រដ្ឋតិចសាសប្រឈមនឹងភ្លើងឆេះព្រៃដ៏ធំបំផុតមិនធ្លាប់មានក្នុងប្រវត្តិសាស្រ្ត

ភ្លើងឆេះព្រៃនេះ ដ៏ធំបំផុតនៃប្រវត្តិសាស្រ្តសហរដ្ឋអាម៉េរិក នៅរដ្ឋតិចសាស បានធ្វើឲ្យ​មនុស្ស ២នាក់ស្លាប់ និងបំផ្លាញផ្ទៃដីជាង ៥០៩៨០០ ហិចតា។ អ្នកពន្លត់អគ្គីភ័យភ័យខ្លាចថា ស្ថានភាព​​នឹងកាន់តែអាក្រក់​នៅចុងសប្តាហ៍ដោយសារហេតុផលរបស់​ខ្យល់ដែលមិនរំពឹង​ទុក។

យោងតាមតុល្យការថ្មីបានឲ្យដឹងថា មានមនុស្ស ២នាក់ បានស្លាប់នៅរដ្ឋតិចសាស ប្រឈម​មុខ​នឹង​អគ្គីភ័យព្រៃដ៏ធំបំផុតនៃប្រវត្តិសាស្រ្ត​របស់ខ្លួន។ ចំណែកប្រធានាធិបតីអាម៉េរិក លោក ចូ បាយឌិន បាននិយាយថា វាទាក់ទិននឹងឥទ្ធិពលនៃការប្រែប្រួលអាកាសធាតុ។

យោងតាមមន្រ្តីទទួលខុសត្រូវ​នៃនាយកដ្ឋានសន្តិសុខសាធារណៈនៃរដ្ឋតិចសាស ដែលបាន​លើក​​ឡើងដោយប្រព័ន្ធផ្សព្វផ្សាយជាច្រើននៅក្នុងតំបន់ បានប្រាប់ឲ្យដឹងថា លោកយាយ​ម្នាក់​អាយុ ៨៣ឆ្នាំ បានស្លាប់​នៅក្នុងភ្លើងឆេះព្រៃ​នៅផ្ទះរបស់គាត់នៅក្នុងទីក្រុង​តូចមួយ​ ទីក្រុង ស្ទីណេត។ ចំណែកស្រ្តីម្នាក់អាយុ ៤៤ឆ្នាំ បានស្លាប់បន្ទាប់បីបានទទួលរងរបួសយ៉ាងធ្ងន់ធ្ងរ​នៅ​ពេលរថយន្តកាំម៉្ញុង ដែលគាត់បើកត្រូវព័ទ្ធជុំវិញដោយ​អណ្តាតភ្លើងនៅតំបន់ ស្មូកឺហូស គ្រីក រដ្ឋតិចសាស។

រីឯរបាយការណ៍ចុងក្រោយនៃការិយាល័យព្រៃឈើអាម៉េរិក បានធ្វើការសរុបថា មាន​ផ្ទៃដី​៥០៩៨០០ ហិចតា ដែលបានឆាបឆេះនៅក្នុងសណុំភ្លើងឆេះព្រៃទាំងមូល។ ភ្លើង ១១ កន្លែង បានឆាបឆេះ ប៉ុន្តែវាមិនរាលដាល ហើយ ១២កន្លែងទៀត អាជ្ញាធរគ្រប់គ្រងបាន។

យោងតាមការិយាល័យព្រៃឈើនៅរដ្ឋតិចសាស អគ្គីភ័យចំនួន ៥កន្លែង នៅឆេះខ្លាំងសន្ធោរ​សន្ធៅនៅភាគខាងជើងរបស់រដ្ឋ។ កន្លែងដែលមានភ្លើងឆេះខ្លាំងក្លាបំផុតគឺនៅ ស្មូកឺហូស គ្រីក ដែលបានរាលដាលបំផ្លាញផ្ទៃដី ៤៣៥០០០ ហិចតា ហើយឆេះរាលដាលរហូតដល់ មួយ​ផ្នែកនៃរដ្ឋអូក្លាហូម៉ា ជិតខាងទៀតផង។

អ្នកទទួលខុសត្រូវនៃកសិដ្ឋានដ៏ធំមួយ ទួគី ត្រាក ដែលស្ថិតនៅក្នុងតំបន់ បានប្រកាសថា ខ្លួន បាន​ខូចខាត ៨០% នៃដីធ្លី ដែលមានប្រមាណជា ៣២០០០ ហិចតា។

នៅក្នុងសេចក្តីប្រកាសមួយ ដែលលើកឡើងដោយសារព័តមាន ABC News បានឲ្យដឹងដែរ​ថា គេគិតថា ការបាត់បង់សត្វពាហនៈ កសិផល សត្វព្រៃ ព្រមទាំង ហេដ្ឋារចនាសម្ព័ន្ធដទៃៗ លើ​​ដី​កម្មសិទ្ធ និងលើកសិដ្ឋាន ផ្ទះនានានៅក្នុងតំបន់  គឺមានច្រើនឥតគណនា​មិនធ្លាប់​មាន​ពី​មុន​មក​ទេក្នុងប្រវត្តិសាស្រ្ត។

យោងតាមលោកឆាត មីយើ អ្នកឧតុនិយមនៅ CNN បានឲ្យដឹងដែរថា ភ្លើងបានធ្វើចលនា​ក្នុង​​ល្បឿន ២តារាង បាល់ទាត់ក្នុង​មួយវិនាទី ដែលជាល្បឿនដ៏លឿន។

ប្រធានាធិបតីបាយឌិន ក្នុងទស្សនកិច្ចសម្រាប់ការបោះឆ្នោតនៅក្នុងរដ្ឋតិចសាស អំពី​ប្រធាន​បទ អន្តោប្រវេស បានបញ្ជាក់ទៅកាន់សារព័ត៌មានសហព័ន្ធថា មន្រ្តីរដ្ឋការសហព័ន្ធ ៥០០​នាក់ ធ្វើការយ៉ាងសកម្ម​ដើម្បីប្រយុទ្ធប្រឆាំងនឹងភ្លើងឆេះព្រៃ បន្ថែមពីលើអ្នកពន្លត់​អគ្គីភ័យ​​នៅ​ក្នុងតំបន់។

ទីក្រុងជាច្រើននៅសហរដ្ឋអាម៉េរិក និងនៅកាណាដា បានជួបសីតុណ្ហភាពឡើងដល់កម្រិត​ឯកតកម្ម​នៅខែកុម្ភៈ។ រដ្ឋខ្លះបានជួបអាកាសធាតុក្តៅខ្លាំងហួតហែងនៅរដូវក្តៅ។ យោងតាម​អ្នក​ជំនាញនានាបានឲ្យដឹងថា បាតុភូត អេលនីណូ គឺជាមូលហេតុ បន្ថែមពីលើការប្រែប្រួល​អាកាសធាតុ។

លោកចូ បាយឌិន ដោយនិយាយសើចចំអក​ឲ្យ​គូប្រជែងតំណែងប្រធានាធិបតី​ពីគណបក្ស​សាធារណរដ្ឋ​ដែលមិនជឿរឿងអាកាសធាតុ បាននិយាយថា ៖ “លោកស្រឡាញ់​មិត្តខ្លះរបស់​លោក ដែលនៅគិត​នៅឡើយថា មិនមានការប្រែប្រួលអាកាសធាតុ”។