាប់ ដែលរងការចោទប្រកាន់សម្លាប់លោកបណ្ឌិតកែម ឡី ត្រូវបានតុលាការគ្រប់ជាន់ថ្នាក់សម្រេចផ្តន្ទាទោសឱ្យជាប់ពន្ធនាគារអស់មួយជីវិត។ សំណុំរឿងនេះ ត្រូវបានបិទបញ្ចប់ជាស្ថាពរនៅតុលាការកំពូល ក្រោយពីតុលាការនេះបានប្រកាសសាលដីកាសម្រេចទាត់ចោលការប្តឹងសារទុក្ខរបស់មេធាវីជួប សម្លាប់ និងបិទផ្លូវតវ៉ាតទៅទៀត៕
Daily Program
