កាឌីណាល់បូ លើកឡើងចំណុចសំខាន់ចំនួន៥ ដោយអំពាវនាវដល់ព្រះសហគមន៍នៅអាស៊ីដើរតាមមាគ៌ាស៊ីណូដាល
ថ្ងៃទី២នៃធម្មយាត្រាដ៏អស្ចារ្យនៃសេចក្ដីសង្ឃឹម២០២៥ ក្នុងទីក្រុងប៉េណាំង ប្រទេសម៉ាឡេស៊ី បានចាប់ផ្តើមជាមួយនឹងអភិបូជា ដែលមានមនុស្សចូលរួមចំនួន៩០០នាក់ មកពីប្រទេសចំនួន៣២។ អភិបូជាប្រារព្ធឡើងនៅក្នុងបន្ទប់ ប្រជុំនៃសណ្ឋាគារឡៃថ៍ (Light) ក្នុងទីក្រុងប៉េណាំង ក្រោមអធិបតីភាពលោកអគ្គអភិបាលនៃព្រះសហគមន៍ យ៉ាំងហ្គូន (Yangon) ប្រទេសមីយ៉ាន់ម៉ា។
លោកឧបដ្ឋាក ប៉ូល កាង (Deacon Paul Kang) នៃព្រះសហគមន៍កាតូលិកភូមិភាគប៉េណាំង បានឡើងអានព្រះបន្ទូលដំណឹងល្អ និងធ្វើធម្មទេសនា។
ពន្លឺ៥ចំណុច
នៅក្នុងអត្ថបទព្រះគម្ពីដានីញ៉ែល ៧:២-១៤ លោកកាឌីណាល់ បូ បានបង្ហាញពន្លឺចំនួន៥ ដែលអាចបំភ្លឺដំណើរអ្នកពីទ្វីបមួយទៅទ្វីបមួយ។
ស្តាប់ដោយបេះដូង
កាឌីណាល់ បូ គូសបញ្ជាក់ពីសារៈសំខាន់នៃការស្តាប់ដោយស្រង់សម្តីសន្តយ៉ាកុប លោកបានសួរថា «តើព្រះសហគមន៍អាចស្តាប់មុនពេលពួកគេនិយាយបានទេ?» លោកបានរំលឹកដល់ការជួបជុំគ្នាថា នៅក្នុងវប្បធម៌អាស៊ីជាច្រើន ការនិយាយត្រូវបានគេអោយតម្លៃខ្ពស់ ប៉ុន្តែដំណើរខាងផ្លូវវិញ្ញាណ នៃស៊ីណូដាលីធី ចាប់ផ្តើមដោយការស្តាប់ មិនតឹ្រមតែត្រចៀកប៉ុណ្ណោះទេ តែស្តាប់ដោយបេះដូង។
លោកកាឌីណាល់ សង្កត់ធ្ងន់ថា ក្នុងអត្ថបទព្រះគម្ពីដានីញ៉ែល នៅក្នុងរូងសត្វតោ បានស្តាប់សំឡេងព្រះជាម្ចាស់ដោយស្ងៀមស្ងាត់។ លោកកាឌីណាល់ ថ្លែងថា ព្រះសហគមន៍ត្រូវរក្សាការស្ងៀមស្ងាត់ ដែលមានអត្ថន័យជាងនេះទៀតនោះ គឺ«មិនមែនភាពស្ងៀមស្ងាត់នៃការភ័យខ្លាចទេ ប៉ុន្តែភាពស្ងៀមស្ងាត់នៃការយកចិត្តទុកដាក់។ ការស្តាប់ដោយបេះដូង ផ្លាស់ប្តូរសំឡេងរំខាននៅជុំវិញខ្លួនយើងទៅជាសេចក្តីសង្ឃឹម»។
លោកបានពន្យល់ថា ការស្តាប់ដោយសកម្ម អនុញ្ញាត្តអោយព្រះសហគមន៍ក្លាយជាកន្លែងព្យាបាល ដោយផ្តល់នូវការលួងលោមចិត្តនៅក្នុងពិភពលោក ដែលជារឿយៗជាប់គាំងជាមួយនឹងផលប្រយោជន៍ផ្ទាល់ខ្លួន ឬការធ្វេសប្រហែសចំពោះការព្រួយបារម្ភ និងការភ័យខ្លាច។ លោកកាឌីណាល់ មានប្រសាសន៍បន្តថា ស្រម៉ៃមើលថា ការជួបជុំរបស់ព្រះសហគមន៍កាតូលិករបស់យើង មានគោលបំណងនិងពោរពេញដោយអត្ថន័យ ប្រសិនបើយើងអនុវត្តការស្តាប់ដោយសកម្ម។
ភាពជាអ្នកដឹកនាំជាអ្នកបម្រើ មិនមែនឋានៈទេ
ពន្លឺទីពីរផ្តោតលើធម្មជាតិនៃភាពជាអ្នកដឹកនាំ។ លោកកាឌីណាល់ បូ រំលឹកអ្នកចូលរួមថា ដូចលោកដានីញ៉ែល សង្កេតឃើញការកើនឡើង និងការដួលរលំរបបស្តេច និងចក្រភព អំណាចពិតប្រាកដមិនមែនមកពីអំណាចទេ ប៉ុន្តែមកពីការដាក់ខ្លួន និងការបម្រើ។
លោកមានប្រសាសន៍ថា មេដឹកនាំពិតប្រាកដដាក់ខ្លួនបម្រើ ជាជាងចង្អុលម្រាមដៃ។ លោកកាឌីណាល់ រៀបរាប់រឿងមួយ ដែលលោកធ្លាប់លឺពីលោកអភិបាលថា «ប្រសិនបើចិញ្ជៀនរបស់អ្នកធ្វើអោយអ្នកមានអារម្មណ៍ដូចជាស្តេច កុំបោះវាចោល។ ប៉ុន្តែប្រសិនបើអ្នកមានអារម្មណ៍ថាដូចជាស្តេចជំនួសអោយអ្នកគង្វាល វាដល់ពេលដែលអ្នកត្រូវដោះវាចេញ ហើយលាងជើងរបស់អ្នកដទៃ»។
លោកបានសង្កត់ធ្ងន់ថា ភាពជាអ្នកដឹកនាំគួរតែលើកកម្ពស់អ្នកដទៃ និងទប់ទល់នឹងនិន្នាការដែលកំពុងលេចចេញ នៃរបបផ្តាច់ការទាំងនៅក្នុងសង្គម និងរចនាសម្ព័ន្ធព្រះសហគមន៍។ លោកកាឌីណាល់ មានប្រសាសន៍ថា «នៅអាស៊ី ជាកន្លែងដែលការគោរពចំពោះអាជ្ញាធរ ត្រូវបានចាក់ឫសយ៉ាងជ្រៅ យើងត្រូវចងចាំថា ភាពជាអ្នកដឹកនាំពិតប្រាកដ គឺជាការបម្រើ មិនមែនឋានៈទេ»។ លោកបន្ថែមថា សក្ខីភាពរបស់ព្រះសហគមន៍កាតូលិក គឺខ្លាំងបំផុតនៅពេលដែលបង្ហាញពីភាពដាក់ខ្លួន ការអាណិតអាសូរ និងភាពជាអ្នកបម្រើនៅគ្រប់កម្រិត។
ភាពចម្រុះជាអំណោយមួយ មិនមែនជាការគំរាមកំហែងទេ
លោកកាឌីណាល់ បូ បានងាកទៅរកភាពចម្រុះដ៏សម្បូរបែបរបស់អាស៊ី ដោយសង្កត់ធ្ងន់ថា ភាពខុសគ្នានៃភាសា វប្បធម៌ និងប្រពៃណី គឺជាពរជ័យ មិនមែនជាបញ្ហាប្រឈមនោះទេ។ ដោយប្រើចក្ខុវិស័យរបស់លោកដានីញ៉ែល អំពីមនុស្សមកពីគ្រប់ជាតិសាសន៍ និងភាសាទាំងអស់ដែលបម្រើព្រះជាម្ចាស់ លោកពន្យល់ថា ព្រះសហគមន៍កាតូលិក ជាស្ពានចម្លង។
លោកកាឌីណាល់ បន្តថា «អាស៊ីមានកុលសម្ព័ន្ធ វណ្ណៈ និងវប្បធម៌ជាច្រើន ប៉ុន្តែព្រះសហគមន៍កាតូលិក ត្រូវតែក្រោកឡើងពីភាពបែកបាក់ ហើយឱបក្រសោបព្រះវិញ្ញាណដ៏វិសុទ្ធ ដែលមានបន្ទូលមកលើយើងម្នាក់ៗ»។ លោកបានលើកទឹកចិត្ត ព្រះសហគមន៍កាតូលិក អោយមើលឃើញភាពចម្រុះជាសិល្បៈរបស់ព្រះជាម្ចាស់ ជាប្រភពនៃភាពច្នៃប្រឌិត ជាជាងមូលហេតុនៃការបែកបាក់។
អ្នកក្រជាអាទិភាព
ពន្លឺទីបួន បានសង្កត់ធ្ងន់លើភាពជាចំណុចកណ្តាលរបស់អ្នកក្រីក្រ នៅក្នុងតួនាទីរបស់ព្រះសហគមន៍កាតូលិក។ លោកកាឌីណាល់ បូ បានរំលឹកដល់អ្នកមានជំនឿថា សាររបស់ព្រះយេស៊ូ តែងតែលើកតម្កើងអ្នកទន់ទាប និងអ្នកដែលត្រូវបានគេដាក់ដោយឡែក។
លោកមានប្រសាសន៍ថា «តើព្រះយេស៊ូនឹងគង់នៅទីណា ប្រសិនបើទ្រង់យាងមកនៅថ្ងៃនេះ? ប្រហែលមិនមែនក្នុងវិមានទេ ប៉ុន្តែក្នុងចំណោមអ្នកក្រីក្រ ជនអន្តោប្រវេសន៍ និងអ្នកផ្លាស់ប្តូរទីលំនៅ»។ លោកបានពន្យល់ថា ការដើរជាមួយអ្នកក្រ អនុញ្ញាត្តឲ្យអ្នកមានជំនឿ បានជួបព្រះគ្រីស្តក្នុងជីវិតពិត។ លោកកាឌីណាល់បានព្រមានថា ការបំភ្លេចអ្នកដែលត្រូវបានគេ ដាក់អោយនៅដាច់ដោយឡែក ប្រឈមនឹងការភ្លេចបេះដូងនៃដំណឹងល្អ។ ផ្ទុយទៅវិញការដាក់អ្នកក្រកនៅចំណុចកណ្តាល ពង្រឹងជំនឿ នឹងបន្តតួនាទីរបស់ព្រះសហគមន៍កាតូលិក ជាពន្លឺនៃក្តីសង្ឃឹម។
យុវជន៖ រស់រវើក រីករាយ និងចូលរួម
ពន្លឺចុងក្រោយ ផ្តោតលើយុវជននៅអាស៊ី។ លោកកាឌីណាល់ បូ បានពិពណ៌នា អំពីយុវជនថា ជាមនុស្សច្នៃប្រឌិត មានទំនាក់ទំនង និងកំពុងស្វែងរកអត្ថន័យ ដែលជារឿយៗជាប់គាំងរវាងតម្រូវការនៃជីវិតសម័យទំនើប និងការចង់បានខាងផ្លូវវិញ្ញាណ។
លោកបានមានប្រសាសន៍ថា សម្តេចប៉ាបហ្វ្រង់ស៊ីស បានព្រះបន្ទូលថា «ព្រះសហគមន៍កាតូលិក ត្រូវតែទៅរកយុវជន មិនមែនរង់ចាំពួកគេមកទេ»។ លោកបានជំរុញអោយព្រះសហគមន៍កាតូលិក បង្កើតកន្លែងដែលយុវជនអាចច្រៀង សួរសំណួរ ដឹកនាំ និងស្រមៃ។ លោកបានមានប្រសាសន៍ថា «ព្រះសហគមន៍ដើរជាមួយយុវជន មិនដែលចាស់ឡើយ» ដោយសង្កត់ធ្ងន់ថា ការវិនិយោគលើយុវជនធានានូវវត្តមានស្ថិតស្ថេរ នៃព្រះរាជ្យរបស់ព្រះគ្រីស្តនៅទូទាំងអាស៊ី។
ព្រះបន្ទូលគង់នៅអស់កល្បជានិច្ច
នៅចុងបញ្ចប់សុន្ទរកថា របស់លោកកាឌីណាល់ បូ បានរំលឹកដល់អ្នកចូលរួមថា ព្រះរាជ្យរបស់ព្រះជាម្ចាស់ និន្នាការ និងបច្ចេកវិទ្យាទាំងអស់របស់ពិភពលោក គឺមានលក្ខណៈបណ្តោះអាសន្ន ប៉ុន្តែព្រះបន្ទូលរបស់ព្រះគី្រស្តនៅស្ថិតស្ថេរជារៀងរហូត។
លោកមានប្រសាសន៍ថា «មានតែសេចក្តីស្រឡាញ់ប៉ុណ្ណោះដែលនៅសេសសល់។ មានតែព្រះបន្ទូលរបស់ព្រះគ្រីស្តទេដែលនៅស្ថិតស្ថេរ» ដោយជំរុញអ្នកមានជំនឿរស់នៅជាមួយពន្លឺទាំង៥នៅក្នុងព្រះសហគមន៍កាតូលិក។ លោកបានស្រមៃថា ព្រះសហគមន៍កាតូលិកនឹងស្តាប់មុនការនិយាយ ភាពជាអ្នកដឹកនាំគឺជាការដាក់ខ្លួន ភាពចម្រុះត្រូវបានឱបក្រសោប អ្នកក្រីក្រគឺជាអាទិភាព និងយុវជនត្រូវបានចូលរួម ដោយថ្លែងថា «ព្រះយេស៊ូបានវិលត្រឡប់មកអាស៊ីវិញ ហើយសារអំពីសេចក្តីស្រឡាញ់របស់ទ្រង់ និងការផ្សះផ្សាបានទៅដល់អ្នកដែលមានត្រចៀកស្តាប់»។
លោកកាឌីណាល់ បូ បានអធិដ្ឋានថា «ព្រះអម្ចាស់យេស៊ូ សូមយាងមកជាមួយប្រជាជនរបស់ព្រះអង្គនៅអាស៊ីម្តងទៀត។ សូមបង្រៀនយើងខ្ញុំអោយស្តាប់ បម្រើ អំណសប្បាយ និងស្រឡាញ់រហូតដល់ព្រះបន្ទូលរបស់ព្រះអង្គក្លាយជាសាច់ឈាមនៅក្នុងដួងចិត្ត និងគ្រប់គេហដ្ឋាននៅអាស៊ី»។
អភិបូជា ដែលប្រារព្ធឡើងយ៉ាងឱឡារិកនៅក្នុងសាលធំនៃសណ្ឋាគារឡៃថ៍ (Light) បានឆ្លុះបញ្ជាំងទាំងភាពចម្រុះ និងឯកភាពនៃព្រះសហគមន៍កាតូលិកនៅអាស៊ី។ អ្នកចូលរួមបានសម្តែងការដឹងគុណចំពោះសាររបស់លោកកាឌីណាល់ បូ ដែលបានរួមបញ្ជូលយ៉ាងជ្រាលជ្រៅខាងផ្លូវវិញ្ញាណជាមួយនឹងការណែនាំជាក់ស្តែង ដោយផ្តល់នូវការបំផុសគំនិតសម្រាប់ការបន្តដំណើររបស់អ្នកមានជំនឿនៅទូទាំងទ្វីបអាស៊ី៕
Daily Program
