សហគមន៍អឺរ៉ុបបើកជាផ្លូវការកាលពីថ្ងៃអង្គារនូវការពិភាក្សាអំពីការចូលជាសមជិករបស់អ៊ុយក្រែន និងម៉ូលដាវី ទៅក្នុងប្លុកសហគមន៍អឺរ៉ុប។ នេះគឺជាដំណើរការដែលគេប្រកាសថា វាត្រូវចំណាយពេលយូរ និងផុយស្រួយ។
សហគមន៍អឺរ៉ុប អ៊ុយក្រែន និងម៉ូលដាវី នៅទីក្រុងលុចហ្សំបួ កាលពីថ្ងៃទី២៥ ខែមិថុនា បានដាក់ចេញជាផ្លូវការនូវកិច្ចចរចាដែលត្រូវពិនិត្យមើល ដែលអនុញ្ញាតឲ្យប្រទេសទាំងពីរអាចក្លាយជាសមាជិកសហគមន៍អឺរ៉ុបពេញលេញនៅថ្ងៃណាមួយ។
ប្រទេសរុស្ស៊ី បានព្យាយាមគ្រប់មធ្យោបាយដើម្បីរារាំងដំណើរការនេះ ដែលនឹងត្រូវបានគេប្រកាសថា វាត្រូវការពេលយូរ និងលំបាក មុននឹងនាំយកអតីតសាធារណរដ្ឋសូវៀតពីរនេះចូលមកក្នុងអឺរ៉ុប។
កាលពីសប្តាហ៍មុន ប្រធានាធិបតីអ៊ុយក្រែន លោកវ៉ូឡូឌីមៀ ហ្សេឡេនស្គី បានថ្លែងថា ៖ “យើងរង់ចាំដោយការអត់ធ្មត់ នៅខណៈដែលអ៊ុយក្រែន និងសហគមន៍អឺរ៉ុប ជួបប្រជុំគ្នាក្នុងសន្និសីទអន្តររដ្ឋាភិបាលលើកទី១។ នេះនឹងជាការកត់សម្គាល់ការចាប់ផ្តើមដ៏មានប្រសិទ្ធិភាពនូវដំណើរការចរចា។ លោកហ្សេឡេនស្គី ក៏បានអបអរសាទរនូវការធ្វើឲ្យសម្រេចបាននូវក្តីស្រមៃក្នុងការចូលជាសមាជិកហគមន៍អឺរ៉ុប។
យោងតាមប្រភពការទូតមួយ បានឲ្យដឹងថា ការចរចាក្នុងការចូលជាសមាជិកសហគមន៍អឺរ៉ុប និងប្រទេសទី៣ ធ្វើឡើងនៅក្នុងក្របខណ្ឌនៃសន្និសីទអន្តររដ្ឋាភិបាល (CIG) ។ ជាបឋម ប្រទេសចំនួន ២៧ នឹងបើកជាផ្លូវការនូវកិច្ចពិភាក្សាជាមួយអ៊ុយក្រែន បន្ទាប់មកជាមួយម៉ូលដាវី។
ការបើកនូវកិច្ចពិភាក្សាទាំងនេះ គឺជាលទ្ធផលនៃកិច្ចព្រមព្រៀងដែលទទួលបានពីការតស៊ូដ៏ខ្លាំងរវាងប្រទេស ២៦ នៅក្នុងសហគមន៍អឺរ៉ុប ដើម្បីប្រជែងក្នុងការបញ្ចុះបញ្ចូល ប្រទេសទី២៧ គឺប្រទេសហុងគ្រី ដែលមានលោកវីកទ័រ អ័របាន គឺជានាយករដ្ឋមន្រ្តី និងជាមិត្តរបស់លោកវ្លាឌីមៀ ពូទីន កុំឲ្យរាំងស្ទះដំណើរកិច្ចពិភាក្សានេះ។
នាយករដ្ឋមន្រ្តីហុងគ្រី បានជំទាស់យ៉ាងខ្លាំងក្លាទៅនឹងរាល់កិច្ចពិភាក្សាក្នុងការបញ្ចូលជាសមាជិកអ៊ុយក្រែន និងអះអាងថា ប្រទេសហុងគ្រីមិនបានត្រៀមខ្លួនទេ។ ជារដ្ឋសមាជិកនៃសហគមន៍អឺរ៉ុប ដែលស្និទ្ធបំផុតនឹងប្រទេសរុស្ស៊ីរបស់លោកវ្លាឌីមៀ ពូទីន ប្រទេសហុងគ្រី បានរាំងខ្ទប់ រាល់ជំនួយយោធារបស់អឺរ៉ុបទៅឲ្យទីក្រុងគៀវ។ លោកវីកទ័រ អ័របាន ចុងក្រោយ ក៏បានយល់ព្រមចាកចេញពីតុនៃកិច្ចប្រជុំកំពូលនៃមេដឹកនាំចំនួន ២៧ប្រទេស កាលពីខែធ្នូ។ នេះជាពេលដែលមេដឹកនាំ ២៦ប្រទេសផ្សេងទៀតនៃសហគមន៍អឺរ៉ុបសម្រេចចិត្តបើកកិច្ចចរចាក្នុងការបញ្ចូល ទីក្រុង គៀវ និងទីក្រុង ជីស៊ីណូ ជាសមាជិក។
តាមប្រភពការទូត បានពន្យល់ថា នៅខណៈដែលសន្និសីទអន្តររដ្ឋាភិបាលត្រូវបានបើកជាផ្លូវការ អ្នកចរចា ដំបូងនឹងឆ្លងកាត់ការពិនិត្យមើលប្រព័ន្ធច្បាប់របស់ប្រទេសទាំងពីរដើម្បីផ្ទៀងផ្ទាត់ថា វាត្រូវនឹងប្រព័ន្ធច្បាប់សហគមន៍អឺរ៉ុបឬអត់។ ដំណាក់កាលនេះ ជាគោលការណ៍នឹងមានរយៈពេល ពី១ឆ្នាំ ទៅ ២ឆ្នាំ។
ប្រភពអ្នកការទូតអឺរ៉ុបដែលបានរៀបរាប់ដោយសុំមិនបញ្ចេញឈ្មោះថា នៅក្នុងករណីអ៊ុយក្រែន និងម៉ូលដាវី រឿងនេះនឹងលឿនជាង ដោយសារយើងមានគំនិតច្បាស់ល្មមអំពីស្ថានភាព។ ទោះបីជាយ៉ាងណា គេក៏ត្រូវចំណាយពេលជាច្រើនសប្តាហ៍ ឬជាច្រើនខែ មុននឹងជំពូកផ្សេងៗ គ្នានៃកិច្ចចរចាត្រូវបានបើកឡើងពិតៗ។ ហើយវាមានអត្រាប្រហែលតិចតួច ដែលកិច្ចការងារនឹងត្រូវបញ្ចប់មុនដំណាច់ឆ្នាំ។ ប្រទេសហុងគ្រី មិនមានអារម្មណ៍នឹងទទួលអ៊ុយក្រែនទេ ហើយនឹងឡើងកាន់ជាប្រធាននៃក្រុមប្រឹក្សាសហគមន៍អឺរ៉ុប រយៈពេល ៦ខែ នៅថ្ងៃទី១ កក្កដា ឆ្នាំ២០២៤ ដែលប្រមូលផ្តុំរដ្ឋមន្រ្តីនៃប្រទេសទាំង ២៧ នៃសហគមន៍អឺរ៉ុប។
Daily Program
